مصنف ابن ابي شيبه

حضرت شعبی فرماتے ہیں کہ پہلی تکبیر میں ابتدا کرے گا حمد وثنا سے ، دوسری تکبیر میں درود پڑھے گا اور تیسری تکبیر میں میت کے لیے دعا اور چوتھی کے بعد سلام۔

حضرت علاء بن المسیب اپنے والد سے روایت کرتے ہیں کہ حضرت علی رضی اللہ عنہ جب نماز جنازہ پڑھتے تو اللہ کی حمد سے ابتدا کرتے پھر درود پڑھتے پھر یہ دعا پڑھتے۔ اللَّہُمَّ اغْفِرْ لأَحْیَائِنَا وَأَمْوَاتِنَا، وَأَلِّفْ بَیْنَ قُلُوبِنَا، وَأَصْلِحْ ذَاتَ بَیْنِنَا، وَاجْعَلْ قُلُوبَنَا عَلَی قُلُوبِ خِیَارِنَا۔

حضرت سعید بن ابی المقبری فرماتے ہیں کہ ایک شخص نے حضرت ابو ہریرہ رضی اللہ عنہ سے دریافت فرمایا کہ آپ نماز جنازہ کیسے ادا فرماتے ہیں ؟ آپ نے فرمایا اللہ کی قسم میں تمہیں بتاؤں گا، تکبیر پڑھتا ہوں، پھر آپ صلی اللہ علیہ وآلہ وسلم پر درود پڑھتا ہوں، پھر میں یہ دعا پڑھتا ہوں۔ اللَّہُمَّ عَبْدُک ، أَوْ أَمَتُک، کَانَ یَعْبُدُک لاَ یُشْرِکُ بِکَ شَیْئًا، وَأَنْتَ أَعْلَمُ بِہِ ، إِنْ کَانَ مُحْسِنًا فَزِدْ فِی إحْسَانِہِ ، وَإِنْ کَانَ مُخْطِئًا فَتَجَاوَزْ عَنْہُ ، اللَّہُمَّ لاَ تَفْتِنَّا بَعْدَہُ ، وَلاَ تَحْرِمْنَا أَجْرَہُ ۔

حضرت ابو ہاشم فرماتے ہیں کہ میں نے حضرت امام شعبی سے سنا، آپ فرماتے ہیں، پہلی تکبیر میں اللہ تعالیٰ کی حمد وثنا پڑھے، دوسری میں حضور صلی اللہ علیہ وآلہ وسلم پر درود پڑھے، تیسری میں میت کے لئے دعا کرے اور چوتھی کے بعد سلام ہے۔

حضرت امام زہری فرماتے ہیں کہ میں نے حضرت ابوامامہ سے سنا وہ حضرت سعید بن المسیب سے بیان کرتے ہیں کہ نماز جنازہ کا سنت طریقہ یہ ہے کہ آپ پہلے سورة الفاتحہ پڑھیں، پھر نبی کریم صلی اللہ علیہ وآلہ وسلم پر درود پڑھیں، پھر میت کے لیے دعا کی جائے یہاں تک کہ اس سے فارغ ہو جاؤ اور یہ صرف ایک بار پڑھنا اور پھر اپنے جی میں سلام پھیرنا۔