مصنف ابن ابي شيبه

حضرت عوف بن حصیرہ فرماتے ہیں کہ جمعہ کے دن کی ساعت قبولیت امام کے نکلنے سے لے کر نماز ادا کرنے تک ہے۔

حضرت عبد اللہ بن سلام فرماتے ہیں کہ جمعہ کے دن کی ساعت قبولیت عصر سے مغرب تک ہے۔

حضرت ابن عباس رضی اللہ عنہما اور حضرت ابوہریرہ فرماتے ہیں کہ جمعہ کے دن کی ساعت قبولیت عصر سے مغرب تک ہے۔

حضرت ابوہریرہ سے یونہی منقول ہے۔

حضرت ابو بردہ کہتے ہیں کہ میں حضرت ابن عمر رضی اللہ عنہما کے پاس بیٹھا تھا کہ کسی نے ان سے جمعہ کے دن کی ساعت قبولیت کے بارے میں سوال کیا۔ میں نے کہا کہ یہ وہی وقت ہے جس میں اللہ تعالیٰ نے نماز کو اختیار فرمایا ہے۔ یہ سن کر حضرت ابن عمر رضی اللہ عنہما نے میرے سر پر ہاتھ پھیرا، مجھے برکت کی دعا دی اور میری بات کو پسند فرمایا۔

حضرت ابو بردہ فرماتے ہیں کہ جمعہ کے دن کی ساعت قبولیت امام کے نکلنے کا وقت ہے۔

حضرت ابو امامہ فرماتے ہیں کہ جمعہ کے دن کی ساعت قبولیت ان اوقات میں سے اس وقت ہے جب مؤذن اذان دیتا ہے، جب امام منبر پر بیٹھتا ہے، جب اقامت ہوتی ہے۔

حسن فرماتے ہیں کہ جمعہ کے دن کی ساعت قبولیت نماز کے وقت میں زوال شمس کے بعد ہے۔

حضرت شعبی فرماتے ہیں کہ جمعہ کے دن کی ساعت قبولیت بیع کے حرام ہونے سے حلال ہونے کے درمیان ہے۔

حضرت مجاہد فرماتے ہیں کہ جمعہ کے دن کی ساعت قبولیت عصر کے بعد کا وقت ہے۔

حضرت سلامہ بنت افعی کہتی ہیں کہ میں کچھ عورتوں کے ساتھ حضرت عائشہ رضی اللہ عنہا کے ساتھ تھی، وہ فرما رہی تھیں کہ جمعہ کا دن یوم عرفہ کی طرح ہے، اس میں ایک گھڑی ایسی ہے جس میں رحمت کے دروازے کھول دیئے جاتے ہیں۔ ہم نے سوال کیا کہ وہ کون سی گھڑی ہے ؟ انہوں نے فرمایا کہ جب مؤذن اذان دیتا ہے۔

حضرت عائشہ رضی اللہ عنہا فرماتی ہیں کہ جمعہ کا دن یوم عرفہ کی طرح ہے، اس میں ایک گھڑی ایسی ہے جس میں رحمت کے دروازے کھول دیئے جاتے ہیں۔ اس میں ایک گھڑی ایسی ہے کہ اس میں بندہ اللہ تعالیٰ سے جس چیز کا بھی سوال کرتا ہے وہ اسے عطا کردی جاتی ہے۔ حضرت عائشہ رضی اللہ عنہا سے پوچھا گیا کہ وہ کون سی گھڑی ہے ؟ انہوں نے فرمایا جب مؤذن فجر کی اذان دیتا ہے۔

حضرت طاوس فرماتے ہیں کہ جمعہ کے دن کی ساعت قبولیت عصر کے بعد کا وقت ہے۔