مصنف ابن ابي شيبه

حضرت عبادہ بن صامت سے روایت ہے کہ رسول اللہ صلی اللہ علیہ وآلہ وسلم نے ارشاد فرمایا کہ جس شخص نے سورة الفاتحہ نہ پڑھی اس کی نماز نہیں ہوئی۔

حضرت ابوہریرہ سے روایت ہے کہ رسول اللہ صلی اللہ علیہ وآلہ وسلم نے ارشاد فرمایا کہ جس شخص نے نماز پڑھی اور اس میں سورة الفاتحہ نہ پڑھی تو اس کی نماز ناقص ہے، ناقص ہے، ناقص ہے۔

حضرت عائشہ رضی اللہ عنہا سے روایت ہے کہ رسول اللہ صلی اللہ علیہ وآلہ وسلم نے ارشاد فرمایا کہ ہر وہ نماز جس میں سورة الفاتحہ نہ پڑھی جائے وہ ناقص ہے۔

حضرت جابر بن عبد اللہ رضی اللہ عنہ فرماتے ہیں کہ جس شخص نے ہر رکعت میں سورة الفاتحہ نہ پڑھی اس نے گویا نماز ہی نہیں پڑھی۔ البتہ امام کے پیچھے پڑھنا ضروری نہیں۔

حضرت عمران بن حصین فرماتے ہیں کہ وہ نماز جائز نہیں جس میں سورة الفاتحہ اور اس سے زیادہ دو آیات نہ پڑھی جائیں۔

حضرت ابو سعید فرماتے ہیں کہ ہر نماز میں قرآن مجید کی تلاوت ہے، اور وہ سورة الفاتحہ یا اس سے کچھ زائد ہے۔

حضرت عمر فرماتے ہیں کہ وہ نماز جائز نہیں جس میں سورة الفاتحہ اور اس زیادہ دو آیات نہ پڑھی جائیں۔

حضرت عبد اللہ بن حارث کہتے ہیں کہ میں کچھ انصاری صحابہ کے ساتھ بیٹھا تھا۔ انہوں نے نماز کا ذکر کیا اور کہا کہ قراءت کے بغیر نماز نہیں ہوتی خواہ آدمی سورة الفاتحہ کی ہی تلاوت کرلے لیکن کرنی ہوگی۔ راوی حضرت خالد کہتے ہیں کہ میں نے عبد اللہ بن حارث سے کہا کہ کیا آپ ان میں سے کسی کا نام بتاسکتے ہیں ؟ انہوں نے فرمایا ہاں، خوات بن جبیر۔

حضرت مجاہد فرماتے ہیں کہ جس رکعت میں سورة الفاتحہ نہ پڑھی گئی اس رکعت کو لوٹایا جائے گا۔

حضرت محمد بن حکم فرماتے ہیں کہ حضرت ابو وائل نے سورة الفاتحہ اور ایک آیت کی تلاوت کی، پھر رکوع کیا۔

حضرت عطاء فرماتے ہیں کہ حضرت ابوہریرہ نے فرمایا کہ سورة الفاتحہ کافی ہے۔ میں بعد میں ان سے ملا اور میں نے پوچھا کیا فرض میں ؟ انہوں نے کہا ہاں۔

ابراہیم فرماتے ہیں کہ فرض اور غیرفرض دونوں میں سورة الفاتحہ کافی ہے۔

حضرت ابو العالیہ براء کہتے ہیں کہ میں نے حضرت ابن عمر رضی اللہ عنہما سے کہا کہ کیا میں ہر رکعت میں قراءت کروں ؟ انہوں نے فرمایا کہ مجھے اس گھر کے رب سے شرم آتی ہے کہ میں ہر رکعت میں سورة الفاتحہ اور اس کے بعد جو آسان لگے اس کی تلاوت نہ کروں۔ وہ کہتے ہیں کہ میں نے حضرت ابن عباس رضی اللہ عنہما سے سوال کیا تو انہوں نے فرمایا کہ وہ تمہاری مرضی ہے، چاہو تو اس سے کم تلاوت کرو اور چاہو تو اس سے زیادہ کرلو۔

حضرت ولید بن یحییٰ کہتے ہیں کہ حضرت جابر بن زید نے { مُدْہَامَّتَانِ } کہا اور رکوع کرلیا۔

حضرت ابو سعید خدری سے روایت ہے کہ رسول اللہ صلی اللہ علیہ وآلہ وسلم نے ارشاد فرمایا کہ اس شخص کی نماز نہیں ہوئی جس نے فرض اور غیر فرض میں سورة الفاتحہ اور اس کے ساتھ کوئی دوسری سورت نہ پڑھی۔

حضرت جابر فرماتے ہیں کہ ہم یہ بیان کیا کرتے تھے کہ جو شخص سورة الفاتحہ اور اس سے کچھ زیادہ نہ پڑھے اس کی نماز نہیں ہوتی۔

حضرت مجاہد فرماتے ہیں کہ نفل نماز میں سورة الفاتحہ کا پڑھنا کافی ہے۔