مصنف ابن ابي شيبه

حضرت قاسم سے مروی ہے کہ حضرت صدیق اکبر جب بیت المال سے کسی کو وظیفہ دیتے تو اس سے دریافت فرماتے کہ کیا تیرے پاس مال موجود ہے ؟ اگر اس کا جواب ہاں میں ہوتا تو آپ اس کے وظیفہ کے مال میں سے زکوٰۃ نکال لیتے وگرنہ اسکے سپرد کردیتے۔

حضرت عبد اللہ فرماتے ہیں کہ ہمیں بیت المال سے عطاء (وظیفہ) میں دس سے پچیس اونٹ یا بکریاں ملتیں تو ہم اس پر زکوٰۃ ادا کرتے تھے۔

حضرت ہبیرہ سے مروی ہے کہ حضرت عبد اللہ بن مسعود رضی اللہ عنہ وظائف پر زکوٰۃ ادا فرماتے وہ ہر ہزار پر پچیس ہوتی تھی۔

حضرت حمید بن عبد الرحمن سے مروی ہے کہ حضرت عبد الرحمن بن عبد القاری حضرت عبد اللہ بن ارقم کے ساتھ حضرت عمر فاروق کے زمانے میں بیت المال پر (نگران) مقرر تھے۔ جب بیت المال سے وظائف نکالے جاتے تو حضرت عمر تاجروں کے مال کو جمع فرماتے پھر نقد اور ادھار کا حساب لگاتے اور پھر ہر حاضر و غائب سے زکوٰۃ وصول فرماتے ۔

حضرت قاسم سے مروی ہے کہ حضرت ابوبکر صدیق جب کسی شخص کو وظیفہ عطا فرماتے تو اس سے دریافت فرماتے ۔ باقی حدیث اسی طرح بیان فرمائی۔

حضرت طارق سے مروی ہے حضرت عمر فاروق جب کسی شخص کو بیت المال میں سے وظیفہ (بخشش) عطا فرماتے تو اس پر زکوٰۃ نہ نکالتے۔

محمد سے مروی ہے فرماتے ہیں کہ میں نے امراء (صحابہ کرام ) کو دیکھا ہے جب ان کو عطایا ملتے ہیں تو اس پر زکوٰۃ بھی ادا فرماتے ہیں۔

حضرت جعفر بن برقان فرماتے ہیں کہ حضرت عمر بن عبد العزیز عطاء (وظیفہ) اور انعامات پر زکوٰۃ ادا کرتے تھے۔

حضرت عبد اللہ بن مسعود رضی اللہ عنہ جب کسی کو وظیفہ عطا فرماتے تو اس پر زکوٰۃ بھی ادا فرماتے ۔