مصنف ابن ابي شيبه

حضرت براء بن عازب فرماتے ہیں کہ میں نے نبی کریم صلی اللہ علیہ وآلہ وسلم کو عشاء کی نماز میں سورة التین کی تلاوت کی ہے۔

حضرت عبد الرحمن بن یزید فرماتے ہیں کہ حضرت عبد اللہ نے ہمیں عشاء کی نماز پڑھائی، جس میں انہوں نے سورة الانفال کی تلاوت کی ، جب آپ { فَاعْلَمُوا أَنَّ اللَّہَ مَوْلاَکُمْ نِعْمَ الْمَوْلَی وَنِعْمَ النَّصِیرُ } پر پہنچے تو انہوں نے رکوع کیا، پھر اٹھے اور دوسری رکعت میں کسی اور سورت کی تلاوت فرمائی۔

ایک اور سند سے یونہی منقول ہے۔

حضرت زرارہ بن اوفی کہتے ہیں کہ حضرت ابو موسیٰ نے مجھے حضرت عمرکا خط پڑھایا جس میں لکھا تھا کہ لوگوں کو عشاء کی نماز میں وسط مفصل میں سے پڑھایا کرو۔

حضرت مسروق بن اجدع فرماتے ہیں کہ حضرت عثمان نے عشاء کی نماز میں سورة النجم پڑھی، پھر سجدہ کیا اور اگلی رکعت میں سورة التین کی تلاوت کی۔

حضرت ہلال فرماتے ہیں کہ حضرت ابوہریرہ نے عشاء کی نماز میں سورة العادیات کی تلاوت کی۔

حضرت نافع فرماتے ہیں کہ عشاء کی نماز میں میں سورة محمد اور سورة الفتح کی تلاوت فرماتے تھے۔

حضرت طاوس عشاء کی نماز میں سورة تنزیل السجدۃ کی تلاوت کیا کرتے تھے، پھر رکوع کرتے۔

حضرت ابو رافع فرماتے ہیں کہ میں نے حضرت عمر کے ساتھ عشاء کی نماز پڑھی، انہوں نے اس میں سورة الانشقاق کی تلاوت کی۔

حضرت ضحاک بن عثمان کہتے ہیں کہ میں نے حضرت عمر بن عبدا لعزیز کو عشاء کی نماز میں وسط مفصل کی تلاوت کرتے سنا ہے۔