مجمع الزوائد ومنبع الفوائد

ابوطفیل بیان کرتے ہیں : میں نے سیدنا عبداللہ بن عباس رضی اللہ عنہما سے کہا: آپ کی قوم کا یہ کہنا ہے : کہ نبی اکرم صلی اللہ علیہ وسلم نے صفا اور مروہ کے درمیان سعی کی ہے ، اور یہ چیز سنت ہے ، تو سیدنا ابن عباس رضی اللہ عنہما نے کہا: ان لوگوں نے ٹھیک کہا: ہے ، سیدنا ابراہیم علیہ السلام کو جب مناسک حج کا حکم دیا گیا ، تو سعی والی جگہ پر شیطان ان کے سامنے آیا ، اس نے سیدنا ابراہیم علیہ السلام سے دوڑ کا مقابلہ کیا ، تو سیدنا ابراہیم علیہ السلام اس سے سبقت لے گئے ، پھر سیدنا جبرائیل علیہ السلام سیدنا ابراہیم علیہ السلام کو ساتھ لے کر جمرہ عقبہ کی طرف گئے ، تو وہاں شیطان ان کے سامنے آیا ، سیدنا ابراہیم علیہ السلام نے اسے سات کنکریاں ماریں ، تو وہ چلا گیا ، پھر وہ جمرہ وسطی کے پاس ان کے سامنے آیا ، انہوں نے اسے سات کنکریاں ماریں ، راوی کہتے ہیں : وہاں انہوں نے سیدنا اسماعیل علیہ السلام کو لٹایا ( تاکہ انہیں قربان کریں ) سیدنا اسماعیل علیہ السلام کے جسم پر سفید قمیص موجود تھی ، انہوں نے کہا: اے میرے ابا جان ! میرے پاس اس کے علاوہ کوئی ایسا کپڑا نہیں ہے ، جس میں آپ مجھے کفن دے سکیں ، تو آپ اسے اتروا لیں ، تاکہ آپ اس میں مجھے کفن دے سکیں ، سیدنا ابراہیم علیہ السلام اسے اتارنے لگے تھے کہ اسی دوران پیچھے سے پکار کر یہ کہا: گیا : ” اے ابراہیم ! تم نے اپنے خواب کو سچ ثابت دکھایا ہے ۔ “ سیدنا ابراہیم علیہ السلام نے وہاں مڑ کے دیکھا ، تو وہاں سفید رنگ کا خوبصورت آنکھوں والا دنبہ موجود تھا ۔ “ ( علامہ ہیثمی فرماتے ہیں : ) میں یہ کہتا ہوں : اس کے بعد راوی نے پوری حدیث ذکر کی ہے ، جو اس سے پہلے حج سے متعلق باب میں گزر چکی ہے ۔
یہ روایت امام أحمد نے نقل کی ہے ، اس کے رجال صحیح کے رجال ہیں ، صرف ابوعاصم غنوی کا معاملہ مختلف ہے ، اور وہ ثقہ ہے ۔ اس سے پہلے ان صحابی کے حوالے سے ایک طریق گزر چکا ہے ، جسے امام أحمد اور امام طبرانی نے روایت کیا ہے ، اور اس میں یہ بات ذکر ہے : جن کو ذبح کیا گیا تھا وہ سیدنا اسحاق علیہ السلام ہیں ۔ اس روایت کی سند میں ایک راوی عطاء بن سائب ہے جو اختلاط کا شکار ہو گیا تھا ۔

سیدنا عبداللہ بن مسعود رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” بے شک اللہ تعالیٰ نے سیدنا ابراہیم علیہ السلام کو خلیل بنایا ہے ۔ “
یہ روایت امام طبرانی نے نقل کی ہے اس کی سند میں ایک راوی یحیی حمانی ہے اور وہ ضعیف ہے ۔

سیدنا سمرہ رضی اللہ عنہ بیان کرتے ہیں : نبی اکرم صلی اللہ علیہ وسلم ہم سے یہ فرمایا کرتے تھے : ” قیامت کے دن تمام انبیاء یوں ہوں گے کہ ان میں سے دو افراد ایک دوسرے کے خلیل ہوں گے ، باقی نہیں ہوں گے ، تو نبی اکرم صلی اللہ علیہ وسلم فرماتے ہیں : اُس دن اُن میں سے اللہ تعالیٰ کے خلیل سیدنا ابراہیم علیہ السلام ہوں گے ۔ “
یہ روایت امام طبرانی نے نقل کی ہے ، اور اس کی سند میں ایسے راوی ہیں ، جن سے میں واقف نہیں ہوں ۔

سیدنا جابر رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جب سیدنا ابراہیم علیہ السلام کو معراج کروائی گئی ، تو انہوں نے ایک شخص کو دیکھا کہ وہ ایک عورت کے ساتھ گناہ کا ارتکاب کر رہا تھا ، سیدنا ابراہیم علیہ السلام نے اس کے خلاف دعائے ضرر کی ، تو وہ ہلاکت کا شکار ہو گیا ، پھر انہوں نے ایک اور شخص کو گناہ کرتے ہوئے دیکھا ، تو انہوں نے اس کے خلاف دعائے ضرر کی ، تو اللہ تعالیٰ نے ان کی طرف یہ وحی کی : یہ میرا بندہ ہے ، اور اس نے لوٹ کے میری طرف آنا ہے ، تین صورتیں ہیں ، یا تو یہ ہے کہ یہ توبہ کر لے گا اور میں اس کی توبہ قبول کر لوں گا ، یا یہ ہے کہ یہ مجھ سے مغفرت طلب کرے گا ، تو میں اس کی مغفرت کر دوں گا ، یا یہ ہے کہ اس کی پشت میں سے وہ لوگ نکلیں گے ، جو میری عبادت کریں گے ، اے ابراہیم ! کیا تم یہ بات نہیں جانتے کہ میرے اسماء میں سے ، ایک اسم یہ ہے کہ میں ” صبور “ ہوں ( یعنی برداشت کرنے والا ہوں ) ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی علی بن ابوعلی لہبی ہے اور وہ متروک ہے ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جنت میں کھوکھلے موتی سے بنا ہوا ایک محل ہے ، جس میں کوئی دراڑ اور کوئی کمزوری نہیں ہے ، اللہ تعالیٰ نے وہ اپنے خلیل سیدنا ابراہیم علیہ السلام کی مہمان نوازی کے لئے تیار کیا ہے ۔ “
یہ روایت امام طبرانی نے معجم اوسط میں نقل کی ہے ، اور امام بزار نے اس کی مانند نقل کی ہے ، اور ان دونوں کے رجال ” صحیح “ کے رجال ہیں ۔

سیدنا جابر رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” مجھے انبیاء دکھائے گئے ، تو میں سیدنا ابراہیم علیہ السلام کے ساتھ مشابہت رکھتا ہوں ۔ “
یہ روایت امام طبرانی نے معجم اوسط میں اپنے استاد مقدام بن داؤد کے حوالے سے نقل کی ہے اور وہ ضعیف ہے ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” مخلوق میں سب سے پہلے سیدنا ابراہیم علیہ السلام کو لباس پہنایا جائے گا ۔ “ راوی کہتے ہیں : یعنی قیامت کے دن ( لباس پہنایا جائے گا ) ۔
یہ روایت امام بزار نے نقل کی ہے ، اس کی سند میں ایک راوی لیث بن ابوسلیم ہے ، اور وہ مدلس ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جب سیدنا ابراہیم علیہ السلام کو آگ میں ڈالا گیا ، تو انہوں نے کہا: ” اے اللہ ! بے شک تو آسمان میں ایک ہے ، اور میں زمین میں ایک فرد ہوں ، جو تیری عبادت کرتا ہے ۔ “
یہ روایت امام بزار نے نقل کی ہے ، اس کی سند میں ایک راوی عاصم بن عمر بن حفص ہے ، جسے ابن حبان نے ثقہ قرار دیا ہے ، وہ کہتے ہیں : یہ غلطی کرتا ہے اور دوسروں کے برخلاف روایت نقل کرتا ہے ، جمہور نے اسے ضعیف کہا: ہے ۔

سیدنا عباس رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” سیدنا داؤد نے کہا: میں تجھ سے اپنے آباؤ اجداد کے حق کے وسیلے سے دعا کرتا ہوں ( وہ آباؤ اجداد ) سیدنا ابراہیم علیہ السلام سیدنا اسحاق علیہ السلام اور سیدنا یعقوب علیہ السلام ہیں ، تو پروردگار نے فرمایا : جہاں تک ابراہیم کا تعلق ہے ، تو اسے میں نے آگ میں ڈال دیا ، تو اس نے میری وجہ سے صبر سے کام لیا اور اس آزمائش کا تمہیں سامنا نہیں کرنا پڑا ، اور جہاں تک اسحاق کا تعلق ہے ، تو اس نے اپنے آپ کو پیش کر دیا ، تاکہ اسے ذبح کر دیا جائے ، تو اس نے میری خاطر صبر سے کام لیا ، تو تمہیں اس کا سامنا نہیں کرنا پڑا ، جہاں تک یعقوب کا تعلق ہے ، تو یوسف اس سے دور ہو گیا تھا ، یہ ایسی آزمائش ہے ، جو تمہیں لاحق نہیں ہوئی ۔ “
یہ روایت امام بزار نے ابوسعید کی علی بن زید سے نقل کردہ روایت کے طور پر نقل کی ہے ، اور میں ان سے واقف نہیں ہوں اور علی بن زید نامی راوی ضعیف ہے ، ویسے اس کی توثیق کی گی ہے ۔

سیدنا عبداللہ بن مسعود رضی اللہ عنہ نبی اکرم صلی اللہ علیہ وسلم کے حوالے سے یہ بات نقل کرتے ہیں : آپ صلی اللہ علیہ وسلم سے دریافت کیا گیا : لوگوں میں سب سے زیادہ معزز کون ہے ؟ آپ صلی اللہ علیہ وسلم نے فرمایا : ” سیدنا یوسف علیہ السلام ، جو سیدنا یعقوب علیہ السلام کے صاحبزادے ہیں ، جو سیدنا اسحاق ذبیح اللہ علیہ السلام کے صاحبزادے تھے ۔ “
یہ روایت امام طبرانی نے نقل کی ہے ، بقیہ نامی راوی مدلس ہے ، اور ابوعبیدہ نامی راوی نے اپنے والد ( سیدنا عبداللہ بن مسعود رضی اللہ عنہ ) سے سماع نہیں کیا ہے ۔

ابواحوص بیان کرتے ہیں : اسماء بن خارجہ نے ایک شخص کے سامنے فخر کا اظہار کرتے ہوئے یہ کہا: میں معزز بزرگوں کا بیٹا ہوں ، تو سیدنا عبداللہ رضی اللہ عنہ نے فرمایا : ” وہ تو سیدنا یوسف بن یعقوب بن اسحاق ذبیح اللہ بن ابراہیم خلیل اللہ تھے ۔ “
یہ روایت امام طبرانی نے موقوف روایت کے طور پر دو اسناد کے ساتھ نقل کی ہے ، ان دو میں سے ایک کے رجال ثقہ ہیں تاہم امام طبرانی کے مشائخ سے میں واقف نہیں ہوں ۔

سیدنا عبداللہ بن عباس رضی اللہ عنہما بیان کرتے ہیں : عرض کی گی : یا رسول اللہ ! سردار کون ہے ؟ آپ صلی اللہ علیہ وسلم نے فرمایا : سیدنا یوسف بن سیدنا یعقوب بن سیدنا اسحاق بن سیدنا ابراہیم ( علیہم السلام ) ۔ “ لوگوں نے دریافت کیا : آپ کی امت میں سردار کون ہو گا ؟ نبی اکرم صلی اللہ علیہ وسلم نے ارشاد فرمایا : ” جی ہاں ! وہ شخص جسے حلال مال دیا گیا ہو اور نرمی عطا کی گی ہو ، وہ غریب کو قریب رکھے اور لوگوں کو اس سے شکایات کم ہوں ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی نافع ابوہرمز ہے اور وہ متروک ہے ۔