مصنف ابن ابي شيبه

حضرت حکم سے مروی ہے کہ نبی کریم صلی اللہ علیہ وآلہ وسلم نے زکوٰۃ وصول کرنے والے کو زکوٰۃ وصول کرنے کیلئے بھیجا۔ وہ حضرت عباس کے پاس آیا اور ان سے زکوٰۃ طلب کی۔ حضرت عباس نے ان سے فرمایا کہ میں تو اپنے مال کی دو سال کی زکوٰۃ پہلے ہی ادا کرچکا ہوں۔ وہ زکوٰۃ وصول کرنے والا آپ صلی اللہ علیہ وآلہ وسلم کے پاس آیا اور آپ کو یہ بات بتائی۔ آپ صلی اللہ علیہ وآلہ وسلم نے ارشاد فرمایا : ” میرے چچا نے سچ کہا ہے “۔

حضرت عطاء فرماتے ہیں کہ زکوٰۃ جلدی ادا کرنے میں کوئی حرج نہیں ہے۔

حضرت سعید بن جبیر سے بھی اسی طرح مروی ہے۔

ابراہیم فرماتے ہیں کہ اس میں کوئی حرج نہیں ہے کہ تو اپنے مال کی زکوٰۃ جلدی (پہلے ہی) ادا کر دے اور اس میں مستقبل کا حساب کرلے۔

حسن فرماتے ہیں کہ جب تو ساری زکوٰۃ ہی جلدی ادا کر دے تو اس میں کوئی حرج نہیں ہے۔

حضرت حفص بن سلیمان فرماتے ہیں کہ میں نے حسن سے پوچھا کہ ایک شخص نے تین سالوں کی زکوٰۃ اکٹھی ایک ساتھ نکال دی ہے (تو کیا ٹھیک ہے) ؟ آپ نے فرمایا : اس کیلئے یہ کافی ہے (اس طرح کرنا جائز ہے)

حضرت ضحاک فرماتے ہیں کہ سال مکمل ہونے سے قبل ہی زکوٰۃ ادا کرنے میں کوئی حرج نہیں ہے۔

حضرت حکم فرماتے ہیں کہ زکوٰۃ جلدی ادا کرنے میں کوئی حرج نہیں ہے۔

حضرت عمر بن یونس فرماتے ہیں کہ کوئی شخص سال مکمل ہونے سے پہلے ہی زکوٰۃ ادا کر دے تو حضرت زہری اس میں کوئی حرج نہیں سمجھتے تھے۔

حضرت ابن سیرین فرماتے ہیں کہ مجھے نہیں معلوم کہ یہ کیا ہے ؟ زکوٰۃ فرض ہونے سے پہلے ہی زکوٰۃ ادا کردینا ایک مہینہ یا دو مہینے پہلے۔