مصنف ابن ابي شيبه

حضرت عائشہ رضی اللہ عنہا فرماتی ہیں کہ نبی کریم صلی اللہ علیہ وآلہ وسلم ان کپڑوں میں نماز پڑھا کرتے تھے جن میں جماع کیا ہوتا۔

حضرت عبد الملک بن عمیر کہتے ہیں کہ ایک آدمی نے حضرت جابر بن سمرہ سے سوال کیا کہ کیا میں ان کپڑوں میں نماز پڑھ سکتا ہوں جن میں جماع کیا ہو ؟ فرمایا کہ اگر کپڑوں پر کچھ لگ جائے تو اسے دھو لے اور اگر کچھ نہ لگا ہو تو ان کپڑوں میں نماز پڑھنے میں کوئی حرج نہیں۔

حضرت ابن عمر رضی اللہ عنہما نے فرمایا کہ یہ جانتی ہے کہ جن کپڑوں میں ہم جماع کرتے ہیں انہی میں نماز پڑھتے ہیں۔

حضرت شعبی سے سوال کیا گیا کہ آدمی نے جن کپڑوں میں جماع کیا ہو ان میں نما زپڑھ سکتا ہے ؟ انہوں نے فرمایا ہاں۔ ان سے پوچھا گیا کہ کیا اس پر پانی چھڑک لیا جائے ؟ انہوں نے فرمایا کہ اس سے بدبو ہی پیدا ہوگی۔

حضرت محمد بن ابی سفیان کہتے ہیں کہ ام المؤمنین حضرت ام حبیبہ فرماتی ہیں کہ میں نے رسول اللہ صلی اللہ علیہ وآلہ وسلم کو اس کپڑے میں نما ز پڑھتے دیکھا جو مجھ پر اور آپ پر تھا اور اس میں جو ہوا تھا سو ہوا تھا۔

حضرت معاویہ بن ابی سفیان نے ام المؤمنین حضرت ام حبیبہ بنت ابی سفیان سے سوال کیا کہ کیا رسول اللہ صلی اللہ علیہ وآلہ وسلم ان کپڑوں میں نما زپڑھا کرتے تھے جن میں آپ نے جماع کیا ہو ؟ آپ نے فرمایا ہاں، اگر اس میں گندگی نہ لگی ہو تو آپ ان کپڑوں میں نماز پڑھ لیا کرتے تھے۔