المعجم الكبير للطبراني

سیدنا عبداللہ بن عمرو رضی اللہ عنہما سے روایت ہے کہ رسول اللہ ﷺ نے فرمایا: ”جہاد کرنے والے کو اس کا اجر ملے گا، اور اسے سامان مہیا کرنے والے کو اس کا اجر ملے گا اور جہاد کرنے والے کے برابر اجر بھی ملے گا۔“

سیدنا عبداللہ بن عمرو رضی اللہ عنہما بیان کرتے ہیں کہ رسول اللہ ﷺ ہمارے پاس تشریف لائے، اور آپ ﷺ کے ہاتھ میں دو کتابیں تھیں، آپ ﷺ نے فرمایا: ”کیا تم جانتے ہو یہ دونوں کتابیں کیا ہیں؟“ ہم نے عرض کیا: نہیں، الا یہ کہ آپ ہمیں بتائیں، یا رسول اللہ۔ آپ ﷺ نے فرمایا: ”یہ رب العالمین کی کتاب ہے، جس میں جنت والوں کے نام، ان کے آباء کے نام اور ان کے قبیلوں کے نام درج ہیں، پھر ان کی آخری تعداد پر مہر لگا دی گئی ہے، نہ ان میں کوئی اضافہ ہوگا اور نہ کبھی کمی۔ اور یہ اہل جہنم کی کتاب ہے، ان کے نام، ان کے آباء کے نام اور ان کے قبیلوں کے ناموں کے ساتھ، پھر ان کی آخری تعداد پر بھی مہر لگا دی گئی ہے، نہ ان میں اضافہ ہوگا اور نہ کمی۔“ تو رسول اللہ ﷺ کے صحابہ نے عرض کیا: پھر عمل کس لیے کریں جب یہ معاملہ طے شدہ ہے؟ رسول اللہ ﷺ نے فرمایا: ”بلکہ سیدھی راہ اختیار کرو اور میانہ روی سے کام لو، کیونکہ جنتی کو اس کے آخری عمل جنت والے عمل پر خاتمہ نصیب ہوتا ہے، خواہ اس نے پہلے کوئی بھی عمل کیا ہو، اور جہنمی کو اس کے آخری عمل جہنم والے عمل پر خاتمہ نصیب ہوتا ہے، خواہ اس نے پہلے کوئی بھی عمل کیا ہو۔ تمہارے رب عزوجل نے بندوں کے بارے میں فیصلہ فرما دیا ہے۔“ پھر رسول اللہ ﷺ نے اپنے دونوں ہاتھوں سے اشارہ کرتے ہوئے انہیں پھیلایا اور فرمایا: ”تمہارے رب نے مخلوق کا فیصلہ کر دیا ہے، ایک گروہ جنت میں ہے اور ایک گروہ بھڑکتی آگ میں۔“

سیدنا عبداللہ بن عمرو رضی اللہ عنہما سے روایت ہے کہ رسول اللہ ﷺ نے فرمایا: ”واپسی کا سفر بھی جہاد کی مانند ہے۔“ (یعنی جہاد سے واپسی کا سفر)

سیدنا عبداللہ بن عمرو رضی اللہ عنہما فرماتے ہیں: ”میں نے رسول اللہ ﷺ سے ایک ہزار مثالیں یاد کیں۔“