مصنف ابن ابي شيبه

حضرت ابن عباس رضی اللہ عنہما فرماتے ہیں کہ فرمانِ باری تعالیٰ { أَقِمِ الصَّلاَۃ لِدُلُوکِ الشَّمْسِ } میں دلوک شمس سے مراد سائے کا جھکنا ہے اور فرمان باری تعالیٰ { وَاللَّیْلِ وَمَا وَسَقَ } میں وما وسق سے مراد وما جمع ہے۔

حضرت ابن عمر رضی اللہ عنہما فرماتے ہیں کہ دلوک شمس سے مراد نصفِ نہار کے بعد سورج کا مغرب کی طرف میلان ہے۔

حضرت ابن عباس رضی اللہ عنہما فرماتے ہیں کہ فرمانِ باری تعالیٰ { أَقِمِ الصَّلاَۃ لِدُلُوکِ الشَّمْسِ } میں دلوک شمس سے مراد اس کا غروب ہونا ہے۔

حضرت طاوس فرماتے ہیں کہ فرمانِ باری تعالیٰ { أَقِمِ الصَّلاَۃ لِدُلُوکِ الشَّمْسِ } میں دلوک شمس سے مراد مغرب سے پہلے اس کا جھکنا ہے۔

حضرت مجاہد فرماتے ہیں کہ میں اپنے مولی حضرت سائب کو لے کر چلتا تھا، وہ نابینا تھے۔ ایک دن انہوں نے مجھ سے پوچھا ” أَدَلَکَتِ الشَّمْسُ ؟ “ کیا سورج مائل ہوگیا ؟ میں نے بتایا جی ہاں۔ اس پر انہوں نے ظہر کی نماز ادا کی۔

حضرت اسود کہتے ہیں کہ میں نے حضرت عبد اللہ کے ساتھ ان کے گھر بیٹھا تھا۔ اتنے میں سورج غروب ہوگیا تو حضرت عبداللہ نے یہ آیت پڑھی { أَقِمِ الصَّلاَۃ لِدُلُوکِ الشَّمْسِ إِلَی غَسَقِ اللَّیْلِ } پھر فرمایا اس ذات کی قسم جس کے سوا کوئی معبود نہیں۔ اس سے مراد وہ وقت ہے جس میں روزہ دار روزہ افطار کرتا ہے اور اس نماز کا وقت ہوجاتا ہے۔

حضرت ابن عمر رضی اللہ عنہما فرماتے ہیں کہ دلوک شمس سے مراد سورج کا مغرب کی طرف میلان ہے۔

حضرت جعفر بن ابو مغیرہ فرماتے ہیں کہ دلوک شمس سے مراد سورج کا زوال ہے۔

حضرت شعبی فرماتے ہیں کہ دلوک شمس سے مراد سورج کا زوال ہے۔

حضرت مجاہد فرماتے ہیں کہ دلوک شمس سے مراد سورج کا زوال ہے اور غسق اللیل سے مراد سورج کا غروب ہے۔

حضرت عبد اللہ اور حضرت ابن عباس رضی اللہ عنہما فرماتے ہیں کہ دلوک شمس سے مراد سورج کا غروب کے وقت جھکنا ہے۔

حضرت علی رضی اللہ عنہ فرماتے ہیں کہ دلوک شمس سے مراد سورج کا غروب ہے۔