مصنف ابن ابي شيبه

حضرت یونس بن عبید فرماتے ہیں کہ حضرت ابن سیرین کچھ دن بےہوش رہے، ہوش میں آنے کے بعد انہوں نے نمازوں کی قضا نہیں کی۔

حضرت جو یبر فرماتے ہیں کہ حضرت ضحاک کچھ نمازوں کے وقت میں بےہوش رہے۔ جب انہیں ہوش آیا تو ان سے کہا گیا کہ آپ کی اتنی نمازیں فوت ہوگئی ہیں۔ انہوں نے فرمایا کہ میری کوئی نماز فوت نہیں ہوئی۔ اور آپ نے نمازوں کی قضا بھی نہیں کی۔

حسن فرماتے ہیں کہ بےہوشی کا شکار ہونے والا شخص روزوں کی قضا کرے گا لیکن نمازوں کی قضا نہیں کرے گا، جیسے حائضہ روزوں کی قضا کرتی ہے لیکن نمازوں کی قضا نہیں کرتی۔

حضرت عامر فرماتے ہیں کہ بےہوشی کا شکار ہونے والا شخص نمازوں کی قضا نہیں کرے گا۔ کیونکہ امہات المؤمنین ماہواری کے دنوں کی قضا نہیں کیا کرتی تھیں۔

حسن فرماتے ہیں کہ بےہوشی کا شکار ہونے والا شخص نمازوں کی قضا نہیں کرے گا۔ حضرت ابن سیرین کچھ دن بےہوش رہے لیکن ان دنوں کی قضا نہیں کی۔

حضرت ابن عمر رضی اللہ عنہما دو دن بےہوش رہے، لیکن آپ نے ان دنوں کی قضا نہیں کی۔

حضرت زہری فرماتے ہیں کہ بےہوشی کا شکار ہونے والا شخص نمازوں کی قضا نہیں کرے گا۔

حضرت وکیع فرماتے ہیں کچھ دن بےہوشی کا شکار ہونے والا شخص حائضہ کی طرح صرف اس دن کی قضا کرے گا جس دن اسے ہوش آیا۔ اگر اسے ایک دن سے کم بےہوشی رہی تو وہ اس دن کی نمازیں قضا کرے گا۔