مصنف ابن ابي شيبه

حضرت ابن عمر رضی اللہ عنہما فرماتے ہیں کہ طلوع شمس اور غروب شمس کے وقت نمازکا ارادہ نہ کرو، کیونکہ رسول اللہ صلی اللہ علیہ وآلہ وسلم اس سے منع فرمایا کرتے تھے۔

حضرت عقبہ بن عامر فرماتے ہیں کہ تین اوقات میں نماز پڑھنے اور مردوں کو دفنانے سے نبی صلی اللہ علیہ وآلہ وسلم نے منع فرمایا ہے، طلوع شمس کے وقت یہاں تک کہ سورج اچھی طرح بلند ہوجائے۔ سورج کے غروب ہوتے وقت یہاں تک کہ وہ بالکل غروب ہوجائے اور دوپہر کو سورج کے استواء کے وقت یہاں تک کہ وہ زائل ہوجائے۔

حضرت عبد اللہ فرماتے ہیں کہ سورج شیطان کے دو سینگوں کے درمیان سے طلوع ہوتا ہے، ہمیں طلوع شمس اور غروب شمس کے وقت نماز سے منع کیا جاتا تھا۔

حضرت بلال فرماتے ہیں کہ سوائے غروب شمس کے کسی وقت نماز سے منع نہیں کیا گیا، کیونکہ وہ شیطان کے سینگ میں غروب ہوتا ہے۔

حضرت عروہ بن زبیر فرماتے ہیں کہ کچھ لوگوں نے فجر کے بعد بیت اللہ کا طواف کیا، پھر رکن اسود یا حجر اسود کے پاس بیٹھ گئے۔ جب سورج طلوع ہونے لگا تو انہوں نے اٹھ کر نماز ادا کی۔ اس پر حضرت عائشہ رضی اللہ عنہا نے فرمایا کہ پہلے تو وہ بیٹھے رہے پھر جب وہ وقت شروع ہوا جس میں نماز مکروہ ہے تو انہوں نے نماز شروع کردی۔

حضرت ابن عباس رضی اللہ عنہما فرماتے ہیں کہ طلوع شمس اور غروب شمس کے وقت نماز نہیں پڑھی جائے گی۔ کیونکہ سورج شیطان کے دونوں سینگوں کے درمیان طلوع اور غرو ب ہوتا ہے۔ البتہ جب سورج غروب کے بعد بالکل چھپ جائے اور طلوع کے بعد بالکل بلند ہوجائے تو اس وقت نماز جائز ہے۔

حضرت ابن معقل فرماتے ہیں کہ میں نے طلوع شمس کے وقت یا کسی مکروہ وقت میں ایک آدمی کو نماز پڑھتے دیکھا تو ایک آدمی کو بھیج کر اسے منع کرادیا۔

حضرت شریح نے ایک آدمی کو دیکھا کہ وہ سورج زرد ہونے کے بعد نماز پڑھ رہا تھا۔ انہوں نے فرمایا کہ اسے نماز پڑھنے سے منع کرو کیونکہ اس وقت نماز پڑھنا جائز نہیں۔

حضرت ابن عمر رضی اللہ عنہما سے روایت ہے کہ نبی صلی اللہ علیہ وآلہ وسلم نے ارشاد فرمایا کہ طلوع شمس اور غروب شمس کے وقت نمازنہ پڑھو کیونکہ سورج شیطان کے سینگ میں طلوع ہوتا ہے۔

حضرت ابن عمر رضی اللہ عنہما سے روایت ہے کہ نبی صلی اللہ علیہ وآلہ وسلم نے ارشاد فرمایا کہ جب سورج کی نوک ظاہر ہوجائے تو نماز کو اس وقت تک مؤخر کرو جب تک وہ پورا ظاہر نہ ہوجائے اور جب سورج کی نوک غروب ہوجائے تو نماز کو اس وقت تک مؤخر کرو جب تک وہ غائب نہ ہوجاؤ۔

حسن فرماتے ہیں کہ اسلاف طلوع شمس کے وقت سورج بلند ہونے تک اور غروب ِ شمس کے وقت سورج غائب ہونے تک نماز کو مکروہ خیال فرماتے تھے۔

حضرت ابن مسعود فرماتے ہیں کہ میرے نزدیک سورج زرد ہوجانے کے بعد نماز پڑھنے سے دو سکے بہتر ہیں۔