مجمع الزوائد ومنبع الفوائد

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” ایک مسلمان ، دوسرے مسلمان کا بھائی ہوتا ہے ، وہ اُس پر ظلم نہیں کرتا ، وہ اسے رسوا نہیں کرتا ۔ “ نبی اکرم صلی اللہ علیہ وسلم نے یہ بھی ارشاد فرمایا ہے : ” اس ذات کی قسم ! جس کے دست قدرت میں میری جان ہے ، جب بھی دو افراد آپس میں ایک دوسرے کے ساتھ محبت رکھتے ہیں ، تو ان دونوں کے درمیان علیحدگی اس گناہ کی وجہ سے ہوتی ہے جس کا ارتکاب ان دونوں میں سے کسی ایک نے کیا ہوتا ہے ۔ “ نبی اکرم صلی اللہ علیہ وسلم نے یہ بھی ارشاد فرمایا ہے : ” ایک مسلمان کا اپنے بھائی کے ذمہ حق ہے کہ وہ ( اُس کے ساتھ ) چھ قسم کی بھلائی کرے ، جب وہ چھینکے ، تو اُسے چھینک کا جواب دے ، جب وہ بیمار ہو ، تو اس کی عیادت کرے ، جب وہ غیر موجود ہو ، تو اس کی خیرخواہی کرے ، جب وہ موجود ہو ، تو جب اس سے ملاقات ہو ، تو اُسے سلام کرے ، جب وہ اس کو دعوت پر بلائے ، تو اسے قبول کرے اور جب وہ مر جائے ، تو اُس کے جنازے کے ساتھ جائے ۔ “ ( راوی بیان کرتے ہیں : ) نبی اکرم صلی اللہ علیہ وسلم نے مسلمان کو اپنے بھائی سے تین دن سے زیادہ لاتعلقی اختیار کرنے سے منع کیا ہے ۔
یہ روایت امام أحمد نے نقل کی ہے اور اس کی سند حسن ہے ۔

بنو سلیط سے تعلق رکھنے والے ایک صاحب بیان کرتے ہیں : میں نبی اکرم صلی اللہ علیہ وسلم کی خدمت میں حاضر ہوا ، آپ صلی اللہ علیہ وسلم اس وقت کچھ لوگوں کے درمیان موجود تھے ، میں نے آپ صلی اللہ علیہ وسلم کو یہ ارشاد فرماتے ہوئے سنا : ” ایک مسلمان دوسرے مسلمان کا بھائی ہوتا ہے ، وہ اُس پر ظلم نہیں کرتا ، وہ اُسے رُسوا نہیں کرتا اور تقویٰ یہاں ہوتا ہے ۔ “ حماد نامی راوی بیان کرتے ہیں : نبی اکرم صلی اللہ علیہ وسلم نے اپنے دست مبارک کے ذریعے سینے کی طرف اشارہ کر کے یہ بات ارشاد فرمائی تھی ۔
یہ روایت امام أحمد نے مختلف اسانید کے ساتھ نقل کی ہے ، اور اس کی سند حسن ہے ۔

عبدالرحمن بن زیاد بن انعم بیان کرتے ہیں : میں نے اپنے والد کو یہ بیان کرتے ہوئے سنا ہے : ” ایک مرتبہ انہوں نے اپنی ایک سمندری مہم کے دوران اپنے ساتھیوں کو جمع کیا اور سیدنا ابوایوب انصاری رضی اللہ عنہ کی بھی دعوت کی ، راوی بیان کرتے ہیں : جب کھانا تیار ہو گیا ، تو ہم نے سیدنا ابوایوب انصاری رضی اللہ عنہ کو پیغام بھیجا ، سیدنا ابوایوب انصاری رضی اللہ عنہ تشریف لے آئے ، تو انہوں نے فرمایا : جب تم لوگوں نے میری دعوت کی ، تو میں نے ( نفلی ) روزہ رکھا ہوا تھا ، لیکن میرے ذمہ یہ بات لازم تھی کہ میں تمہاری دعوت کو قبول کرتا ، کیونکہ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” ایک مسلمان کے اپنے مسلمان بھائی کے لئے لازم حقوق ہیں ، جو شخص اُن میں سے کوئی ایک بھی چیز ترک کر دیتا ہے وہ ایک لازم حق کو ترک کر دیتا ہے ، جب وہ اُسے دعوت پر بلائے تو وہ جائے ، جب وہ اس سے ملے تو اسے سلام کرے ، جب وہ چھینکے تو اُسے چھینک کا جواب دے ، جب وہ بیمار ہو تو اس کی عیادت کرے ، جب وہ فوت ہو جائے ، تو اس کے جنازے کے ساتھ جائے ، اور جب وہ اس سے خیرخواہی کا طلبگار ہو ، تو اس کی خیرخواہی کرے ۔ “ راوی کہتے ہیں : ہمارے درمیان ایک شخص تھا ، جس کی طبیعت میں مزاح کا عنصر پایا جاتا تھا اور ایک شخص تھا ، جو ہمارے خرچ کا نگران تھا ، تو مزاحیہ شخص نے کھانا پکانے والے شخص سے کہا: اللہ تعالیٰ تمہیں جزائے خیر عطا کرے ، اور بھلائی دے ، جب اُس نے زیادہ مرتبہ یہ جملہ دوسرے شخص سے کہا: ، تو دوسرا شخص غصے میں آ گیا اور اس کو برا بھلا کہنے لگا ، مزاحیہ شخص نے کہا: اے سیدنا ابوایوب ! اس بارے میں آپ کی کیا رائے ہے ؟ کہ میں نے ایک شخص سے یہ کہا: اللہ تعالیٰ تمہیں جزائے خیر عطا کرے ، تو وہ غصے میں آ گیا اور مجھے برا کہنے لگا ، تو سیدنا ابوایوب رضی اللہ عنہ نے فرمایا : ہم لوگ یہ کہا: کرتے تھے کہ جس کو بھلائی موافق نہ آئے ، اس کو برائی موافق آ جاتی ہے ، تو تم اس کے ساتھ الٹ کر کے دیکھو ، پھر جب دوسرا شخص آیا ، تو مزاحیہ شخص نے اس سے کہا: اللہ تعالیٰ تمہیں برا بدلہ دے اور تنگدستی دے ، تو وہ شخص ہنس پڑا اور راضی ہو گیا ، اور وہ بولا: تم کسی بھی حالت میں اپنا مزاق نہیں چھوڑتے ہو ، تو اُس مزاحیہ شخص نے کہا: اللہ تعالیٰ سیدنا ابوایوب انصاری رضی اللہ عنہ کو جزائے خیر دے ، انہوں نے مجھ سے یہ بات کہی تھی ۔
یہ روایت امام طبرانی نے نقل کی ہے اور عبدالرحمن نامی راوی کو یحیی القطان اور دیگر حضرات نے ثقہ قرار دیا ہے ، جبکہ ایک جماعت نے اسے ضعیف کہا: ہے ، اس روایت کے بقیہ رجال ثقہ ہیں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” ایک مومن کے ، دوسرے مومن پر چھ حق ہیں ، جب وہ اس سے ملے ، تو اسے سلام کرے ، جب وہ چھینکے ، تو اسے چھینک کا جواب دے ، جب وہ اس کی دعوت کرے ، تو دعوت قبول کرے ، جب وہ بیمار ہو تو اس کی عیادت کرے ، جب وہ فوت ہو جائے ، تو اس کے جنازے میں شریک ہو ، اور جب وہ غیر موجود ہو تو اُس کی خیرخواہی کرے ۔ “

ایک روایت میں یہ الفاظ ہیں : ” جب وہ اُس کی دعوت کرے ، تو اسے قبول کرے ، خواہ اُس نے ( جانور کے ) ایک پائے کی ہی دعوت کی ہو ۔ “
یہ روایت امام طبرانی نے معجم اوسط میں دو اسناد کے ساتھ نقل کی ہے ، جن میں سے ایک کے رجال ثقہ ہیں ۔

سیدنا واثلہ بن اسقع رضی اللہ عنہ روایت کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” ایک مسلمان کا خون ( یعنی جان ) عزت اور مال ، دوسرے مسلمان کے لئے حرام ہیں ، ایک مسلمان دوسرے مسلمان کا بھائی ہوتا ہے ، وہ اس پر ظلم نہیں کرتا ہے ، وہ اس کو رسوا نہیں کرتا ہے ، تقویٰ یہاں ہوتا ہے ۔ “ راوی بیان کرتے ہیں : کہ نبی اکرم صلی اللہ علیہ وسلم نے اپنے دل کی طرف اپنے ہاتھ کے ذریعے اشارہ کر کے یہ بات ارشاد فرمائی ( اور پھر یہ فرمایا : ) ” آدمی کی برائی کے لیے اتنا ہی کافی ہے کہ وہ اپنے مسلمان بھائی کو حقیر سمجھے ۔ “ ( علامہ ہیثمی فرماتے ہیں : ) میں یہ کہتا ہوں : ” اطراف “ کے مصنف نے اس روایت کے اختصار کی نسبت امام ابوداؤد کی طرف کی ہے ، جو اس نسخے کے علاوہ ہے ، جو لؤلؤی نے نقل کیا ہے ۔
یہ روایت امام أحمد نے اور امام طبرانی نے نقل کی ہے ، اور اس کے رجال ثقہ ہیں ۔

عبید بن زیاد حضرمی بیان کرتے ہیں : ایک مرتبہ مالک بن دینار کی ملاقات سالم بن عبداللہ بن عمر بن خطاب سے ہوئی ، جو اُس وقت ایک ایسے گدھے پر سوار تھے ، جس کے کان لٹکے ہوئے تھے ، اس کی زین کی حالت خراب تھی ، اُن صاحب کے کپڑے بھی خراب تھے ، سالم نے اُن سے دریافت کیا : آپ کا تعلق کہاں سے ہے ؟ تو انہوں نے بتایا : آپ لوگوں سے اور آپ کے بعض موالی سے ہے ، تو انہوں نے بتایا : میرے والد نے مجھے نبی اکرم صلی اللہ علیہ وسلم کے حوالے سے یہ حدیث بیان کی ہے ، آپ صلی اللہ علیہ وسلم نے ارشاد فرمایا ہے : ” ایک مسلمان دوسرے مسلمان کا بھائی ہوتا ہے ، وہ اُسے رسوائی کا شکار نہیں کرتا ، وہ اس کے ساتھ خیانت نہیں کرتا ، وہ اسے لاحق ہونے والی کسی مصیبت میں اُس کے حال پر نہیں چھوڑتا ، اگر عربوں کے بہترین لوگ اور موالی خراب ہو جائیں اور وہ ایک دوسرے سے محبت رکھتے ہوں ، تو اُن کے لئے اس کے بغیر کوئی چارہ نہیں ہو گا ، اور اگر ان دونوں فریقوں میں سے برے لوگ ایک دوسرے کے ساتھ بغض رکھنے کی وجہ سے ضائع ہو جائیں ، تو ان کے لئے اس کے بغیر کوئی چارہ نہیں ہو گا ۔ “
یہ روایت امام طبرانی نے نقل کی ہے اور اس کی سند عمدہ ہے ۔

سیدنا عبداللہ رضی اللہ عنہ فرماتے ہیں : ” ایک مسلمان کے ، دوسرے مسلمان پر بھلائی کے حوالے سے چھ حق ہیں ، جب وہ اس سے ملے تو اسے سلام کرے ، جب وہ اسے بلائے ، تو اسے جواب دے ، جب وہ چھینکے تو اسے چھینک کا جواب دے ، جب وہ فوت ہو جائے تو اس کے جنازے میں شریک ہو ، اس کی غیر موجودگی میں اُس کی خیرخواہی کرے اور اس کے لئے وہی چیز پسند کرے ، جو وہ اپنے لئے پسند کرتا ہے ۔ “
یہ روایت امام طبرانی نے نقل کی ہے ، وہ یہ فرماتے ہیں : کہ ابوجعفر فراء نے اسے ” مرفوع “ روایت کے طور پر نقل نہیں کیا ہے ، جبکہ ابواسحاق سبیعی نے اسے ” مرفوع “ روایت کے طور پر نقل کیا ہے ، لیکن انہوں نے ابواسحاق سبیعی تک اس کی سند نقل نہیں کی ہے ، اور اس روایت کے رجال ثقہ ہیں ۔

سیدنا عبداللہ بن عمر رضی اللہ عنہما بیان کرتے ہیں : ” نبی اکرم صلی اللہ علیہ وسلم نے ایک شخص کے بارے میں دریافت کرتے ہوئے فرمایا : کون اُس سے واقف ہے ؟ حاضرین میں سے ایک صاحب بولے : میں ، نبی اکرم صلی اللہ علیہ وسلم نے دریافت کیا : اُس کا نام کیا ہے ؟ ان صاحب نے جواب دیا : مجھے نہیں معلوم ، نبی اکرم صلی اللہ علیہ وسلم نے دریافت کیا : اُس کے والد کا کیا نام ہے ؟ ان صاحب نے جواب دیا : مجھے نہیں معلوم ، نبی اکرم صلی اللہ علیہ وسلم نے ارشاد فرمایا : یہ معرفت نہیں ہے ، جب تک تمہیں اُس کا نام ، اُس کے باپ کا نام اور اس کے قبیلے کا نام پتہ نہیں ہوتا ، اگر وہ بیمار ہو ، تو تم اس کی عیادت کرو ، اگر وہ فوت ہو جائے ، تو تم اس کے جنازے کے ساتھ جاؤ ۔ “
یہ روایت امام طبرانی نے نقل کی ہے ، اس کی سند میں ایک راوی عمرو بن دینار ہے ، جو آل زبیر کا منشی ہے اور وہ متروک ہے ۔