مجمع الزوائد ومنبع الفوائد

سیدنا عبداللہ بن سائب رضی اللہ عنہ بیان کرتے ہیں : میں نبی اکرم صلی اللہ علیہ وسلم کا شراکت دار تھا ، جب میں مدینہ منورہ آیا ، تو میں نے دریافت کیا : آپ مجھے پہچانتے ہیں ؟ تو نبی اکرم صلی اللہ علیہ وسلم نے فرمایا : تم میرے شراکت دار تھے اور تم اچھے شراکت دار تھے ، اور تم نہ دھوکہ دیتے تھے اور نہ جھگڑا کرتے تھے ۔
یہ روایت امام طبرانی نے نقل کی ہے اور اس کے رجال صحیح کے رجال ہیں ، صرف منصور بن ابواسود کا معاملہ مختلف ہے اور وہ ثقہ ہے ۔

سیدنا عبداللہ بن سائب رضی اللہ عنہ بیان کرتے ہیں : میں نبی اکرم صلی اللہ علیہ وسلم کی خدمت میں آپ کی بیعت کرنے کے لئے حاضر ہوا ، میں نے عرض کی : یا رسول اللہ ! کیا آپ نے مجھے پہچانا ؟ نبی اکرم صلی اللہ علیہ وسلم نے فرمایا : جی ہاں ! کیا تم میرے شراکت دار نہیں تھے ؟ اور میں نے تمہیں بہترین شراکت دار پایا ہے ، تم نہ دھوکہ دیتے تھے اور نہ جھگڑا کرتے تھے ۔
یہ روایت امام طبرانی نے نقل کی ہے اور اس کے رجال صحیح کے رجال ہیں ۔