مصنف ابن ابي شيبه

حضرت یزید بن شریک تیمی کہتے ہیں کہ میں نے حضرت عمر بن خطاب سے امام کے پیچھے قراءت کے بارے میں سوال کیا تو انہوں نے فرمایا کہ امام کے پیچھے قراءت کرو۔ میں نے عرض کیا اگر آپ کے پیچھے نماز پڑھوں پھر بھی ؟ انہوں نے فرمایا میرے پیچھے نماز پڑھو پھر بھی۔ میں نے کہا اگر آپ قراءت کریں پھر بھی ؟ انہوں نے فرمایا ہاں، پھر بھی۔

حضرت مجاہد فرماتے ہیں کہ میں نے حضرت عبدا للہ بن عمرو بن عاص کو ظہر کی نماز میں امام کے پیچھے سورة مریم کی تلاوت کرتے سنا ہے۔

حضرت حصین کہتے ہیں کہ میں نے حضرت عبیداللہ بن عبداللہ بن عتبہ کے ساتھ نماز پڑھی۔ میں نے انہیں امام کے پیچھے قراءت کرتے ہوئے سنا۔ اس کے بعد میری ملاقات حضرت مجاہد سے ہوئی اور میں نے ان سے اس بات کا ذکر کیا تو انہوں نے فرمایا کہ میں نے حضرت عبدا للہ بن عمرو کو امام کے پیچھے قراءت کرتے سنا ہے۔

حضرت ھذیل فرماتے ہیں کہ حضرت عبدا للہ بن مسعودنے عصر کی نماز میں امام کے پیچھے پہلی دو رکعتوں میں سورة الفاتحہ اور ایک سورت کی تلاوت کی۔

حضرت ابو مریم اسدی کہتے ہیں کہ میں نے حضرت عبداللہ کے ساتھ نماز پڑھی۔ میں نے سنا کہ وہ ایک امیر کے پیچھے ظہر اور عصر کی نماز میں قراءت کر رہے تھے۔

حضرت علی رضی اللہ عنہ فرمایا کرتے تھے کہ ظہر اور عصر میں ا مام کے پیچھے ہر رکعت میں سورۃ ا لفاتحہ اور ایک سورت کی تلاوت کرو۔

حضرت حکم اور حضرت حماد فرماتے ہیں کہ حضرت علیامام کے پیچھے قراءت کا حکم دیا کرتے تھے۔

حضرت ابن عباس رضی اللہ عنہما فرماتے ہیں کہ امام کے پیچھے سورة الفاتحہ کی تلاوت ضرور کرو خواہ وہ اونچی آواز سے قراءت کررہا ہو یا آہستہ آواز سے۔

حضرت عبادہ بن صامت فرماتے ہیں کہ حضور صلی اللہ علیہ وآلہ وسلم نے ہمیں عشاء کی نماز پڑھائی، نماز میں آپ کو قراءت بوجھل محسوس ہورہی تھی۔ جب آپ نماز سے فارغ ہوئے تو آپ نے فرمایا کہ شاید تم اپنے امام کے پیچھے قراءت کررہے تھے ؟ ہم نے کہا جی ہاں، یا رسول اللہ ! ہم ایسا ہی کررہے تھے۔ آپ صلی اللہ علیہ وآلہ وسلم نے فرمایا کہ تم امام کے پیچھے صرف سورة الفاتحہ کی تلاوت کیا کرو، کیونکہ اس کے بغیر نماز نہیں ہوتی۔

حضرت ابو قلابہ فرماتے ہیں کہ حضور صلی اللہ علیہ وآلہ وسلم نے اپنے ساتھیوں سے فرمایا کہ کیا تم اپنے امام کے پیچھے قراءت کرتے ہو ؟ بعض نے کہا جی ہاں اور بعض نے انکار کیا تو حضور صلی اللہ علیہ وآلہ وسلم نے فرمایا کہ اگر تم نے قراءت کرنی ہی ہو تو اپنے دل میں صرف سور ۃ الفاتحہ کی تلاوت کرلیا کرو۔

ایک اور سند سے یونہی منقول ہے۔

حضرت معاذ فرماتے ہیں کہ اگر ایک آدمی امام کے پیچھے نماز پڑھ رہا ہو، اب اگر وہ امام کی قراءت سن رہا ہے تو سورة الاخلاص، سورة الناس اور سورة الفلق کی تلاوت کرلے۔ اور اگر امام کی قراءت نہیں سن رہا تو خود قراءت کرلے، لیکن اپنے دائیں بائیں کھڑے لوگوں کو تکلیف نہ دے۔

حضرت شعبی فرماتے ہیں کہ اس بارے میں تمہیں اختیار ہے، چاہو تو قراءت کرلو اور چاہو تو امام کی قراءت سے کام چلا لو۔

حضرت سعید بن جبیر فرماتے ہیں کہ اگر تم امام کی قراءت نہیں سن رہے تو اگر چاہو تو اپنے دل میں قراءت کرلو۔

حسن فرمایا کرتے تھے کہ امام کے پیچھے ہر رکعت میں اپنے دل میں سورۃ ا لفاتحہ کی تلاوت کرو۔

حضرت شعبی فرمایا کرتے تھے کہ امام کے پیچھے ظہر اور عصر میں سورة الفاتحہ اور کوئی ایک سورة پڑھو اور آخری دو نوں رکعتوں میں صرف سورة الفاتحہ پڑھو۔

حضرت شعبی فرماتے ہیں کہ امام کے پیچھے قراءت کرنا نماز کا نور ہے۔

حضرت سعید بن مسیب فرماتے ہیں کہ امام اور مقتدی ظہر اور عصر میں سورۃ ا لفاتحہ کی قراءت کریں گے۔

حضرت حکم فرماتے ہیں کہ سری نمازوں میں امام کے پیچھے پہلی دو رکعتوں میں سورۃ ا لفاتحہ اور کوئی ایک سورت اور دوسری دو رکعتوں میں صرف سورة الفاتحہ کی تلاوت کرو۔

حضرت عروہ فرماتے ہیں کہ جہری نمازوں میں خاموش رہو اور سری نمازوں میں قراءت کرو۔

حضرت یحییٰ بن ابی اسحاق فرماتے ہیں کہ میں نے مغرب کی نماز حکم بن ایوب کے پیچھے پڑھی۔ ابن اسامہ کے پہلو میں ابو ملیح کھڑے تھے۔ میں نے ابو ملیح کو سنا کہ سورة الفاتحہ پڑھ رہے تھے۔ جب امام نے سلام پھیرا تو میں نے ابو ملیح سے پوچھا کہ تم امام کے پیچھے قراءت کررہے تھے، حالانکہ امام بھی قراءت کررہے تھے ؟ انہوں نے کہا کہ تم نے کچھ سنا ؟ میں نے کہا ہاں۔ انہوں نے فرمایا کہ ہاں میں قراءت کررہا تھا۔

حضرت انس قراءت خلف الامام کے بارے میں فرماتے ہیں کہ یہ تسبیح ہے۔

حضرت محمودبن ربیع کہتے ہیں کہ میں نے حضرت عبادہ بن صامت کے ساتھ نماز پڑھی۔ انہوں نے نماز میں سورة الفاتحہ کی تلاوت کی۔ نماز کے بعد میں نے عر ض کیا کہ اے ابو الولید ! میں نے آپ کو سورة الفاتحہ کی تلاوت کرتے سنا ہے ؟ انہوں نے کہا ہاں ، اس کے بغیر نماز نہیں ہوتی۔

حضرت ابو مجلز فرماتے ہیں کہ اگر تم امام کے پیچھے قراءت کرو تو اچھی بات ہے اور اگر نہ کرو تو تمہارے لئے امام کی قرائت کافی ہے۔

حضرت ابن عباس رضی اللہ عنہما فرماتے ہیں کہ امام کے پیچھے سورة الفاتحہ کی تلاوت کرو۔

حضرت مالک بن مغول فرماتے ہیں کہ شعبی امام کے پیچھے خوبصورت قراءت کیا کرتے تھے۔

حضرت قاسم فرماتے ہیں کہ میں اس بات کو پسند کرتا ہوں کہ ظہر اور عصر میں اپنے آپ کو مشغول رکھوں۔

حضرت ابو السائب کہتے ہیں کہ میں نے حضرت ابوہریرہ سے عرض کیا کہ میں امام کے پیچھے کیا کروں ؟ انہوں نے میرا بازو کھینچا اور کہا اے فارسی ! اپنے دل میں سورة الفاتحہ کی تلاوت کرو۔