مصنف ابن ابي شيبه

حضرت ابو یونس الباھلی فرماتے ہیں کہ میں نے مکہ میں ایک شیخ سے سنا جو اصل میں رومی تھے وہ حضرت ابو ذر سے روایت کرتے ہیں کہ ایک شخص بیت اللہ کا طواف کرتے ہوئے اوہ اوہ کر رہا تھا، حضرت ابو ذر نے ارشاد فرمایا : میں ایک رات کو نکلا (تو میں نے دیکھا) آنحضرت صلی اللہ علیہ وآلہ وسلم اس وقت قبرستان میں ہیں اسی آدمی کو دفن کر رہے تھے۔ اور آپ کے پاس چراغ بھی تھا۔

حضرت حسن بن محمد فرماتے ہیں کہ حضرت فاطمہ کو رات کے وقت دفن کیا گیا۔

حضرت عروہ فرماتے ہیں کہ حضرت علی رضی اللہ عنہ کرم اللہ وجہہ نے حضرت فاطمہ کو رات کے وقت دفن کیا۔

حضرت موسیٰ بن علی رضی اللہ عنہاپنے والد سے روایت کرتے ہیں کہ میں حضرت عقبہ بن عامر کے پاس تھا کہ آپ سے جنازے کی تکبیروں کے بارے میں دریافت کیا گیا ؟ آپ نے فرمایا چار ہیں میں نے عرض کیا دن اور رات میں برابر ہیں ؟ آپ نے فرمایا رات اور دن برابر ہیں، میں نے عرض کیا میت کو رات کے وقت دفن کیا جاسکتا ہے ؟ آپ نے فرمایا حضرت ابوبکر صدیق کو رات کے وقت دفن کیا گیا۔

حضرت قاسم بن محمد فرماتے ہیں کہ حضرت ابوبکر صدیق کو رات کے وقت دفن کیا گیا۔

حضرت ابن ابی عروبہ فرماتے ہیں کہ حضرت قتادہ فرماتے ہیں کہ حضرت عبد اللہ بن مسعود رضی اللہ عنہ کو رات کے وقت دفن کیا گیا، حضرت ابو قتادہ اس کو ناپسند کرتے تھے۔

حضرت ابن السباق فرماتے ہیں کہ حضرت عمر نے حضرت ابوبکر صدیق کو رات کے وقت دفن فرمایا : پھر مسجد میں تشریف لائے اور نماز وتر ادا فرمائی۔

حضرت شعبی فرماتے ہیں کہ حضرت شریح نے اپنی بعض اولاد کو ازدحام کے ڈر سے رات کے وقت دفن فرمایا : (ازدحام کو ناپسند کرتے ہوئے) ۔

حضرت زرعہ بن عمرو اپنے والد حضرت عمرو سے روایت کرتے ہیں کہ ہم نے حضرت عثمان بن عفان کو عشاء کے بعد جنت البقیع میں دفن کیا، اور میں ان چاروں میں سے ایک تھا جنہوں نے ان کی میت کو اٹھا رکھا تھا۔

حضرت عائشہ رضی اللہ عنہا فرماتی ہیں کہ حضرت ابوبکر صدیق منگل کی رات دنیا سے تشریف لے گئے اور منگل کی رات کو ہی ان کو دفن کیا گیا۔

حضرت قتادہ فرماتے ہیں کہ حضرت سعید بن المسیب رات کو دفن کرنے میں کوئی حرج نہیں سمجھتے تھے۔

حضرت خالد بن سمیر السدوسی فرماتے ہیں کہ میں نے حضرت انس سے رات کو نماز جنازہ پڑھنے کے متعلق دریافت کیا ؟ آپ نے فرمایا رات کو نماز جنازہ پڑھنا ایسا ہی ہے جیسے دن کو پڑھنا۔

حضرت ابن عون فرماتے ہیں کہ ابراہیم کو ہم نے رات کے وقت دفن کیا اور ہم سب خوف زدہ تھے۔

حضرت ابو حرہ فرماتے ہیں کہ حسن رات کو دفن کرنے کو ناپسند فرماتے تھے۔

حضرت عائشہ رضی اللہ عنہا ارشاد فرماتی ہیں کہ ہمیں رسول اکرم (صلی اللہ علیہ وآلہ وسلم) کے دفنانے کا علم نہ تھا کہ ہم نے ایک گذرنے والوں کی آواز رات کے آخری پہر میں سنی۔ وہ رات بدھ کی رات تھی۔