مجمع الزوائد ومنبع الفوائد

سیدنا عمرو بن مرہ جہنی رضی اللہ عنہ بیان کرتے ہیں : ایک شخص نبی اکرم صلی اللہ علیہ وسلم کی خدمت میں حاضر ہوا ، اُس نے عرض کی : یا رسول اللہ ! میں اس بات کی گواہی دیتا ہوں کہ اللہ تعالیٰ کے علاوہ اور کوئی معبود نہیں ہے اور آپ اللہ کے رسول ہیں ، میں پانچ نمازیں ادا کرتا ہوں ، میں اپنے مال کی زکوٰۃ ادا کرتا ہوں ، میں رمضان کے مہینے کے روزے رکھتا ہوں ، نبی اکرم صلی اللہ علیہ وسلم نے فرمایا : ” جو شخص ایسی حالت میں مر جائے ، وہ قیامت کے دن انبیاء صدیقین اور شہداء کے ساتھ اس طرح ہو گا ، نبی اکرم صلی اللہ علیہ وسلم نے اپنی دو انگلیاں کھڑی کر کے ارشاد فرمایا ( اور پھر فرمایا : ) جبکہ وہ اپنے والدین کی نافرمانی نہ کرتا ہو ۔ “
یہ روایت امام أحمد اور امام طبرانی نے دو اسناد کے ساتھ نقل کی ہے ، امام طبرانی کی دو اسناد میں سے ایک کے رجال ” صحیح “ کے رجال ہیں ۔

سیدنا معقل بن یسار رضی اللہ عنہ روایت کرتے ہیں نبی اکرم صلی اللہ علیہ وسلم نے ارشاد فرمایا : ” بے شک اللہ تبارک و تعالیٰ نے ، تمہارے لئے تین چیزوں کو ناپسندیدہ قرار دیا ہے ، ماؤں کی نافرمانی کرنا ، بیٹیوں کو زندہ دفن کرنا اور ” منع“ ( یعنی اپنے پاس موجود چیز کو صدقہ نہ کرنا ) اور ” ہات “ ( یعنی دوسرے سے مانگتے ہوئے یہ کہنا : مجھے دو ! ) ۔ “
یہ روایت امام طبرانی نے نقل کی ہے اور اس کے رجال صحیح کے رجال ہیں ۔

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” تین قسم کے لوگوں پر ، اللہ تعالیٰ نے جنت کو حرام قرار دیا ہے ، باقاعدگی سے شراب پینے والا ( والدین کا ) نافرمان اور وہ بے شرم شخص جو اپنی بیوی کے بارے میں خباثت کو برقرار رکھتا ہے ۔ “
یہ روایت امام أحمد نے نقل کی ہے اور اس کی سند میں ایک راوی ایسا ہے جس کا نام بیان نہیں کیا گیا ہے ۔

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” تین قسم کے لوگوں کی طرف ، اللہ تعالیٰ قیامت کے دن نظر نہیں کرے گا ، اپنے ماں باپ کا نافرمان ، باقاعدگی سے شراب پینے والا شخص ، اور کچھ دے کر احسان جتانے والا شخص ، اور تین قسم کے لوگ جنت میں داخل نہیں ہوں گے ، اپنے ماں باپ کا نافرمان ، دیوث ، اور رجلہ ( یعنی مردوں کے ساتھ مشابہت اختیار کرنے والی عورت ) ۔ “ ایک روایت میں یہ الفاظ ہیں : ” وہ عورت جو مردوں کے ساتھ مشابہت اختیار کرتے ہوئے مردانہ وضع قطع اختیار کرتی ہے ۔ “
یہ روایت امام بزار نے دو اسناد کے ساتھ نقل کی ہے اور ان دونوں کے رجال ثقہ ہیں ۔

سیدنا عبداللہ بن ابواوفیٰ رضی اللہ عنہ بیان کرتے ہیں : ہم لوگ نبی اکرم صلی اللہ علیہ وسلم کے پاس موجود تھے ، ایک شخص آپ کے پاس آیا اور اس نے بتایا : ایک نوجوان ہے ، جو آخری سانسیں لے رہا ہے ، اس سے کہا: گیا : تم لا الہ الا اللہ پڑھو ، تو وہ یہ ( کلمہ ) نہیں پڑھ سکا ، نبی اکرم صلی اللہ علیہ وسلم نے دریافت کیا : وہ نماز پڑھا کرتا تھا ؟ اس شخص نے جواب دیا : جی ہاں ! نبی اکرم صلی اللہ علیہ وسلم اٹھے ، آپ کے ساتھ ہم بھی اُٹھے ، نبی اکرم صلی اللہ علیہ وسلم اس نوجوان کے پاس تشریف لائے ، آپ نے اس سے فرمایا : تم لا الہ الا اللہ پڑھو ! اُس نے کہا: میں یہ نہیں پڑھ سکتا ، نبی اکرم صلی اللہ علیہ وسلم نے دریافت کیا : وہ کیوں ؟ راوی بیان کرتے ہیں : وہ شخص اپنے والدین کا نافرمان تھا ، نبی اکرم صلی اللہ علیہ وسلم نے دریافت کیا : کیا اس کی ماں زندہ ہے ؟ لوگوں نے بتایا : جی ہاں ! نبی اکرم صلی اللہ علیہ وسلم نے فرمایا : تم لوگ اُسے بلا کر لاؤ ! وہ لوگ اس خاتون کو بلا کے لائے ، وہ آئی ، نبی اکرم صلی اللہ علیہ وسلم نے دریافت کیا : کیا یہ تمہارا بیٹا ہے ؟ اس نے جواب دیا : جی ہاں ! نبی اکرم صلی اللہ علیہ وسلم نے اس عورت سے دریافت کیا : اس بارے میں تمہارا کیا خیال ہے ؟ کہ اگر آگ سلگائی جائے اور پھر تم سے یہ کہا: جائے : کہ اگر تم اس بچے کی سفارش کرو گی ، تو ہم اسے چھوڑ دیں گے ، ورنہ ہم اسے اس آگ میں جلا دیں گے ، تو کیا تم اس کی سفارش کر دو گی ؟ اس عورت نے عرض کی : یا رسول اللہ ! ایسی صورت میں ، میں سفارش کر دوں گی ، نبی اکرم صلی اللہ علیہ وسلم نے فرمایا : پھر تم اللہ کو اور مجھے گواہ بنا کر یہ کہو : کہ تم اس سے راضی ہو ، اس عورت نے کہا: اے اللہ ! میں تجھے گواہ بناتی ہوں اور تیزے رسول کو گواہ بناتی ہوں کہ میں اپنے بیٹے سے راضی ہوں ، نبی اکرم صلی اللہ علیہ وسلم نے اُس نوجوان سے کہا: اے لڑکے ! اب تم پڑھو : اللہ تعالیٰ کے علاوہ اور کوئی معبود نہیں ہے اور اس کا کوئی شریک نہیں ہے اور میں اس بات کی گواہی دیتا ہوں کہ سیدنا محمد صلی اللہ علیہ وسلم اُس کے بندے اور اس کے رسول ہیں ، تو اس نوجوان نے وہ کلمہ پڑھ لیا ، تو نبی اکرم صلی اللہ علیہ وسلم نے ارشاد فرمایا : ہر طرح کی حمد اس اللہ کے لئے مخصوص ہے ، جس نے میرے ذریعے اس کو جہنم سے نجات عطا کر دی ۔ “
یہ روایت امام طبرانی نے نقل کی ہے اور امام أحمد نے بہت زیادہ اختصار کے ساتھ نقل کی ہے ، اس کی سند میں ایک راوی فائد ابوورقاء ہے اور وہ متروک ہے ۔

ابوغسان ضبی بیان کرتے ہیں : میں اپنے والد کے ساتھ چلتا ہوا پتھریلی سرزمین پر جا رہا تھا ، سیدنا ابوہریرہ رضی اللہ عنہ کی مجھ سے ملاقات ہوئی ، انہوں نے مجھ سے دریافت کیا : یہ کون ہیں ؟ میں نے جواب دیا : یہ میرے والد ہیں ، انہوں نے فرمایا : تم ان کے آگے نہ چلنا ، بلکہ ان کے پیچھے چلنا ، یا ان کے ایک طرف چلنا اور تم کسی شخص کو اپنے اور ان کے درمیان حائل نہ ہونے دینا اور تم کسی ایسی بلند جگہ پر نہ چلنا کہ تمہارے والد اُس سے نیچے ہوں ، اور تم کوئی ایسی چیز نہ کھانا ، جسے تمہارے والد دیکھ رہے ہوں ، کیونکہ ہو سکتا ہے انہیں اس کی خواہش ہو ، پھر انہوں نے فرمایا : کیا تم عبداللہ بن خراش کو جانتے ہو ؟ میں نے جواب دیا : جی نہیں ! تو انہوں نے بتایا : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جہنم میں اُس کا رخسار احد پہاڑ جتنا ہو گا اور اس کی داڑھی بیضاء پہاڑ جتنی ہو گی ۔ “ سیدنا ابوہریرہ رضی اللہ عنہ بیان کرتے ہیں : میں نے عرض کی : یا رسول اللہ ! اس کی وجہ کیا ہے ؟ نبی اکرم صلی اللہ علیہ وسلم نے فرمایا : کیونکہ وہ شخص اپنے والدین کا نافرمان تھا ۔ “
یہ روایت امام طبرانی نے معجم اوسط میں نقل کی ہے ، ابوغسان نامی راوی اور اس سے روایت کرنے والا شخص ابوغنم ، میں ان دونوں سے واقف نہیں ہوں ، اس روایت کے بقیہ رجال ثقہ ہیں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جنت کی بو ، پانچ سو سال کی مسافت سے محسوس ہو جاتی ہے ، لیکن اُسے وہ شخص نہیں پا سکے گا ، جو احسان جتانے والا ہو ، یا والدین کا نافرمان ہو ، یا باقاعدگی سے شراب پینے والا ہو ۔ “
یہ روایت امام طبرانی نے معجم صغیر میں نقل کی ہے اس کی سند میں ایک راوی ربیع بن بدر ہے اور وہ متروک ہے ۔

سیدنا جابر بن عبداللہ رضی اللہ عنہما بیان کرتے ہیں : نبی اکرم صلی اللہ علیہ وسلم ہمارے پاس تشریف لائے ، ہم اکٹھے تھے ، آپ نے ارشاد فرمایا : ” اے مسلمانوں کے گروہ ! تم اللہ سے ڈرو اور صلہ رحمی کرو ، کیونکہ کسی بھی چیز کا ثواب صلہ رحمی سے زیادہ جلدی نہیں ملتا اور تم ماں باپ کی نافرمانی سے بچ کے رہو ، کیونکہ جنت کی خوشبو ایک ہزار سال کی مسافت سے محسوس ہو جاتی ہے ، لیکن اللہ کی قسم ! والدین کا نافرمان یا رشتے داری کے حقوق کو پامال کرنے والا شخص ، یا زانی ، اُس کو نہیں پا سکیں گے ، کسی بھی گناہ کی سزا ، سرکشی ( یعنی زنا ) ، یا رشتے داری کے حقوق کو پامال کرنے سے زیادہ جلدی نہیں ملتی ، اور بوڑھا زانی ، یا تکبر کے طور پر اپنے تہبند کو لٹکانے والا شخص ( اس کی خوشبو نہیں پا سکیں گے ) کیونکہ کبریائی ، اللہ تعالیٰ کے لیے مخصوص ہے ، جو تمام جہانوں کا پروردگار ہے اور جھوٹ سارے کا سارا گناہ ہے ، البتہ اس جھوٹ کا معاملہ مختلف ہے ، جس کے ذریعے تم کسی مومن کو نفع پہنچاؤ ، یا جس کے ذریعے تم کسی گناہ کو پرے کر دو ، جنت میں ایک بازار ہے ، جس میں کوئی خرید و فروخت نہیں ہو گی ، اس میں صرف تصویریں لگی ہوئی ہوں گی ، جو ( مرد یا عورت ) جس بھی مرد یا عورت کی تصویر کو پسند کرے گا ، اُس میں داخل ہو جائے گا ۔ “
یہ روایت امام طبرانی نے معجم اوسط میں محمد بن کثیر کے حوالے جابر جعفی سے نقل کی ہے اور یہ دونوں انتہائی ضعیف ہیں ۔