مصنف ابن ابي شيبه

حضرت عبد الحمید بن محمود فرماتے ہیں کہ ہم نے ایک امیر کے پیچھے نماز پڑھی، رش کی وجہ سے ہمیں دو ستونوں کے درمیان نماز پڑھنا پڑی، جب ہم نماز پڑھ چکے تو حضرت انس بن مالک رضی اللہ عنہ نے ہم سے فرمایا کہ رسول اللہ صلی اللہ علیہ وآلہ وسلم کے عہد مبارک میں ہم اس سے بچا کرتے تھے۔

حضرت انس بن مالک رضی اللہ عنہ فرماتے ہیں کہ ہمیں دو ستونوں کے درمیان نماز پڑھنے سے منع کیا گیا ہے۔

حضرت ابن مسعود فرماتے ہیں کہ دو ستونوں کے درمیان نماز نہ پڑھو اور ایسے لوگوں کی امامت نہ کراؤ جو شک کا شکار ہوں اور فضو ل کام کرتے ہوں۔

حضرت حذیفہ رضی اللہ عنہ نے دو ستونوں کے درمیان نماز کو ناپسندیدہ قرار دیا۔

حضرت قرہ فرماتے ہیں کہ حضرت عمر نے مجھے دو ستونوں کے درمیان نماز پڑھتے دیکھا تو میری گردن سے پکڑ کر مجھے سترہ کے قریب کردیا اور فرمایا کہ یہاں نماز پڑھو۔

ابراہیم نے دو ستونوں کے درمیان نماز پڑھنے کو مکروہ قرار دیا اور فرمایا کہ صفوں کو پورا کرو۔

ابراہیم فرماتے ہیں کہ دو ستونوں کے درمیان نماز نہ پڑھو۔