مصنف ابن ابي شيبه

حضرت ابن عون فرماتے ہیں کہ میں نے حضرت قاسم سے اس شخص کے بارے میں سوال کیا جو سواری پر وتر پڑھے۔ انہوں نے فرمایا کہ لوگوں کا خیال یہ ہے کہ حضرت عمر زمین پر وتر پڑھا کرتے تھے۔

حضرت قاسم فرماتے ہیں کہ حضرت عمر زمین پر وتر پڑھا کرتے تھے۔

حضرت بکر فرماتے ہیں کہ حضرت ابن عمر رضی اللہ عنہما جب وتر پڑھنے لگتے تو زمین پر اتر کر وتر پڑھتے۔

ابراہیم فرماتے ہیں کہ اسلاف نفلی نمازیں اپنی سواریوں اور اپنے کجاو وں پر پڑھا کرتے تھے، خواہ ان کا رخ جس طرف بھی ہوتا۔ ا لبتہ فرض نمازیں اور وتر زمین پر اتر کر پڑھا کرتے تھے۔

حضرت ہشام بن عروہ فرماتے ہیں کہ حضرت عروہ اپنی سواری پر نماز پڑھا کرتے تھے خواہ اس کا رخ جس طرف بھی پھرجاتا۔ پھر جب وہ وتر پڑھنے لگتے تو زمین پر اتر کر نماز پڑھتے۔

حضرت ضحاک فرماتے ہیں کہ جو شخص وتر پڑھنے لگے تو اسے چاہئے کہ زمین پر اتر جائے۔

ابراہیم فرماتے ہیں کہ میں نے حسن سے سوال کیا کہ کیا میں اپنی سواری پر نماز پڑھ سکتا ہوں ؟ انہوں نے فرمایا کہ ہاں سواری پر نماز پڑھ لو۔ میں نے کہا کہ کیا میں اپنی سواری پر وتر پڑھ سکتا ہوں ؟ انہوں نے فرمایا کہ نہیں۔ حضرت ابن سیرین فرماتے ہیں کہ زمین پر وتر پڑھو۔