مجمع الزوائد ومنبع الفوائد

سیدنا عمر بن خطاب رضی اللہ عنہ کے بارے میں یہ بات منقول ہے : اُن سے اللہ تعالیٰ کے اس فرمان کے بارے میں دریافت کیا گیا ( ارشاد باری تعالیٰ ہے : ) ” اور جب زندہ دفن کی جانے والی لڑکی سے سوال کیا جائے گا “ ۔ سیدنا عمر بن خطاب رضی اللہ عنہ نے بتایا : ایک مرتبہ قیس بن عاصم ، نبی اکرم صلی اللہ علیہ وسلم کے پاس آیا اور بولا: یا رسول اللہ ! میں نے زمانہ جاہلیت میں ، اپنی بیٹیوں کو زندہ دفن کر دیا تھا ، نبی اکرم صلی اللہ علیہ وسلم نے فرمایا : تم اُن میں سے ہر ایک کی طرف سے ایک گردن کو آزاد کرو ، اس نے عرض کی : یا رسول اللہ ! میں اونٹوں کا مالک ہوں ، نبی اکرم صلی اللہ علیہ وسلم نے فرمایا : تم ان میں سے ہر ایک کی طرف سے اونٹ قربان کرو ۔
یہ روایت امام بزار اور امام طبرانی نے نقل کی ہے ، امام بزار کے رجال صحیح کے رجال ہیں ، صرف حسین بن مہدی ایلی کا معاملہ مختلف ہے اور وہ ثقہ ہے ۔

خلیفہ بن حصین بیان کرتے ہیں : سیدنا قیس بن عاصم رضی اللہ عنہ نے ، نبی اکرم صلی اللہ علیہ وسلم کی خدمت میں عرض کی : میں نے زمانہ جاہلیت میں اپنی بارہ ، یا شاید تیرہ بیٹیوں کو زندہ دفن کر دیا تھا ، تو نبی اکرم صلی اللہ علیہ وسلم نے اُن سے فرمایا : ” تم ان میں سے ہر ایک کی طرف سے ایک جان آزاد کرو “ ۔
یہ روایت امام طبرانی نے نقل کی ہے اس کی سند میں ایک راوی یحیی بن عبدالحمید حمانی ہے اور وہ ضعیف ہے ۔