مجمع الزوائد ومنبع الفوائد

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم ایک باغ میں موجود تھے ۔ سیدنا ابوبکر رضی اللہ عنہ نے اندر آنے کی اجازت مانگی تو نبی اکرم صلی اللہ علیہ وسلم نے ( خادم سے ) فرمایا : تم اسے اجازت دو اور اسے جنت کی خوشخبری دو ، پھر سیدنا عمر رضی اللہ عنہ نے اندر آنے کی اجازت مانگی ، تو نبی اکرم صلی اللہ علیہ وسلم نے ( خادم سے ) فرمایا : تم اسے اجازت دو اور جنت اور شہادت کی خوشخبری دو ، پھر سیدنا عثمان رضی اللہ عنہ نے اندر آنے کی اجازت مانگی تو نبی اکرم صلی اللہ علیہ وسلم نے فرمایا : تم اسے اجازت دو اور اسے جنت اور شہادت کی خوشخبری دو ۔ “
یہ روایت امام طبرانی نے نقل کی ہے ، اور اس کی سند میں ایک راوی ابراہیم بن عمر بن ابان ہے ، اور وہ ضعیف ہے ۔ اس سے پہلے سیدنا ابوبکر رضی اللہ عنہ اور سیدنا عمر رضی اللہ عنہ کے فضائل سے متعلق روایات کے باب میں اس حدیث کے مستند طرق پہلے گزر چکے ہیں ۔

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم نے سیدنا عمر رضی اللہ عنہ کو سفید لباس پہنے ہوئے دیکھا ، تو دریافت کیا : تمہارا لباس نیا ہے یا دھلا ہوا ہے ؟ راوی کہتے ہیں : مجھے نہیں معلوم کہ سیدنا عمر رضی اللہ عنہ نے نبی اکرم صلی اللہ علیہ وسلم کو کیا جواب دیا ، تو نبی اکرم صلی اللہ علیہ وسلم نے ارشاد فرمایا : ” تم نیا لباس پہنو ، قابل تعریف زندگی بسر کرو اور شہید ہونے کے طور پر مرنا“ ۔ راوی کہتے ہیں : میرا خیال ہے روایت میں یہ الفاظ بھی ہیں : ” اللہ تعالیٰ تمہیں دنیا اور آخرت میں آنکھوں کی ٹھنڈک نصیب کرے گا ۔ “ ( علامہ ہیثمی فرماتے ہیں : ) میں یہ کہتا ہوں
یہ روایت امام ابن ماجہ نے نقل کی ہے لیکن اس میں یہ اختصار کے ساتھ منقول ہے ، اور صرف آنکھوں کی ٹھنڈک والا حصہ مذکور ہے ۔
یہ روایت امام أحمد نے اور امام طبرانی نے نقل کی ہے : اس میں اس روایت کے ان الفاظ ” اللہ تعالیٰ تمہیں دنیا اور آخرت میں آنکھوں کی ٹھنڈک نصیب کرے ۔ “ اس کے بعد یہ الفاظ ہیں : سیدنا عمر رضی اللہ عنہ نے کہا: یا رسول اللہ ! آپ کو بھی ( اللہ تعالیٰ یہ چیز نصیب کرے ) ۔ “ ان دونوں روایات کے رجال ” صحیح “ کے رجال ہیں ۔

سیدنا جابر بن عبداللہ رضی اللہ عنہما بیان کرتے ہیں : ہم لوگ نبی اکرم صلی اللہ علیہ وسلم کے پاس بیٹھے ہوئے تھے ، اسی دوران سیدنا عمر بن خطاب رضی اللہ عنہ تشریف لائے ، ان کے جسم پر سفید قمیص تھی ، نبی اکرم صلی اللہ علیہ وسلم نے ان سے دریافت کیا : اے عمر ! تمہاری یہ قمیص نئی ہے یا دھلی ہوئی ہے ؟ انہوں نے عرض کی : دھلی ہوئی ہے ۔ نبی اکرم صلی اللہ علیہ وسلم نے فرمایا : تم نیا لباس پہنو ، قابل تعریف زندگی بسر کرو ، شہید ہونے طور پر مرنا اور اللہ تعالیٰ تمہیں دنیا اور آخرت میں آنکھوں کی ٹھنڈک کے ذریعے ڈھانپ دے گا ۔ “
یہ روایت امام بزار نے نقل کی ہے ۔ اس کی سند میں ایک راوی جابر بن زید جعفی ہے ، اور وہ ضعیف ہے ۔

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” میں جنت میں چل رہا تھا ، سامنے ایک محل آیا ، میں نے دریافت کیا : جبرائیل ! یہ کس کا ہے ؟ مجھے یہ توقع تھی کہ وہ میرا ہو گا ، تو جبرائیل نے بتایا : یہ عمر کا ہے ۔ نبی اکرم صلی اللہ علیہ وسلم فرماتے ہیں : پھر میں کچھ دیر چلتا رہا ، پھر ایک اور محل آیا جو پہلے والے محل سے زیادہ بہتر تھا ، میں نے دریافت کیا : اے جبرائیل ! یہ کس کا ہے ؟ مجھے یہ امید تھی کہ وہ میرا ہو گا ، جبرائیل نے بتایا : یہ عمر کا ہے ، اس محل میں حورعین سے تعلق رکھنے والی حوریں موجود تھیں ( نبی اکرم صلی اللہ علیہ وسلم نے سیدنا عمر رضی اللہ عنہ کو مخاطب کر کے فرمایا : ) اے ابوحفص ! میں اس محل میں اس وجہ سے داخل نہیں ہوا کہ تمہارے مزاج میں تیزی پائی جاتی ہے ، راوی بیان کرتے ہیں : تو سیدنا عمر رضی اللہ عنہ کی دونوں آنکھوں سے آنسو جاری ہو گئے اور انہوں نے عرض کی : میں آپ کی وجہ سے مزاج کی تیزی نہیں دکھا سکتا ۔ “

ایک روایت میں یہ الفاظ ہیں : ” سونے سے بنا ہو محل آیا ۔ “
یہ روایت امام أحمد نے نقل کی ہے ، اور امام طبرانی نے معجم اوسط میں اس کی مانند روایت نقل کی ہے ۔

انہوں نے یہ الفاظ زائد نقل کیے ہیں : سیدنا ابوہریرہ رضی اللہ عنہ کے حوالے سے اس کی مانند روایت منقول ہے ، تاہم اس میں یہ الفاظ ہیں : ( نبی اکرم صلی اللہ علیہ وسلم نے ارشاد فرمایا : ) ” عمر غیور ہے میں اس سے زیادہ غیور ہوں اور اللہ تعالیٰ ہم سے زیادہ غیور ہے ۔ “ امام أحمد کے رجال ” صحیح“ کے رجال ہیں ، سیدنا ابوہریرہ رضی اللہ عنہ سے منقول روایت میں اضافی کلمات انہوں نے اپنے استاد مقدام بن داؤد کے حوالے سے نقل کیے ہیں ، اور وہ ضعیف راوی ہے ، ابن دقیق العید نے یہ بات ذکر کی ہے کہ اس کی توثیق کی گئی ہے ، اس روایت کے بقیہ رجال کی توثیق کی گئی ہے ۔

سیدنا معاذ بن جبل رضی اللہ عنہ بیان کرتے ہیں : سیدنا عمر رضی اللہ عنہ اہل جنت میں سے تھے ، نبی اکرم صلی اللہ علیہ وسلم جو بھی چیز بیداری کے عالم میں دیکھتے تھے یا نیند کے دوران دیکھتے تھے ، وہ حق ہوتی تھی اور نبی اکرم صلی اللہ علیہ وسلم نے یہ بات ارشاد فرمائی ہے : ” میں نے دیکھا کہ میں جنت میں ہوں ۔ میں نے اس میں ایک گھر دیکھا ، میں نے دریافت کیا : یہ کس کا ہے ؟ تو فرشتوں نے بتایا : یہ عمر بن خطاب کا ہے ۔ “
یہ روایت امام أحمد نے اور امام طبرانی نے نقل کی ہے ، اور ان دونوں کے رجال ” صحیح“ کے رجال ہیں ۔