المعجم الكبير للطبراني

ابوعبیدہ رحمہ اللہ کہتے ہیں: سیدنا مغیرہ بن شعبہ رضی اللہ عنہ بن ابی عامر بن مسعود بن معتب بن مالک بن کعب بن عمرو بن معد بن عوف بن قیس بن منبہ، کنیت ابوعبداللہ، ان کی والدہ بنو نصر بن معاویہ کی ایک خاتون تھیں۔ انہوں نے تقریباً دو سال بصرہ کی حکومت کی، پھر کوفہ کے والی بنے اور وہیں پچاس ہجری میں وفات پائی۔ رسول اللہ ﷺ کے ساتھ ان کا پہلا غزوہ حدیبیہ تھا۔

یحییٰ بن بکیر رحمہ اللہ کہتے ہیں: سیدنا مغیرہ رضی اللہ عنہ کی وفات پچاس ہجری میں ہوئی۔

الشعبی رحمہ اللہ کہتے ہیں: سیدنا عمر بن خطاب رضی اللہ عنہ نے سب سے پہلے کوفہ کی طرف ابوعبید ثقفی - ابومختار - کو بھیجا، تو وہ شہید ہو گئے۔ پھر سعد بن ابی وقاص رضی اللہ عنہ کو بھیجا، وہ پانچ سال رہے پھر انہیں معزول کر دیا۔ پھر عمار بن یاسر رضی اللہ عنہ کو بھیجا، وہ ایک سال رہے پھر معزول کر دیا۔ پھر مغیرہ بن شعبہ رضی اللہ عنہ کو بھیجا، وہ ایک سال رہے، پھر سیدنا عمر رضی اللہ عنہ شہید ہو گئے۔ جب سیدنا عثمان رضی اللہ عنہ خلیفہ بنے تو انہوں نے سعد کو دوبارہ کوفہ بھیجا، وہ ایک سال رہے پھر انہیں معزول کر دیا، پھر ولید بن عقبہ کو بھیجا، وہ پانچ سال رہے پھر معزول کر دیا، پھر سعید بن عاص کو بھیجا، وہ پانچ سال رہے پھر معزول کر دیا، پھر ابوموسیٰ اشعری رضی اللہ عنہ کو بھیجا، وہ ایک سال رہے، پھر سیدنا عثمان رضی اللہ عنہ شہید ہو گئے اور فتنہ برپا ہو گیا۔ پھر سب سے پہلے جسے معاویہ رضی اللہ عنہ نے کوفہ پر امیر بنایا وہ مغیرہ بن شعبہ رضی اللہ عنہ تھے، وہ نو سال رہے پھر وفات پا گئے۔ پھر زیاد بن ابیہ کو بھیجا، وہ چار سال رہے پھر وفات پا گئے، تو ضحاک بن قیس کو بھیجا، وہ تین سال رہے پھر معزول کر دیا، پھر نعمان بن بشیر رضی اللہ عنہ کو بھیجا، وہ چار مہینے رہے پھر معاویہ رضی اللہ عنہ کی وفات ہو گئی اور فتنہ برپا ہو گیا، پھر مسلم بن عقیل اور ان کے ساتھیوں کا معاملہ پیش آیا۔