مصنف ابن ابي شيبه

حضرت طارق بن شہاب کہتے ہیں کہ میں نے حضرت عمر کے پیچھے فجر کی نماز پڑھی، جب وہ قراءت سے فارغ ہوگئے تو انہوں نے تکبیر کہی اور پھر دعائے قنوت پڑھی، پھر تکبیر کہی پھر رکوع کیا۔

حضرت ابو عبدا لرحمن سلمی فرماتے ہیں کہ حضرت علی رضی اللہ عنہ نے فجر میں قنوت پڑھنے کے لئے تکبیر کہی ، پھر رکوع کرنے کے لئے تکبیر کہی۔

حضرت ابو جہم فرماتے ہیں کہ حضرت براء قنوت سے پہلے تکبیر کہا کرتے تھے۔

حضرت ابو جہم فرماتے ہیں کہ حضرت براء نے فجر میں قنوت پڑھی اس کے لئے انہوں نے قراءت سے فارغ ہونے کے بعد تکبیر کہی اور رکوع کے لئے بھی تکبیر کہی۔

حضرت ابو سنان فرماتے ہیں کہ حضرت ماہان فجر کی نماز میں قنوت سے پہلے تکبیر کہا کرتے تھے۔

حضرت عبد الاعلیٰ فرماتے ہیں کہ حضرت ابو عبدا لرحمن فجر کی نماز میں قنوت سے پہلے تکبیر کہا کرتے تھے اور رکوع سے پہلے بھی تکبیر کہتے تھے۔

حضرت زہیر کہتے ہیں کہ میں نے حضرت ابو اسحاق سے کہا کہ کیا آپ فجر کی نماز میں قنوت سے پہلے تکبیر کہتے ہیں ؟ انہوں نے فرمایا کہ ہاں۔

حضرت حارث فرماتے ہیں کہ حضرت علی رضی اللہ عنہ قنوت کو تکبیر سے شروع کیا کرتے تھے۔