مجمع الزوائد ومنبع الفوائد

سیدنا جابر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اللہ تعالیٰ روزانہ جنت سے فرماتا ہے : تم اپنے اہل کے لئے خوشبودار ہو جاؤ ، تو اس کی خوشبو میں اضافہ ہو جاتا ہے اور یہ وہ ٹھنڈک ہے جو لوگ محسوس کرتے ہیں ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی عمرو بن عبدالغفار ہے اور وہ متروک ہے ۔

سیدنا ابوسعید خدری رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جنت میں ایسی نعمتیں ہیں ، جن کو کسی آنکھ نے دیکھا نہیں ، کسی کان نے سنا نہیں اور کسی انسان کے دل میں ان کا خیال بھی نہیں آیا ۔ “
یہ روایت امام طبرانی نے معجم اوسط میں اور امام بزار نے نقل کی ہے ، ہزار کے رجال صحیح کے رجال ہیں ۔

سیدنا ابودرداء رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” بیشک اللہ تعالیٰ رات کی تین گھڑیوں میں یقینی طور پر نزول کرتا ہے ، پہلی گھڑی میں وہ ذکر ( یعنی لوح محفوظ ) کو کھولتا ہے ، جس کو اس کے علاوہ اور کسی نے نہیں دیکھا ، اور پھر جو وہ چاہتا ہے ، اسے مٹا دیتا ہے اور جو وہ چاہتا ہے اسے برقرار رکھتا ہے ، پھر وہ دوسری گھڑی میں جنت عدن کی طرف نزول کرتا ہے اور وہ ایسی چیز ہے جسے اس کے علاوہ کسی نے نہیں دیکھا اور کسی انسان کے دل میں اس کا خیال بھی نہیں آیا ، اس جنت میں پروردگار کے ساتھ اولاد آدم میں سے صرف تین قسم کے لوگ رہیں گے ، انبیاء صدیقین اور شہداء ، پھر وہ فرماتا ہے : ان لوگوں کے لئے مبارکباد ہے جو تم میں داخل ہوں گے ۔ “
یہ روایت امام بزار نے نقل کی ہے اس کی سند میں ایک راوی زیادہ بن محمد ہے اور وہ ضعیف ہے ۔

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اللہ تعالیٰ فرماتا ہے : میں نے اپنے نیک بندوں کے لئے وہ چیز ( یعنی جنت اور اس کی نعمتیں ) تیار کی ہے جو کسی آنکھ نے دیکھی نہیں ہے ، کسی کان نے سنی نہیں ہے اور کسی انسان کے دل میں اس کا خیال بھی نہیں آیا ۔ “
یہ روایت امام طبرانی نے معجم اوسط میں نقل کی ہے اس کی سند میں ایک راوی محمد بن مصعب قرقسانی ہے اور وہ ضعیف ہے ، لیکن وہ جھوٹا نہیں ہے ۔

اسی سند کے ساتھ یہ بات منقول ہے : وہ بیان کرتے ہیں : نبی اکرم صلی اللہ علیہ وسلم نے ارشاد فرمایا ہے : ” میں نے جنت جیسی کوئی چیز نہیں دیکھی ، جس کا طلبگار سو جاتا ہو ، اور جہنم جیسی ( کوئی چیز نہیں دیکھی ) جس سے بچنے والا سو جاتا ہو ۔ “