مصنف ابن ابي شيبه

حضرت ابو محذورہ اور حضرت بلال کی اذان کے آخری کلمات ” الصلاۃ خیر من النوم “ ہوا کرتے تھے۔

حضرت سوید بن غفلہ نے اپنے موذن کو یہ پیغام بھیجا کہ جب تم حی علی الفلاح پر پہنچو تو الصلاۃ خیر من النوم کہا کرو کیونکہ یہ حضرت بلال کی اذان تھی۔

اسماعیل فرماتے ہیں کہ ایک مرتبہ حضرت عمر کا موذن انہیں صبح کی اذان کی اطلاع دینے آیا اور اس نے کہا : الصَّلاَۃُ خَیْرٌ مِنَ النَّوْمِ ۔ حضرت عمر کو یہ کلمات بہت پسند آئے اور آپ نے موذن سے فرمایا کہ ان کلمات کو اپنی اذان کا حصہ بنا لو۔

حضرت نافع فرماتے ہیں کہ حضرت ابن عمر رضی اللہ عنہما اپنی اذان میں یہ کلمات کہا کرتے تھے : الصلاۃ خیر من النوم

محمد فرماتے ہیں کہ اذان میں الصَّلاَۃُ خَیْرٌ مِنَ النَّوْمِ کہنا سنت نہیں ہے۔

حضرت سعید بن مسیب کہتے ہیں کہ حضرت بلال نماز کے وقت کی اطلاع دینے کے لئے حضور صلی اللہ علیہ وآلہ وسلم کی خدمت میں حاضر ہوئے۔ آپ کو بتایا گیا کہ حضور صلی اللہ علیہ وآلہ وسلم سو رہے ہیں۔ حضرت بلال نے اونچی آواز سے کہا : الصَّلاَۃُ خَیْرٌ مِنَ النَّوْمِ ۔ اس کے بعد سے یہ الفاظ اذان کا حصہ بن گئے۔

حضرت ہشام بن عروہ روایت کرتے ہیں کہ ان کے والد اپنی اذان میں یہ کلمات کہا کرتے تھے : الصَّلاَۃُ خَیْرٌ مِنَ النَّوْمِ ، الصَّلاَۃُ خَیْرٌ مِنَ النَّوْمِ ، اللَّہُ أَکْبَرُ ، اللَّہُ أَکْبَرُ ، لاَ إِلَہَ إِلاَّ اللَّہُ ۔

حضرت قاسم بن مخیمرہ اپنی اذان کی تثویب میں یہ کلمات کہا کرتے تھے : الصَّلاَۃُ خَیْرٌ مِنَ النَّوْمِ ، الصَّلاَۃُ خَیْرٌ مِنَ النَّوْمِ ۔

حضرت ہشام فرماتے ہیں کہ حسن اور محمد کے نزدیک تثویب کا معنٰی یہ تھا کہ یہ کلمات کہے جائیں ۔ حَیَّ عَلَی الصَّلاَۃِ ، الصَّلاَۃُ خَیْرٌ مِنَ النَّوْمِ ۔

حضرت عمران بن ابی الجعد فرماتے ہیں کہ حضرت اسود بن یزید نے موذن کو فجر کی اذان میں یہ کلمات کہتے سنا : الصَّلاَۃُ خَیْرٌ مِنَ النَّوْمِ ۔ تو فرمایا کہ اذان میں ان کلمات کا اضافہ نہ کرو جو اس کا حصہ نہیں ہیں۔

حضرت عطاء فرماتے ہیں کہ حضرت ابو محذورہ نے رسول اللہ صلی اللہ علیہ وآلہ وسلم ، حضرت ابوبکر اور حضرت عمر کے لئے اذان دی ہے وہ اپنی اذان میں یہ کلمات کہا کرتے تھے : الصَّلاَۃُ خَیْرٌ مِنَ النَّوْمِ ۔

حضرت عبداللہ بن مسلم فرماتے ہیں کہ میں نے حضرت عمر بن عبدالعزیز کے مؤذن کو اذان میں الصَّلاَۃُ خَیْرٌ مِنَ النَّوْمِ کہتے ہوئے سنا ہے۔