مصنف ابن ابي شيبه

حضرت عبید اللہ بن ابی رافع فرماتے ہیں کہ مروان نے حضرت ابوہریرہ کو مدینہ میں اپنا نائب بنایا اور خود مکہ چلا گیا۔ حضرت ابوہریرہ نے ہمیں جمعہ کی نماز پڑھائی تو پہلی رکعت میں سورة الجمعہ اور دوسری رکعت میں سورة المنافقین کی تلاوت فرمائی۔ عبید اللہ کہتے ہیں کہ میں نماز پڑھنے کے بعد حضرت ابوہریرہ سے ملا اور میں نے ان سے کہا کہ آپ نے ان دو سورتوں کی تلاوت کی ہے جنہیں حضرت علی رضی اللہ عنہ کوفہ میں پڑھا کرتے تھے۔ حضرت ابوہریرہ نے فرمایا کہ میں نے نبی صلی اللہ علیہ وآلہ وسلم کو بھی انہی سورتوں کی تلاوت کرتے سنا ہے۔

حضرت ابن عباس رضی اللہ عنہما فرماتے ہیں کہ نبی صلی اللہ علیہ وآلہ وسلم جمعہ کی نماز میں سورة الجمعہ اور سورة المنافقین کی تلاوت فرمایا کرتے تھے۔

حضرت سمرہ فرماتے ہیں کہ نبی صلی اللہ علیہ وآلہ وسلم جمعہ کی نماز میں سورة الاعلیٰ اور سورة الغاشیہ کی تلاوت فرمایا کرتے تھے۔

حضرت حکم مدینہ کے کچھ لوگوں جن میں حضرت ابو جعفر بھی شامل ہیں سے روایت کرتے ہیں کہ جمعہ کے دن سورة الجمعۃ اور سورة المنافقین کی تلاوت کی جاتی تھی۔ سورة الجمعہ میں اہل ایمان کو خوشخبری دی جاتی اور انہیں حوصلہ دیا جاتا اور سورة منافقین میں منافقوں کو ڈرایا جاتا اور ان کی حوصلہ شکنی کی جاتی تھی۔

حضرت عمیر بن سعد کہتے ہیں کہ میں نے حضرت ابو موسیٰ کے پیچھے جمعہ کی نماز پڑھی، انہوں نے اس میں سورة الجمعہ اور سورة المنافقین کی تلاوت کی۔

حضرت محمد بن عجلان کہتے ہیں کہ میں نے حضرت عمر بن عبد العزیز اور حضرت ابوبکر بن عمرو کے پیچھے جمعہ کی نماز پڑھی۔ ان دونوں نے پہلی رکعت میں سورة الجمعہ اور دوسری رکعت میں سورة الاعلیٰ کی تلاوت فرمائی۔

حسن جمعہ کی نماز کی قراءت کے بارے میں فرماتے ہیں کہ امام جہاں سے چاہے پڑھ لے۔