مجمع الزوائد ومنبع الفوائد

سیدنا انس رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” سیدنا موسیٰ علیہ السلام ایک شرمیلے آدمی تھے ، وہ پانی کے پاس آئے تاکہ اس میں غسل کریں ، انہوں نے اپنے کپڑے ( اتار کر ) ایک پتھر پر رکھ دیے ، وہ اپنی شرمگاہ ظاہر نہیں ہونے دیتے تھے ، بنی اسرائیل کے لوگ یہ کہتے تھے کہ سیدنا موسیٰ علیہ السلام کے خصیے پھولے ہوئے ہیں ، انہیں بیماری لاحق ہے ، ان کا مقصد یہ تھا کہ سیدنا موسیٰ علیہ السلام اسی وجہ سے اپنے کپڑے نہیں اتارتے ہیں ، اس پتھر نے سیدنا موسیٰ علیہ السلام کے کپڑے اٹھائے ، اور چلتا ہوا بنی اسرائیل کے بیٹھنے کی جگہ کے مد مقابل آ گیا ، لوگوں نے سیدنا موسیٰ علیہ السلام کو دیکھ لیا کہ وہ خوبصورت ترین فرد ہیں “ ۔ یا جس طرح بھی ، نبی اکرم صلی اللہ علیہ وسلم نے ارشاد فرمایا ، تو اللہ تعالیٰ کے اس فرمان سے یہی مراد ہے : ” وہ لوگ جو کہتے تھے ، اللہ تعالیٰ نے اُس کے حوالے سے اُس ( یعنی موسیٰ ) کو بری ظاہر کر دیا اور وہ اللہ تعالیٰ کی بارگاہ میں مقام رکھتا ہے “ ۔
یہ روایت امام بزار نے نقل کی ہے اس کی سند میں ایک راوی علی بن زید ہے اور وہ ثقہ ہے ، لیکن خراب حافظے کا مالک ہے ، اس روایت کے بقیہ رجال ثقہ ہیں ۔