مصنف ابن ابي شيبه

حضرت عمرو بن شعیب اپنے والد اور دادا سے روایت کرتے ہیں کہ آنحضرت صلی اللہ علیہ وآلہ وسلم کے پاس دو عورتیں آئیں ان کے ہاتھوں میں سونے کے کنگن تھے۔ آنحضرت صلی اللہ علیہ وآلہ وسلم نے ان سے فرمایا : کیا تم پسند کرتی ہو کہ اللہ تعالیٰ (قیامت کے دن) تمہیں آگ کے کنگن پہنائے ؟ انہوں نے عرض کیا نہیں، آپ صلی اللہ علیہ وآلہ وسلم نے ارشاد فرمایا کہ پھر جو تم نے اپنے ہاتھوں میں پہن رکھا ہے اسکا حق (زکوٰۃ) ادا کرو۔

حضرت شعیب سے مروی ہے کہ حضرت عمر نے حضرت ابو موسیٰ اشعری کو خط لکھا کہ : اپنی قریبی عورتوں کو حکم دو کہ وہ اپنے زیورات کی زکوٰۃ ادا کیا کریں۔ اور ھدیہ اور منہ بند کو اپنے درمیان لین دین نہ کریں۔

حضرت انس رضی اللہ عنہ فرماتے ہیں کہ ایک مرتبہ زکوٰۃ ادا کی جائے گی۔

حضرت عبد اللہ بن شداد زیورات پر زکوٰۃ کو فرض سمجھتے تھے۔

ابراہیم فرماتے ہیں کہ زیورات پر زکوٰۃ ہے۔

حضرت سعید فرماتے ہیں کہ زیورات پر زکوٰۃ ہے۔

حضرت سعید بن جبیر فرماتے ہیں کہ سونے اور چاندی کے زیورات پر زکوٰۃ ہے اور یہی سفیان کا بھی قول ہے۔

حضرت عمرو بن شعیب فرماتے ہیں کہ حضرت عبد اللہ بن عمرو رضی اللہ عنہ عورتوں کو حکم فرمایا کرتے تھے کہ زیورات پر زکوٰۃ ادا کرو۔

حضرت عطاء فرماتے ہیں کہ زیورات پر زکوٰۃ ہے۔

حضرت طاؤس اپنے والد سے روایت کرتے ہیں کہ زیورات پر زکوٰۃ ہے۔

حضرت عمرو بن ھرم فرماتے ہیں کہ میں نے حضرت جابر بن زید سے زیورات پر زکوٰۃ کے متعلق دریافت کیا ؟ آپ نے فرمایا جی ہاں جب وہ بیس مثقال یا دو سو درھم کے بقدر ہوں تو پھر زکوٰۃ ہے۔

حضرت ابو خالد الاحمر سے مروی ہے کہ حضرت حجاج، حضرت عطاء ، حضرت زہری اور حضرت مکحول فرماتے ہیں کہ زیورات پر زکوٰۃ ہے، فرماتے ہیں کہ سنت میں یہ بات گذر چکی ہے کہ سونے چاندی کے زیورات پر زکوٰۃہے۔

حضرت عبد اللہ بن شداد فرماتے ہیں کہ زیورات پر زکوٰۃ ہے یہاں تک کہ انگوٹھی پر بھی ہے۔

حضرت جعفر بن میمون فرماتے ہیں کہ ہمارے پاس ایک ہار تھا اور ہم نے اسکی زکوٰۃ ادا کردی تھی یہاں تک کہ اسکو دیکھا کہ وہ اپنی قیمت پر آگئی تھی۔

حضرت عطاء فرماتے ہیں کہ جب زیورات اس مقدار کو پہنچ جائیں جس پر زکوٰۃ آتی ہے تو پھر ان (زیورات پر بھی) زکوٰۃ آئے گی۔