مصنف ابن ابي شيبه

حضرت سعد فرماتے ہیں کہ رسول اللہ صلی اللہ علیہ وآلہ وسلم اپنے دائیں طرف سلام پھیرتے تھے اور بائیں طرف بھی سلام پھیرتے تھے یہاں تک کہ آپ کے رخسار کی سفیدی نظر آنے لگتی۔

حضرت وائل حضرمی کہتے ہیں کہ میں نے نبی کریم صلی اللہ علیہ وآلہ وسلم کے ساتھ نماز پڑھی، آپ اوپر اٹھتے وقت اور نیچے جاتے وقت تکبیر کہتے تھے اور تکبیر کے وقت ہاتھ اٹھاتے تھے اور دائیں جانب اور بائیں جانب سلام پھیرتے تھے۔ حضرت شعبہ فرماتے ہیں کہ مجھ سے ابان بن تغلب نے بیان کیا کہ حدیث میں یہ بھی ہے کہ حضور صلی اللہ علیہ وآلہ وسلم کے چہرہ مبارک کی سفیدی نظر آنے لگتی تھی۔ میں نے عمرو سے کہا کہ حدیث میں یہ بھی ہے کہ یہاں تک کہ حضور صلی اللہ علیہ وآلہ وسلم کے چہرہ مبارک کی سفیدی نظر آنے لگتی تھی یا اس سے ملتا جلتا کوئی جملہ ہے۔

حضرت عبد اللہ فرماتے ہیں کہ رسول اللہ صلی اللہ علیہ وآلہ وسلم دائیں طرف سلام پھیرتے یہاں تک کہ آپ کے رخسار مبارک کی سفیدی نظر آنے لگتی اور آپ السَّلاَمُ عَلَیْکُمْ وَرَحْمَۃُ اللہِ کہتے اسی طرح بائیں طرف بھی سلام پھیرتے۔

حضرت عبد اللہ فرماتے ہیں کہ نبی کریم صلی اللہ علیہ وآلہ وسلم نماز میں دائیں اور بائیں جانب سلام پھیرتے یہاں تک کہ آپ کے چہرے مبارک کی سفیدی نظر آنے لگتی اور آپ دونوں جانب السَّلاَمُ عَلَیْکُمْ وَرَحْمَۃُ اللہِ کہتے۔

حضرت براء کہتے ہیں کہ نبی کریم صلی اللہ علیہ وآلہ وسلم دائیں اور بائیں جانب سلام پھیرتے اور السَّلاَمُ عَلَیْکُمْ وَرَحْمَۃُ اللہِ کہتے یہاں تک کہ آپ کے رخسار مبارک کی سفیدی نظر آنے لگتی۔

حضرت عبد اللہ فرماتے ہیں کہ حضور صلی اللہ علیہ وآلہ وسلم ، حضرت ابوبکر اور حضرت عمر دائیں اور بائیں جانب سلام پھیرا کرتے تھے۔

حضرت وائل بن حجر کہتے ہیں کہ میں نے نبی کریم صلی اللہ علیہ وآلہ وسلم کے پیچھے نماز پڑھی، جب آپ نے سورة فاتحہ پڑھی تو اونچی آواز سے آمین کہا اور نماز کے آخر میں دائیں اور بائیں جانب سلام پھیرا یہاں تک کہ آپ کے رخسار مبارک کی سفیدی نظر آنے لگی۔

حضرت حسن بن عمرو کہتے ہیں کہ حضرت شقیق کے پاس سلام پھیرنے کا ذکر کیا گیا تو انہوں نے فرمایا کہ میں نے حضرت عمر اور حضرت عبد اللہ کے پیچھے نماز پڑھی ہے وہ دونوں سلام پھیرتے وقت یوں کہا کرتے تھے : السَّلاَمُ عَلَیْکُمْ وَرَحْمَۃُ اللہِ ، السَّلاَمُ عَلَیْکُمْ وَرَحْمَۃُ اللہِ ۔

حضرت حارثہ بن مضرب کہتے ہیں کہ میں نے حضرت عمار کے پیچھے نماز پڑھی انہوں نے اپنے دائیں اور بائیں جانب سلام پھیرا اور یوں کہا السَّلاَمُ عَلَیْکُمْ وَرَحْمَۃُ اللہِ ۔

حضرت عبد اللہ فرماتے ہیں کہ اس وقت بھی وہ منظر میرے سامنے ہے کہ میں سلام پھیرتے ہوئے رسول اللہ صلی اللہ علیہ وآلہ وسلم کے رخسار مبارک کو دیکھ رہا ہوں اور آپ زبان سے کہہ رہے تھے : السَّلاَمُ عَلَیْکُمْ وَرَحْمَۃُ اللہِ ، السَّلاَمُ عَلَیْکُمْ وَرَحْمَۃُ اللہِ ۔

حضرت شقیق بن سلمہ کہتے ہیں کہ میں نے حضرت علی رضی اللہ عنہ کے پیچھے نماز پڑھی، انہوں نے دائیں اور بائیں جانب سلام پھیرا اور کہا : السَّلاَمُ عَلَیْکُمْ وَرَحْمَۃُ اللہِ ، السَّلاَمُ عَلَیْکُمْ وَرَحْمَۃُ اللہِ ۔

حضرت ابورزین کہتے ہیں کہ حضرت علینے نماز میں دائیں اور بائیں جانب سلام پھیرا اور بائیں جانب کا سلام ذرا ہلکی آواز سے تھا۔

حضرت ابراہیم بن سوید کہتے ہیں کہ حضرت علقمہ دائیں جانب سلام پھیرتے اور السَّلاَمُ عَلَیْکُمْ وَرَحْمَۃُ اللہِ کہتے اور پھر بائیں جانب سلام پھیرتے اور السَّلاَمُ عَلَیْکُمْ وَرَحْمَۃُ اللہِ کہتے۔ اور حضرت اسود دائیں جانب سلام پھیرتے تو کہتے : السَّلاَمُ عَلَیْکُمْ وَرَحْمَۃُ اللہِ وَبَرَکَاتُہُ اور بائیں جانب سلام پھیرتے تو یہ کہتے : السَّلاَمُ عَلَیْکُمْ وَرَحْمَۃُ اللہِ وَبَرَکَاتُہُ

حضرت خیثمہ نے سلام پھیرتے ہوئے کہا : السَّلاَمُ عَلَیْکُمْ وَرَحْمَۃُ اللہِ ، السَّلاَمُ عَلَیْکُمْ وَرَحْمَۃُ اللہِ ۔

حضرت منصور کہتے ہیں کہ ابراہیم نے سلام پھیرتے ہوئے کہا : السَّلاَمُ عَلَیْکُمْ وَرَحْمَۃُ اللہِ ، السَّلاَمُ عَلَیْکُمْ وَرَحْمَۃُ اللہِ ۔

حضرت عبد الاعلیٰ فرماتے ہیں کہ حضرت عبد اللہ نے دائیں جانب سلام پھیرتے ہوئے کہا : السَّلاَمُ عَلَیْکُمْ وَرَحْمَۃُ اللہِ اور بائیں جانب سلام پھیرتے ہوئے کہا : السَّلاَمُ عَلَیْکُمْ وَرَحْمَۃُ اللہِ ۔

حضرت یزید بن ابی زیاد فرماتے ہیں کہ ابراہیم نے دائیں جانب سلام پھیرا تو السَّلاَمُ عَلَیْکُمْ وَرَحْمَۃُ اللہِ کہا اور بلندآواز سے کہا۔ پھر بائیں جانب سلام پھیرا تو السَّلاَمُ عَلَیْکُمْ وَرَحْمَۃُ اللہِ کہا اور پہلے سے آہستہ آواز سے کہا۔

حضرت شعبی فرماتے ہیں کہ حضرت سعید اور حضرت عمار نے دونوں جانب سلام پھیرا۔

حضرت محمد بن منتشر کہتے ہیں کہ حضرت مسروق کی مسجد کے امام دو مرتبہ سلام پھیرا کرتے تھے، ہم نے اس بارے میں حضرت مسروق سے عرض کیا تو انہوں نے کہا کہ میں نے ہی اسے ایسا کرنے کو کہا ہے۔

حضرت حکم فرماتے ہیں کہ حضرت ابن ابی لیلیٰ دائیں اور بائیں جانب سلام پھیرتے اور السَّلاَمُ عَلَیْکُمْ ، السَّلاَمُ عَلَیْکُمْ کرتے تھے۔

حضرت ابو معمر کہتے ہیں کہ حضرت عبد اللہ سے کسی نے کہا کہ مکہ کا ایک آدمی دو مرتبہ سلام پھیرتا ہے۔ حضرت عبد اللہ نے جواب دیا کہ یہ سنت اس نے کہاں سے حاصل کرلی ؟ !

حضرت ثابت بن یزید فرماتے ہیں کہ حضرت عمرو بن میمون دو مرتبہ سلام پھیرا کرتے تھے۔

حضرت ابن جریج فرماتے ہیں کہ حضرت عطاء دو مرتبہ سلام پھیرا کرتے تھے۔