مصنف ابن ابي شيبه

حضرت راشد بن سعد کہتے ہیں کہ رسول اللہ صلی اللہ علیہ وآلہ وسلم کے صحابہ اپنی کمانیں لے کر نماز پڑھا کرتے تھے۔

حضرت عروہ بن زبیر سے منقول ہے کہ تلواریں مجاہدوں کی چادریں ہیں۔

ابراہیم فرماتے ہیں کہ اسلاف تلواروں کو چادروں کی طرح سمجھتے تھے۔

ابراہیم فرماتے ہیں کہ نماز میں تلوار چادر کی طرح ہے۔

حضرت سعید بن مسروق فرماتے ہیں کہ میں نے ابراہیم تیمی کو نماز پڑھتے دیکھا ان پر چادر کے بجائے صرف تلوار تھی۔

ابراہیم فرماتے ہیں کہ صحابہ کرام اس حال میں نماز پڑھتے تھے کہ ان پر ان کی تلواریں ہوتی تھیں جن پر مردار کی کھال کی نیام ہوا کرتی تھی۔

حسن فرماتے ہیں کہ تلواریں مجاہدین کی چادریں ہیں۔

حضرت حماد فرماتے ہیں کہ کمان چادر کی جگہ نہیں آسکتی۔

ابراہیم فرماتے ہیں کہ کمان چادر کے درجہ میں ہے۔

حضرت سلمہ بن اکوع نے نبی صلی اللہ علیہ وآلہ وسلم سے سوال کیا کہ کیا کمان اور تیروں کا تھیلا لے کر نماز پڑھنا ٹھیک ہے ؟ آپ نے فرمایا کہ کمان میں نماز پڑھ، البتہ تیروں کا تھیلا اتار دو ۔