مجمع الزوائد ومنبع الفوائد

سیدنا عبداللہ بن مغفل رضی اللہ عنہ بیان کرتے ہیں : ایک شخص کی ملاقات ایک ایسی عورت سے ہوئی ، جو زمانہ جاہلیت میں فاحشہ عورت تھی ، وہ شخص اس عورت کے ساتھ چھیڑ چھاڑ کرنے لگا ، یہاں تک کے اس شخص نے اپنا ہاتھ اس عورت کی طرف بڑھایا ، تو اس عورت نے کہا: رُک جاؤ ! کیونکہ اللہ تعالیٰ نے شرک کو رخصت کر دیا ہے ۔ ( یہاں عفان نامی راوی نے ایک مرتبہ یہ الفاظ نقل کیے ہیں : ) ۔ زمانہ جاہلیت رخصت ہو گیا ہے ، اور اسلام آ گیا ہے ، وہ شخص مڑ گیا ، اس کا چہرہ دیوار پر لگا اور وہ شخص زخمی ہو گیا ، پھر وہ نبی اکرم صلی اللہ علیہ وسلم کی خدمت میں حاضر ہوا اور آپ کو اس بارے میں بتایا ، تو نبی اکرم صلی اللہ علیہ وسلم نے ارشاد فرمایا : ” تم ایک ایسے بندے ہو ، کہ اللہ تعالیٰ نے تمہارے بارے میں بھلائی کا ارادہ کیا ہے ، جب اللہ تعالیٰ کسی بندے کے بارے میں بھلائی کا ارادہ کر لے ، تو اس کے گناہ کی سزا ، اسے جلدی ( یعنی دنیا میں ) ہی دے دیتا ہے ، اور جب اللہ تعالیٰ کسی بندے کے بارے میں برائی کا ارادہ کر لے ، تو اسے اس کے گناہ پر روکے رکھتا ہے ، یہاں تک کہ قیامت کے دن اس کو اس کا پورا بدلہ دے گا ، اور وہ ” عیر “ نامی پہاڑ کی مانند ہو گا ۔ “
یہ روایت امام أحمد اور امام طبرانی نے نقل کی ہے ، تاہم انہوں نے یہ الفاظ نقل کئے ہیں : ” ہم نبی اکرم صلی اللہ علیہ وسلم کے ساتھ موجود تھے ، آپ درخت کے نیچے بیعت لے رہے تھے ، میں آپ کے سر سے درخت کی ٹہنیاں اٹھائے ہوئے تھا ، اسی دوران ایک شخص آیا ، جس کے چہرے سے خون بہہ رہا تھا ، اس نے عرض کی : یا رسول اللہ ! میں ہلاکت کا شکار ہو گیا ہوں ، نبی اکرم صلی اللہ علیہ وسلم نے دریافت کیا : تمہیں کس چیز نے ہلاکت کا شکار کیا ہے ؟ اس نے بتایا : میں اپنے گھر سے نکلا ، تو میرا سامنا ایک عورت سے ہوا ، میری نگاہ مسلسل اسی پر مرکوز رہی ، یہاں تک کہ میرا چہرہ دیوار سے لگا اور مجھے وہ چوٹ لگ گئی ، جو آپ ملاحظہ فرما رہے ہیں ۔ ۔ ۔ ۔ ۔ ۔ ۔ ۔ راوی بیان کرتے ہیں : اس کے بعد راوی نے حسب سابق روایت ذکر کی ہے ۔
امام أحمد کے رجال ” صحیح “ کے رجال ہیں ، امام طبرانی کی دو اسانید میں سے ایک اسی طرح ہے ۔

سیدنا عبداللہ بن عباس رضی اللہ عنہما بیان کرتے ہیں : ایک شخص نبی اکرم صلی اللہ علیہ وسلم کے پاس آیا ، اس کے چہرے پر خون بہہ رہا تھا ، اس نے عرض کی : یا رسول اللہ ! میں نے اپنی نگاہ ایک عورت پر مرکوز رکھی ہوئی تھی ، اسی دوران مجھے دیوار لگ گئی اور میرے ساتھ وہ ہوا ، جو آپ ملاحظہ فرما رہے ہیں ، تو نبی اکرم صلی اللہ علیہ وسلم نے ارشاد فرمایا : ” بے شک اللہ تعالیٰ جب اپنے کسی بندے کے بارے میں بھلائی کا ارادہ کر لے ، تو اس کے گناہ کی سزا اسے دنیا میں جلدی دے دیتا ہے ، اور جب کسی بندے کے بارے میں برائی کا ارادہ کر لے تو اس کے گناہ کو اس کے لیے روک لیتا ہے ، یہاں تک کہ قیامت کے دن وہ اس کو پورا بدلہ دے گا ، اور وہ ( گناہ ) ” عیر “ پہاڑ کی مانند ہو گا ۔ “
یہ روایت امام طبرانی نے نقل کی ہے ، اس کی سند میں ایک راوی عبدالرحمن بن محمد بن عبیداللہ عرزمی ہے اور وہ ضعیف ہے ۔

سیدنا عمار بن یاسر رضی اللہ عنہ بیان کرتے ہیں : ایک شخص کے پاس سے ، ایک عورت گزری ، وہ مسلسل اس عورت کی طرف دیکھتا رہا اس شخص کا گزر ایک دیوار کے پاس سے ہوا ( یعنی وہ شخص ایک دیوار سے ٹکرایا ) اور اس کا چہرہ زخمی ہو گیا ، جب وہ شخص نبی اکرم صلی اللہ علیہ وسلم کی خدمت میں حاضر ہوا ، تو اس کے چہرے سے خون بہہ رہا تھا ، اس نے عرض کی : یا رسول اللہ ! میں نے اس کام کا ارتکاب کیا ہے ، نبی اکرم صلی اللہ علیہ وسلم نے ارشاد فرمایا : ” جب اللہ تعالیٰ کسی بندے کے بارے میں بھلائی کا ارادہ کر لے ، تو اس کے گناہ کی سزا دنیا میں اسے جلدی دے دیتا ہے ، اور جب کسی بندے کے بارے میں ، اس کے علاوہ ارادہ کرے تو اس کے گناہوں کے بارے میں اسے مہلت دیتا ہے ، یہاں تک کہ قیامت کے دن اُسے پورا بدلہ عطا کرے گا ، جو ” عیر “ پہاڑ کی مانند ہو گا ۔ “
یہ روایت امام طبرانی نے نقل کی ہے اور اس کی سند عمدہ ہے ۔

سیدنا عبداللہ بن عباس رضی اللہ عنہا روایت کرتے ہیں : نبی اکرم صلی اللہ علیہ وسلم نے ارشاد فرمایا : ” ایک نبی نے اپنے پروردگار کی بارگاہ میں شکایت کرتے ہوئے یہ کہا: اے میرے پروردگار ! تیرے بندوں میں سے ایک بندہ ایسا ہوتا ہے ، جو تجھ پر ایمان رکھتا ہے اور تیری اطاعت والے کام کرتا ہے ، اور تو اس سے دنیا کو دور کر دیتا ہے ، اور تو اس کو آزمائش میں مبتلا کر دیتا ہے ، جبکہ تیرا ایک اور بندہ ایسا ہوتا ہے ، جو تیرا کفر کرتا ہے ، تیری نافرمانی کے کام کرتا ہے ، لیکن تو اس سے آزمائش کو دور رکھتا ہے ، اور اس کے سامنے دنیا رکھ دیتا ہے ، اللہ تعالیٰ نے اس نبی کی طرف یہ وحی کی : سارے بندے اور سارے شہر ( یعنی ساری دنیا ) میری ملکیت ہیں ، اور ہر چیز میری تسبیح یا تحلیل یا تکبیر بیان کرتی ہے ، جہاں تک میرے مومن بندے کا تعلق ہے ، تو اس کے کچھ گناہ ہوتے ہیں ، میں اس سے دنیا لپیٹ لیتا ہوں اور اس کے سامنے آزمائش ڈال دیتا ہوں ، یہاں تک کہ جب وہ میری بارگاہ میں حاضر ہو گا ، تو میں اس کی نیکیوں کا اسے بدلہ دے دوں گا ، جہاں تک میرے کافر بندے کا تعلق ہے ، تو اس کی کچھ اچھائیاں ہوتی ہیں ، تو میں اس سے آزمائش کو لپیٹ لیتا ہوں ، اور اس کے سامنے دنیا ڈال دیتا ہوں ، یہاں تک کہ جب وہ میری بارگاہ میں حاضر ہو گا ، تو میں اس کی برائیوں کا بدلہ اسے دوں گا ۔ “
یہ روایت امام طبرانی نے نقل کی ہے ، اس کی سند میں ایک راوی محمد بن خلید خفی ہے اور وہ ضعیف ہے ۔