مصنف ابن ابي شيبه

حضرت امامہ بن سھل اپنے والد سے روایت کرتے ہیں کہ نبی اکرم (صلی اللہ علیہ وآلہ وسلم) نے ایک خاتون کی قبر پر نماز جنازہ پڑھی اور چار تکبیرات کہیں۔

حضرت جابر بن عبد اللہ رضی اللہ عنہ سے مروی ہے نبی کریم صلی اللہ علیہ وآلہ وسلم نے اصحمہ نجاشی کی نماز جنازہ پڑھائی، اور اس میں چار تکبیرات پڑھی۔

حضرت سعید سے مروی ہے کہ نبی کریم صلی اللہ علیہ وآلہ وسلم بقیع کی طرف نکلے اور نجاشی کی نماز جنازہ پڑھائی اور چار تکبیرات پڑھیں۔

حضرت ابو ہریرہ رضی اللہ عنہ سے مروی ہے کہ نبی کریم صلی اللہ علیہ وآلہ وسلم نے فرمایا : نجاشی فوت ہوگیا ہے۔ چناچہ آپ صلی اللہ علیہ وآلہ وسلم اور آپ کے صحابہ بقیع کی طرف نکلے، ہم نے آپ صلی اللہ علیہ وآلہ وسلم کے پیچھے صفیں باندھیں، اور حضور صلی اللہ علیہ وآلہ وسلم ہمارے آگے تھے آپ صلی اللہ علیہ وآلہ وسلم نے چار تکبیرات کہیں۔

حضرت عبد الرحمن بن ابزی فرماتے ہں ھ کہ حضرت زینب بنت جحش کا انتقال ہوا تو حضرت عمر نے نماز جنازہ میں چار تکبیرات پڑھیں، پھر ازواج مطہرات سے دریافت کیا کہ ان کو قبر میں کون اتارے ؟ انہوں نے فرمایا : جو ان کی زندگی میں ان کے پاس آیا کرتا تھا۔ (جس کا ان سے پردہ نہیں تھا وہ) ۔

حضرت عبدخیر فرماتے ہیں کہ حضرت علی رضی اللہ عنہ کا انتقال ہوا اس حال میں کہ آپ نماز جنازہ میں چار تکبیرات پڑھا کرتے تھے۔

حضرت عمیر بن سعید فرماتے ہیں کہ میں نے حضرت علی رضی اللہ عنہ کے پیچھے حضرت یزید بن المکفف کی نماز جنازہ پڑھی۔ آپ نے نماز جنازہ میں چار تکبیرات پڑھیں۔

حضرت علی رضی اللہ عنہ سے اسی طرح منقول ہے۔

ابراہیم فرماتے ہیں کہ حضرت عبد اللہ سے نماز جنازہ کی تکبیرات کے متعلق دریافت کیا گیا ؟ آپ نے فرمایا کہ جنازے میں ہر طرح کا عمل کیا گیا ہے اور میں نے لوگوں کو (صحابہ کرام ) کو چار تکبیرات پر جمع پایا۔

حضرت عبد اللہ فرماتے ہیں کہ نماز جنازہ میں چار تکبیرات ہیں تکبیر خروج سمیت۔

حضرت مہاجر ابی الحسن فرماتے ہیں کہ میں نے حضرت براء کے پیچھے نماز جنازہ پڑھی آپ نے اس میں چار تکبیرات کہیں۔

حضرت عقبہ بن عامر سے ایک شخص نے دریافت کیا جنازے میں کتنی تکبیرات ہیں ؟ آپ نے فرمایا چار، میں نے عرض کیا دن اور رات برابر ہیں ؟ آپ نے فرمایا دن اور رات برابر ہیں۔

حضرت زید بن طلحہ فرماتے ہیں کہ میں حضرت ابن عباس رضی اللہ عنہما کے پاس حاضر ہوا آپ نے جنازے پر چار تکبیرات پڑھیں۔

حضرت ثابت عبید فرماتے ہیں کہ حضرت زید بن ثابت نماز جنازہ میں چار تکبیرات پڑھا کرتے تھے، اور حضرت ابوھریرہ بھی چار تکبیرات پڑھا کرتے تھے۔

حضرت ابو العنبس اپنے والد سے روایت کرتے ہیں کہ میں نے حضرت ابو ہریرہ رضی اللہ عنہ کے پیچھے نماز جنازہ پڑھی آپ نے اس پر چار تکبیرات پڑھیں۔

حضرت حسن بن علی رضی اللہ عنہ کے غلام سے مروی ہے کہ حضرت حسن بن علی رضی اللہ عنہ نے حضرت علی رضی اللہ عنہ کی نماز جنازہ پڑھائی اور اس میں چار تکبیرات پڑھیں۔

حضرت نافع فرماتے ہیں کہ حضرت عبد اللہ بن عمر رضی اللہ عنہما جنازہ میں چار تکبیرات سے زیادہ نہ کہتے تھے۔

حضرت زید بن ثابت سے بھی اسی کے مثل منقول ہے۔

حضرت عبد اللہ بن معقل فرماتے ہیں کہ حضرت علی رضی اللہ عنہ کرم اللہ وجہہ نے اپنی خلافت میں ہر نماز جنازہ میں چار تکبیرات پڑھیں۔ سوائے حضرت سھل بن حنیف کے ان پر چھ تکبیرات پڑھیں۔ پھر لوگوں کی طرف متوجہ ہو کر فرمایا : (میں نے چھ تکبیرات اس لیے پڑھی ہیں) کیونکہ یہ بدری صحابی ہیں۔

حضرت ابن مسعود فرماتے ہیں کہ ہم نماز جنازہ میں پانچ یا چھ تکبیرات کہا کرتے تھے، پھر ہم سب چار پر متفق ہوگئے۔ (اجماع چار پر ہوگیا) ۔

حضرت ابن عون فرماتے ہیں کہ محمد نماز جنازہ میں چار تکبیرات پڑھا کرتے تھے۔

حضرت عمران بن ابو عطاء فرماتے ہیں کہ میں حضرت ابن عباس رضی اللہ عنہما کی وفات پر حاضر ہوا تو حضرت ابن الحنفیہ نے ان کی نماز جنازہ پڑھائی اور چار تکبیرات پڑھیں۔

حضرت عمر ابن حدیر فرماتے ہیں کہ حضرت ابو مجلز جنازہ میں چار تکبیرات پڑھا کرتے تھے۔

حضرت الھجری فرماتے ہیں کہ میں نے حضرت عبد اللہ بن ابی اوفی کے پیچھے نماز جنازہ پڑھی، آپ نے اس میں چار تکبیرات پڑھیں ، پھر تھوڑی دیر کھڑے رہے، یہاں تک کہ ہمیں گمان ہونے لگا کہ آپ پانچویں تکبیر کہیں گے، پھر آپ نے سلام پھیرا اور فرمایا : کیا تمہارا خیال یہ تھا کہ میں پانچویں تکبیر کہوں گا ؟ میں اسی طرح کھڑا رہا جس طرح میں نے رسول اکرم (صلی اللہ علیہ وآلہ وسلم) کو کھڑا دیکھا۔

حضرت عبداللہ بن جمیع فرماتے ہیں کہ میں نے ابراہیم کو نماز جنازہ میں چار تکبیرات پڑھتے ہوئے دیکھا۔

حضرت عمر بن ابی زائدہ فرماتے ہیں کہ میں نے حضرت قسَ بن ابی حازم کے پیچھے نماز جنازہ پڑھی آپ نے اس میں چار تکبیرات کہیں۔

حضرت عمرو بن مرہ سے مروی ہے کہ حضرت عمر نے فرمایا : سب کام (مکمل) ہوچکے، آ جاؤ ہم ایسے معاملہ پر اجماع کریں جس سے ہمارے بعد والے دلیل بنا سکیں۔ پھر سب نے جنازہ پر چار تکبیرات پڑھیں۔

حضرت عمرو بن مہاجر فرماتے ہیں کہ میں نے حضرت واثلہ کے پیچھے نماز جنازہ پڑھی آپ نے چار تکبیرات پڑھیں۔

حضرت ابو خصیب فرماتے ہیں کہ حضرت سوید نے نماز جنازہ میں چار تکبیرات پڑھیں۔

حضرت ابو وائل فرماتے ہیں کہ حضرت عمر نے صحابہ کرام کو جمع فرمایا اور ان سے نماز جنازہ کی تکبیرات کے بارے میں مشورہ کیا (رائے دریافت کی) ۔ ان میں سے بعض نے فرمایا نبی کریم صلی اللہ علیہ وآلہ وسلم پانچ تکبیریں پڑھا کرتے تھے اور بعض نے فرمایا سات تکبیرات پڑھا کرتے اور بعض نے فرمایا چار تکبیرات پڑھا کرتے تھے ۔ راوی کہتے ہیں کہ پھر ان سب کا چار تکبیرات پر اجماع ہوگیا۔

ابراہیم فرماتے ہیں کہ صحابہ کرام کا نماز جنازہ کی تکبیرات کے بارے میں اختلاف تھا، پھر سب کا چار تکبیرات پر اتفاق ہوگیا۔