مصنف ابن ابي شيبه

حضرت ابوہریرہ فرماتے ہیں کہ جب نبی صلی اللہ علیہ وآلہ وسلم نے فجر کی نماز میں ہاتھ اٹھائے تو یہ دعا کی : اے اللہ ! ولید بن ولید، سلمہ بن ہشام ، عیاش بن ابی ربیعہ اور مکہ کے کمزور لوگوں کو آزاد ی عطا فرما۔ اے اللہ ! قبیلہ مضر پر اپنی گرفت کو سخت فرما اور ان کے سالوں کو یوسف کی قوم کے سالوں جیسا بنادے۔

حضرت سعید بن زید سے روایت ہے کہ رسول اللہ صلی اللہ علیہ وآلہ وسلم نے بددعا فرمائی : اے اللہ ! رعل، زکوان ، عضل اور عصیہ پر لعنت فرما جنہوں نے اللہ اور اس کے رسول کی نافرمانی کی ہے۔

حضرت عبد الاعلیٰ فرماتے ہیں کہ حضرت ابو عبد الرحمن سلمی نے فجر کی نماز میں دعائے قنوت پڑھتے ہوئے قطری کے لئے بددعا کی۔

ابراہیم فرماتے ہیں کہ نماز میں لوگوں کے نام نہیں لئے جائیں گے۔

حضرت عبد الرحمن بن معقل فرماتے ہیں کہ میں نے حضرت علی رضی اللہ عنہ کے ساتھ فجر کی نماز پڑھی، انہوں نے اس میں دعائے قنوت پڑھی اور اس مں ں یہ کلمات کہے : اے اللہ ! معاویہ اور اس کے گروہ کو سنبھال لے، اے اللہ ! عمرو بن عاص اور اس کے گروہ کو سنبھال لے، اے اللہ ! ابو اعور اور اس کے گروہ کو سنبھال لے، اے اللہ ! عبد اللہ بن قیس اور اس کے گروہ کو سنبھال لے۔

حضرت محمد بن یحییٰ بن حبان فرماتے ہیں کہ نبی صلی اللہ علیہ وآلہ وسلم چالیس دن تک فجر کی نماز میں رکوع کے بعد دعائے قنوت پڑھتے رہے، آپ دعائے قنوت میں یہ کلمات کہتے تھے : اے اللہ ! ولید بن ولید، سلمہ بن ہشام ، عیاش بن ابی ربیعہ اور مکہ کے کمزور لوگوں کو آزاد ی عطا فرما جو کوئی ذریعہ نہیں رکھتے اور ان کے پاس نجات کا کوئی راستہ نہیں۔

حضرت خفاف بن ایماء بن رحضہ فرماتے ہیں کہ نبی صلی اللہ علیہ وآلہ وسلم نے ہمیں فجر کی نماز پڑھائی، جب آپ نے دوسری رکعت سے سر اٹھایا تو فرمایا کہ اللہ تعالیٰ نے لحیان، رعل، ذکوان اور عصیہ پر لعنت فرمائی جنہوں نے اللہ اور اس کے رسول کی نافرمانی کی۔ اللہ تعالیٰ قبیلہ اسلم کو سلامتی عطا فرمائے اور قبیلہ غفار کی مغفرت فرمائے۔ پھر سجدے میں گرگئے، جب آپ نے نماز مکمل کرلی تو لوگوں کی طرف متوجہ ہو کر فرمایا کہ اے لوگو ! یہ بات میں نے نہیں کی تھی بلکہ اللہ نے فرمائی ہے۔