مجمع الزوائد ومنبع الفوائد

خالد بن عبدالله قسری اپنے والد کے حوالے سے ، اپنے دادا کا یہ بیان نقل کرتے ہیں : نبی اکرم صلی اللہ علیہ وسلم نے ان کے دادا سیدنا یزید بن اسد رضی اللہ عنہ سے فرمایا : ” تم لوگوں کے لیے وہی چیز پسند کرو ، جو تم اپنے لیے پسند کرتے ہو ۔ “

خالد کے حوالے سے منقول ایک روایت میں یہ الفاظ ہیں : وہ بیان کرتے ہیں : میرے والد نے مجھے میرے دادا کے حوالے سے
یہ روایت بیان کی ہے ، وہ کہتے ہیں : ” نبی اکرم صلی اللہ علیہ وسلم نے مجھ سے دریافت کیا : کیا تم جنت کو پسند کرتے ہو ؟ ( راوی کہتے ہیں : ) میں نے عرض کی : جی ہاں ! نبی اکرم صلی اللہ علیہ وسلم نے فرمایا : ” تو تم اپنے بھائی کے لئے وہی چیز پسند کرو ، جو تم اپنے لیے پسند کرتے ہو ۔ “
یہ روایت عبداللہ نے اور امام طبرانی نے معجم کبیر اور معجم اوسط میں اس کی مانند نقل کی ہے اور اس کے رجال ثقہ ہیں ۔

سیدنا عبداللہ بن عمرو رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص یہ چاہتا ہو کہ اُسے جہنم سے بچا لیا جائے ، اور وہ جنت میں داخل ہو جائے ، تو جب اُس کی موت اس کے پاس آئے ، تو اس کا یہ حال ہونا چاہیے کہ وہ اس بات کی گواہی دیتا ہو کہ اللہ تعالیٰ کے علاوہ اور کوئی معبود نہیں ہے ، اور سیدنا محمد صلی اللہ علیہ وسلم اس کے بندے اور اس کے رسول ہیں ، اور وہ لوگوں کے ساتھ وہی سلوک کرتا ہو ، جس کے بارے میں وہ یہ پسند کرتا ہو کہ اُس کے ساتھ اس طرح کا سلوک کیا جائے ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی لیث بن ابوسلیم ہے اور وہ مدلس ہے ، اس روایت کے بقیہ رجال ثقہ ہیں ۔