مجمع الزوائد ومنبع الفوائد

سیدنا انس بن مالک رضی اللہ عنہ سے روایت ہے ، وہ بیان کرتے ہیں کہ : میں نے رسول اللہ صلی اللہ علیہ وسلم کو یہ فرماتے ہوئے سنا : ” اس ذات کی قسم جس کے ہاتھ میں میری جان ہے - یا اس ذات کی قسم جس کے ہاتھ میں محمد ( صلی اللہ علیہ وسلم ) کی جان ہے - اگر تم اتنی خطائیں (گناہ) کرو کہ تمہاری خطائیں آسمان و زمین کے درمیانی خلا کو بھر دیں ، پھر تم اللہ سے مغفرت طلب کرو ، تو وہ تمہیں لازماً بخش دے گا ۔ اور اس ذات کی قسم جس کے ہاتھ میں محمد ( صلی اللہ علیہ وسلم ) کی جان ہے - یا اس ذات کی قسم جس کے ہاتھ میں میری جان ہے - اگر تم سے گناہ نہ سرزد ہوں ، تو اللہ عزوجل ایسی قوم کو وجود میں لائے گا جو گناہ کرے گی ، پھر وہ (اللہ سے ) استغفار کرے گی تو اللہ ان کی مغفرت فرمائے گا “ ۔
اسے امام أحمد اور امام ابویعلیٰ رحمہما اللہ نے روایت کیا ہے ، اور اس کے تمام راوی ثقہ ہیں۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا :
” گناہ کا کفارہ ندامت ہے ۔ “
نبی اکرم صلی اللہ علیہ وسلم نے یہ بھی ارشاد فرمایا ہے :
” اگر تم لوگ گناہ نہ کرو ، تو اللہ تعالیٰ ایسی قوم لے آئے گا ، جو گناہ کریں گے اور اللہ تعالیٰ ان کی مغفرت کر دے گا ۔ “
یہ روایت امام أحمد نے نقل کی ہے ، اور امام طبرانی نے صرف ان الفاظ کے اختصار کے ساتھ نقل کی ہے :
” گناہ کا کفارہ ، ندامت ہے ۔ “
طبرانی نے یہ معجم کبیر اور معجم اوسط میں نقل کی ہے ، اسے امام بزار نے بھی نقل کیا ہے ، اس کی سند میں ایک راوی یحیی بن عمرو بن مالک نکری ہے ، اور وہ ضعیف ہے ، ویسے اس کی توثیق کی گئی ہے ، اس روایت کے بقیہ رجال ” ثقہ “ ہیں ۔

سیدنا عبداللہ بن عمرو رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اگر تم لوگ گناہ نہ کرو ، تو اللہ تعالیٰ ایسی مخلوق کو پیدا کر دے گا ، جو گناہ کریں گے اور پھر وہ ان کی مغفرت کر دے گا ۔ “
یہ روایت امام طبرانی نے معجم کبیر اور معجم اوسط میں نقل کی ہے ، انہوں نے معجم اوسط میں یہ الفاظ نقل کیے ہیں : ” اللہ تعالیٰ ایسی مخلوق کو پیدا کر دے گا ، جو گناہ کریں گے ، پھر وہ اللہ تعالیٰ سے مغفرت مانگیں گے ، تو وہ ان کی مغفرت کر دے گا ، اور وہ مغفرت کرنے والا ، رحم کرنے والا ہے ۔ “
یہ روایت امام بزار نے نقل کی ہے ، جو معجم اوسط کی مانند ہے اور اس کی نسبت سیدنا عبداللہ بن عمرو رضی اللہ عنہ سے منقول ” موقوف “ روایت پر کی گئی ہے ، ان روایات کے رجال ” ثقہ “ ہیں اور ان میں سے بعض کے بارے میں اختلاف پایا جاتا ہے ۔

سیدنا ابوسعید خدری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” اگر تم لوگ گناہ نہیں کرو گے ، تو اللہ تعالیٰ تمہیں لے جائے گا ، اور اُن لوگوں کو لے آئے گا ، جو گناہ کریں گے ، اور پھر اللہ تعالیٰ سے مغفرت مانگیں گے ، اور وہ اُن کی مغفرت کر دے گا ۔ “
یہ روایت امام بزار نے نقل کی ہے ۔ اس کی سند میں ایک راوی یحیی بن کثیر ہے ، جو بصری کا شاگرد ہے اور وہ ضعیف ہے ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اللہ تعالیٰ فرماتا ہے : اے ابن آدم ! جب تک تم مجھ سے دعا کرتے رہو گے اور مجھ سے امید رکھو گے ، میں تمہاری مغفرت کرتا رہوں گا ، خواہ تم میں جو بھی ( خامی ) ہو ، اگر تم میرے پاس زمین بھر کے گناہ لے کر آؤ گے ، تو میں زمین بھر کر مغفرت کے ہمراہ تم سے ملوں گا ، جبکہ تم کسی کو میرا شریک نہ ٹھہراتے ہو ، اگر تمہاری خطائیں ، آسمان کے کنارے تک پہنچ جائیں ، اور پھر تم مجھ سے مغفرت مانگو ، تو میں تمہاری مغفرت کر دوں گا ۔ “
یہ روایت امام طبرانی نے تینوں کتابوں میں نقل کی ہے ، اس کی سند میں ایک راوی ابراہیم بن اسحاق صینی ہے اور ایک راوی قیس بن ربیع ہے ، ان دونوں کے بارے میں اختلاف پایا جاتا ہے ، اس روایت کے بقیہ رجال ” صحیح “ کے رجال ہیں ۔

سیدنا ابودرداء رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تمہارا پروردگار فرماتا ہے : اگر میرا بندہ زمین بھر کے گناہوں کے ہمراہ میرے پاس آئے اور وہ کسی کو میرا شریک نہ ٹھہراتا ہو ، تو میں اُتنی ہی مغفرت کے ہمراہ اس سے ملوں گا ۔ “
یہ روایت امام طبرانی نے نقل کی ہے ، اس کی سند میں ایسے راوی ہیں ، جن سے میں واقف نہیں ہوں ۔

سیدنا ابودرداء رضی اللہ عنہ نبی اکرم صلی اللہ علیہ وسلم کے حوالے سے ، سیدنا جبرائیل علیہ السلام کے حوالے سے ، اللہ تعالیٰ کا یہ فرمان نقل کرتے ہیں : ” اگر میرا بندہ زمین بھر کر گناہوں کے ہمراہ میرے سامنے آئے ، تو میں اُتنی ہی مغفرت کے ہمراہ اس سے ملوں گا ، اور میں کوئی پرواہ نہیں کروں گا ۔ “
یہ روایت امام طبرانی نے نقل کی ہے ، اس کی سند میں ایک راوی علاء بن زید ہے اور وہ متروک ہے ۔

اسی سند کے ساتھ سیدنا ابودرداء رضی اللہ عنہ کے حوالے سے ، نبی اکرم صلی اللہ علیہ وسلم کے حوالے سے ، سیدنا جبرائیل علیہ السلام کے حوالے سے ، ان کے پروردگار کا یہ فرمان منقول ہے :
” اے میرے بندے ! جب تک تم مجھے پکارتے رہو اور مجھ سے امید رکھو ، اور تم کسی کو میرا شریک نہ ٹھہراؤ ، تو میں تمہاری ہر اس چیز کی مغفرت کر دوں گا ، جو تم میں ہو ( یعنی جو بھی گناہ تم نے کیے ہوں ) ۔ “
( علامہ ہیثمی فرماتے ہیں : ) میں یہ کہتا ہوں : اس سے پہلے سیدنا ابوموسیٰ رضی اللہ عنہ کے حوالے سے منقول حدیث گزر چکی ہے ، جس میں یہ الفاظ ہیں :
” اے میرے بندو ! تم سب گمراہ تھے ، البتہ اس کا معاملہ مختلف ہے ، جسے میں نے ہدایت نصیب کی ۔ ۔ ۔ ۔ ۔ ۔ ۔ “ ۔
یہ دعاؤں سے متعلق کتاب میں اللہ تعالیٰ کی قدرت سے متعلق باب میں گزری ہے کہ بندہ ہر معاملے میں اللہ تعالیٰ کا محتاج ہوتا ہے ۔