مصنف ابن ابي شيبه

حضرت ابو العریان الحذائ فرماتے ہیں کہ میں نے حضرت حسن بن علی رضی اللہ عنہ کے پیچھے نماز جنازہ پڑھی، جب نماز سے فارغ ہوئے میں نے ان کا ہاتھ پکڑ کر عرض کیا کہ آپ نے کیا کیا ؟ آپ نے فرمایا میں نے اس پر سورة الفاتحہ پڑھی۔

حضرت قتادہ ھمدان کے شخص سے روایت کرتے ہیں کہ حضرت عبد اللہ بن مسعود رضی اللہ عنہ نماز جنازہ میں سورة الفاتحہ کی تلاوت فرماتے ۔

حضرت ابن عون فرماتے ہیں کہ حسن نماز جنازہ کی ہر تکبیر میں سورة الفاتحہ کی تلاوت فرماتے ۔

حضرت ضحاک فرماتے ہیں کہ نماز جنازہ کی پہلی دو تکبیروں کے درمیان سورة الفاتحہ پڑھو۔

حضرت سعید بن المسیب فرماتے ہیں کہ نماز جنازہ میں سنت طریقہ یہ ہے کہ سورة الفاتحہ پڑھی جائے۔

حضرت برد فرماتے ہیں کہ حضرت مکحول نماز جنازہ کی پہلی دو تکبیرات میں سورة الفاتحہ پڑھتے۔ اگر لوگ انہیں دعا کا موقع دیتے تو نماز میں دعا مانگتے۔

حضرت عبید بن سباق فرماتے ہیں کہ میں نے حضرت سھل بن حنیف کو نماز جنازہ کی پہلی تکبیر میں سورة الفاتحہ پڑھتے ہوئے دیکھا۔

حضرت سعید فرماتے ہیں کہ حضرت عبد اللہ بن عباس رضی اللہ عنہما نے نماز جنازہ میں اونچی آواز سے تلاوت فرمائی اور پھر فرمایا میں نے اس لیے بلند آواز میں تلاوت کی تاکہ آپ لوگوں کو معلوم ہوجائے کہ نماز جنازہ میں تلاوت ہے۔

حضرت ابو معبد فرماتے ہیں کہ لوگوں نے حضرت ابن عباس رضی اللہ عنہما سے نماز جنازہ میں بلند آواز سے سورة فاتحہ پڑھتے اور جنازے میں تین تکبیرات کہتے۔

حضرت زید بن طلحہ فرماتے ہںِ کہ حضرت عبد اللہ بن عباس رضی اللہ عنہما نماز جنازہ میں سورة الفاتحہ پڑھتے۔

حضرت فضالہ فرماتے ہیں کہ جن لوگوں نے حضرت ابوبکر اور حضرت عمر کی نماز جنازہ پڑھی انہوں نے اس میں سورة الفاتحہ پڑھی۔