مصنف ابن ابي شيبه

حضرت ابن عمر رضی اللہ عنہما فرماتے ہیں کہ نبی کریم صلی اللہ علیہ وآلہ وسلم نماز شروع کرتے وقت ہاتھوں کو کندھوں تک اٹھایا کرتے تھے۔

حضرت وائل بن حجرکہتے ہیں کہ جب میں مدینہ آیا تو میں نے لوگوں سے کہا کہ میں حضور صلی اللہ علیہ وآلہ وسلم کی نماز کو دیکھنے کا اشتیاق رکھتا ہوں۔ چناچہ میں نے دیکھا کہ آپ صلی اللہ علیہ وآلہ وسلم نے تکبیر تحریمہ کہتے وقت ہاتھوں کو اتنا اٹھایا کہ آپ کے انگوٹھے آپ کے کانوں کے قریب ہوگئے۔

حضرت براء بن عازب فرماتے ہیں کہ میں نے حضور صلی اللہ علیہ وآلہ وسلم کو دیکھا کہ آپ نے نماز شروع کرتے وقت ہاتھوں کو اتنا اٹھایا کہ وہ آپ کے کانوں کے برابر ہوگئے۔

حضرت مالک بن حویرث فرماتے ہیں کہ میں نے حضور صلی اللہ علیہ وآلہ وسلم کو نماز میں ہاتھوں کو اتنا بلند کرتے دیکھا کہ وہ آپ کے کانوں کے لو کے برابر ہوگئے۔

حضرت اسود فرماتے ہیں کہ حضرت عمر نماز میں ہاتھوں کو کندھوں کے برابر بلند فرماتے تھے۔

حضرت نافع فرماتے ہیں کہ حضرت ابن عمر رضی اللہ عنہما نماز میں ہاتھوں کو کندھوں کے برابر بلند فرمایا کرتے تھے۔

ابراہیم فرماتے ہیں کہ نماز میں ہاتھوں کو کانوں سے زیادہ بلند مت کرو۔

حضرت ابو جعفر فرماتے ہیں کہ تکبیر تحریمہ کے وقت ہاتھ کانوں سے زیادہ بلند نہیں ہونے چاہئیں۔

حضرت ابن عون فرماتے ہیں کہ محمد نماز میں ہاتھوں کو کندھوں کے برابر بلند فرمایا کرتے تھے۔

حضرت ابو میسرہ فرماتے ہیں کہ ہمارے اصحاب جب نماز شروع کرتے تو ہاتھوں کو کانوں تک اٹھایا کرتے تھے۔

حضرت عطاء فرماتے ہیں کہ دعا وغیرہ میں ہاتھوں کو کانوں سے بلند مت کرو۔

حضرت محارب فرماتے ہیں کہ اگر تم نے حضرت ابن عمر رضی اللہ عنہما کو نماز شروع کرتے ہوئے دیکھا ہوتا تو تم دیکھتے کہ وہ اپنے ہاتھوں کو چہرے کے برابر رکھا کرتے تھے۔

حضرت سلیمان بن یسار فرماتے ہیں کہ حضور صلی اللہ علیہ وآلہ وسلم نماز میں ہاتھوں کو کندھوں کے برابر بلند فرمایا کرتے تھے۔

حضرت ابوہریرہ فرماتے ہیں کہ تم میں سے بعض لوگ ایسے ہیں جو ہاتھوں کو سر سے بھی زیادہ اونچا کرلیتے ہیں۔ بعض لوگ ایسے ہیں جو ہاتھوں کو پیٹ کے پاس رکھتے ہیں اور بعض لوگ ایسے ہیں جو ہاتھوں کو کندھوں کے برابر بلند کرتے تھے۔

حضرت خالد بن ابی بکر فرماتے ہیں کہ میں نے حضرت سالم کو دیکھا کہ وہ جب نماز کے لئے کھڑے ہوتے تو کندھوں تک ہاتھ بلند کیا کرتے تھے۔

حضرت ابن ابی ذئب فرماتے ہیں کہ حضرت سالم نماز میں ہاتھوں کو کندھوں کے برابر بلند فرمایا کرتے تھے۔