مصنف ابن ابي شيبه

حسن فرماتے ہیں کہ جمعہ کی اذان وہ ہے جو امام کے نکلنے کے وقت دی جائے، اگر کوئی اذان اس سے پہلے ہو تو وہ بدعت ہے۔

حضرت ابن عمر رضی اللہ عنہما فرماتے ہیں کہ جمعہ کی اذان وہ ہے جو امام کے نکلنے کے وقت دی جائے، اگر کوئی اذان اس سے پہلے ہو تو وہ بدعت ہے۔

حضرت ابن عمر رضی اللہ عنہما فرماتے ہیں کہ جمعہ کے دن پہلی اذان بدعت ہے۔

حضرت زہری فرماتے ہیں کہ جمعہ کے دن پہلی اذان کا آغاز حضرت عثمان نے بازار والوں کو اطلاع دینے کے لئے کیا۔

حسن فرماتے ہیں کہ نبی صلی اللہ علیہ وآلہ وسلم کے زمانے میں اذان اس وقت ہوتی تھی جب نبی صلی اللہ علیہ وآلہ وسلم جمعہ کے لئے تشریف لاتے، جب آپ خطبہ سے فارغ ہوتے تو اقامت کہی جاتی تھی۔

حضرت زہری فرماتے ہیں کہ جمعہ کی اذان امام کے نکلنے کے وقت دی جاتی تھی۔ پھر حضرت عثمان امیر المؤمنین نے منارے پر ایک تیسری اذان کا آغاز کیا تاکہ لوگ جمع ہوجائیں۔

حضرت ہشام بن غاز کہتے ہیں کہ میں نے نافع مولی ابن عمر رضی اللہ عنہما سے جمعہ کی اذان اول کے بارے میں سوال کیا تو انہوں نے فرمایا کہ حضرت ابن عمر رضی اللہ عنہما نے فرمایا تھا کہ یہ بدعت ہے۔