مصنف ابن ابي شيبه

حضرت کلثوم بن جبر فرماتے ہیں کہ حضرت مسلم بن یسار نے مجھ سے فرمایا کہ جمعہ کے دن جب تم دیکھو کہ دن آدھا ہوگیا ہے تو کوئی چیز نہ بیچو۔

حضرت ابن ابی ذئب فرماتے ہیں کہ حضرت عمر بن عبد العزیز جمعہ کی اذان کے بعد لوگوں کو خریدوفروخت سے منع کرتے تھے۔

حضرت ضحاک فرماتے ہیں کہ جمعہ کے دن جب سورج زائل ہوجائے تو خریدو فروخت حرام ہوجاتی ہے جب تک نماز ادا نہ کرلی جائے۔

حضرت عطاء اور حسن بھی یونہی فرماتے ہیں۔

حضرت ابو مقدام مولیٰ قریش کہتے ہیں کہ ایک مرتبہ حضرت قاسم بن محمد نے جمعہ کے دن ایک آدمی سے کوئی چیز خریدی۔ پھر بعد میں اس سے ملاقات ہوئی تو اسے فرمایا کہ میری اس بیع کو ختم کردو کیونکہ میں نے انجانے میں وہ چیز زوال شمس کے بعد خریدی تھی۔

حضرت مجاہد فرماتے ہیں کہ جس شخص نے جمعہ کے دن زوال شمس کے بعد بیع کی اس کی بیع مردود ہے۔ کیونکہ اللہ تعالیٰ نے جمعہ کی اذان کے بعد بیع سے منع کیا ہے۔

حضرت برد کہتے ہیں کہ میں نے حضرت زہری سے عرض کیا کہ جمعہ کے دن خریدو فروخت کب ممنوع ہوتی ہیں ؟ انہوں نے فرمایا کہ پہلے اذان امام کے نکلنے کے وقت ہوتی تھی۔ پھر حضرت عثمان نے ایک تیسری اذان کا اضافہ کیا، جس کے بعد لوگوں کو جمع کرنے کے لئے منارہ پر اذان دی جانے لگی تاکہ لوگ جمع ہوجائیں۔ میرے خیال کے مطابق اس وقت خریدو فروخت کو ترک کردینا چاہئے۔

حضرت میمون فرماتے ہیں کہ اہل مدینہ کا معمول یہ تھا کہ جب جمعہ کے دن مؤذن اذان دے دیتا تو لوگ بازاروں میں اعلان کیا کرتے تھے کہ بیع حرام ہوگئی، بیع حرام ہوگئی۔

حضرت شعبی جمعہ کی ساعت قبولیت کے بارے میں فرماتے ہیں کہ وہ بیع کے حرام ہونے سے حلال ہونے کا درمیانی وقت ہے۔