مجمع الزوائد ومنبع الفوائد

سیدنا عبداللہ بن عباس رضی اللہ عنہما بیان کرتے ہیں ( ارشاد باری تعالیٰ ہے : ) ” اور جب ہم نے جنات کے ایک گروہ کو تمہاری طرف متوجہ کیا کہ جب وہ قرآن کو غور سے سن رہے تھے ۔ ۔ ۔ ۔ ۔ ۔ “ ۔ سیدنا عبداللہ بن عباس رضی اللہ عنہما بیان کرتے ہیں : وہ نصیبین کے رہنے والے ” نو “ جنات تھے ، نبی اکرم صلی اللہ علیہ وسلم نے ان کو ان کی قوم کی طرف نمائندہ بنا کے بھیجا تھا ۔
یہ روایت امام طبرانی نے نقل کی ہے ۔

سیدنا عبداللہ بن عباس رضی اللہ عنہما کے حوالے سے ، معجم اوسط میں یہ بات منقول ہے ، وہ بیان کرتے ہیں : جنات کو نبی اکرم صلی اللہ علیہ وسلم کی طرف دو مرتبہ متوجہ کیا گیا ، اور جنات کے معززین ” نصیبین “ میں رہتے تھے ۔

ان کے حوالے سے معجم اوسط میں ، یہ روایت بھی منقول ہے : جب جنات نبی اکرم صلی اللہ علیہ وسلم کی خدمت میں حاضر ہوئے تھے ، تو وہ آپ کے پاس اُس وقت آئے تھے ، جب آپ کھجوروں کے باغ میں موجود تھے ۔

سیدنا عبداللہ بن عباس رضی اللہ عنہما کے حوالے سے ، مسند بزار میں یہ بات منقول ہے : جنات کے معززین ” موصل “ میں موجود تھے ۔ جہاں تک معجم اوسط میں ، امام طبرانی کی سند کا تعلق ہے ، تو اس میں ایک راوی نضر ابوعمر ہے اور وہ متروک ہے اور معجم اوسط کی دو اسناد میں سے ایک میں ایک راوی جابر جعفی ہے اور وہ ضعیف ہے ، دوسری سند اور امام بزار کی سند ، ان دونوں میں ایک راوی عفیر بن معدان ہے اور وہ متروک ہے ۔

زر بن حبیش بیان کرتے ہیں ( ارشاد باری تعالیٰ ہے : ) ” جب ہم نے جنات کے ایک گروہ کو تمہاری طرف متوجہ کیا ، تو وہ قرآن غور سے سننے لگے ، جب وہ وہاں پہنچے ، تو انہوں نے کہا: تم لوگ خاموش رہو ! “ یعنی انہوں نے کہا: تم چپ رہو ! راوی بیان کرتے ہیں : وہ سات افراد تھے ، جن میں سے ایک ذوبعہ تھا ۔
یہ روایت امام بزار نے نقل کی ہے اور اس کے رجال ثقہ ہیں ۔