مصنف ابن ابي شيبه

حضرت جابر بن سمرہ فرماتے ہیں کہ میں نے رسول اللہ صلی اللہ علیہ وآلہ وسلم کے ساتھ کئی مرتبہ عیدین کی نمازیں بغیر اذان اور بغیر اقامت کے پڑھی ہیں۔

حضرت جابر فرماتے ہیں کہ میں رسول اللہ صلی اللہ علیہ وآلہ وسلم کے ساتھ بغیر اذان اور بغیر اقامت کے عیدین کی نمازوں میں شریک ہوا ہوں۔

حضرت جابر فرماتے ہیں کہ حضور صلی اللہ علیہ وآلہ وسلم نے عید کی نماز بغیر اذان اور بغیر اقامت کے پڑھائی۔

حضرت ابن عباس رضی اللہ عنہما نے فرمایا کہ نبی صلی اللہ علیہ وآلہ وسلم نے لوگوں کو کثیر بن الصلت کے گھر کے پاس عید کی نماز پڑھائی جس میں خطبہ سے پہلے نماز پڑھائی۔ حضرت ابن عباس رضی اللہ عنہما نے اذان اور اقامت کا ذکر نہ کیا۔

حضرت سماک کہتے ہیں کہ میں نے مغیرہ بن شعبہ، ضحاک اور زیاد کو دیکھا کہ وہ عید الفطر اور عید الاضحی کی نمازیں بغیر اذان اور بغیر اقامت کے پڑھاتے تھے۔

حضرت سماک کہتے ہیں کہ حضرت مغیرہ نے عید کی نماز بغیر اذان اور بغیر اقامت کے پڑھائی۔

حضرت مکحول فرماتے ہیں کہ عیدین میں اذان اور اقامت نہیں ہیں۔

حضرت عکرمہ فرماتے ہیں کہ عیدین میں اذان اور اقامت نہیں ہیں۔

حضرت عطاء فرماتے ہیں کہ حضرت ابن الزبیر نے حضرت ابن عباس رضی اللہ عنہما سے عیدین کی نماز میں اذان و اقامت کے بارے میں پوچھا (اس وقت دونوں حضرات کے تعلقات ٹھیک تھے) حضرت ابن عباس رضی اللہ عنہما نے فرمایا کہ عیدین میں نہ اذان دو نہ اقامت کہو۔ جب دونوں حضرات کا باہمی تعلق خراب ہوگیا تو حضرت ابن الزبیر عیدین میں اذان اور اقامت کہا کرتے تھے۔

محمد فرماتے ہیں کہ عید کی نماز میں اذان کہنا بدعت ہے۔

حضرت سعید بن مسیب کہتے ہیں کہ عید کی نماز میں اذان سب سے پہلے حضرت معاویہ نے شروع کی۔

ابراہیم فرماتے ہیں کہ عیدین کی نمازوں میں نہ تو اذان و اقامت ہیں اور نہ ہی امام کے پیچھے قرائت۔

حضرت عیسیٰ بن مغیرہ کہتے ہیں کہ میں نے ابو وائل سے سوال کیا کہ کیا اسلاف عید الاضحی اور عید الفطر میں اذان دیا کرتے تھے ؟ انہوں نے کہا نہیں۔

حضرت عامر اور حضرت حکم فرماتے ہیں کہ عید الاضحی اور عید الفطر میں اذان دینا بدعت ہے۔

حضرت حصین فرماتے ہیں کہ عید کی نماز میں سب سے پہلے زیاد نے اذان دی۔

حضرت براء فرماتے ہیں کہ نبی صلی اللہ علیہ وآلہ وسلم نے بغیر اذان اور بغیر اقامت کے عید کی نماز پڑھائی۔

حضرت علی رضی اللہ عنہ نے بغیر اذان اور بغیر اقامت کے عید کی نماز پڑھائی۔