مجمع الزوائد ومنبع الفوائد

سیده عائشہ صدیقہ رضی اللہ عنہا بیان کرتی ہیں : میں نبی اکرم صلی اللہ علیہ وسلم کے ساتھ ایک پیالے میں کھا رہی تھی سیدنا عمر رضی اللہ عنہ آئے نبی اکرم صلی اللہ علیہ وسلم نے انہیں بھی دعوت دی ، وہ بھی کھانے لگے ، تو ان کی انگلی میری انگلی کے ساتھ مس ہو گئی ، تو انہوں نے فرمایا : ارے ! یا انہوں نے کہا: اف ! اگر میری بات تم خواتین کے بارے میں مانی جاتی ، تو کسی آنکھ نے تم خواتین کو نہیں دیکھنا تھا ، تو حجاب ( کے حکم ) سے متعلق آیات نازل ہو گئیں ۔
یہ روایت امام طبرانی نے معجم اوسط میں نقل کی ہے اور اس کے رجال صحیح کے رجال ہیں ، البتہ موسیٰ بن ابوکثیر کا معاملہ مختلف ہے اور وہ ثقہ ہے ۔

سیدنا انس رضی اللہ عنہ بیان کرتے ہیں : جب حجاب کے حکم سے متعلق آیات نازل ہو گئیں ، تو میں آیا ، میں پہلے کی طرح اندر داخل ہونے لگا ، تو نبی اکرم صلی اللہ علیہ وسلم نے مجھ سے فرمایا : اے میرے بیٹے ! اب تم باہر ہی رہو “ ۔
( علامہ ہیثمی فرماتے ہیں : ) میں یہ کہتا ہوں سیدنا انس رضی اللہ عنہ کے حوالے سے ” صحیح “ میں ایک حدیث مذکور ہے ، جو اس حدیث کے علاوہ ہے ۔
یہ روایت امام ابویعلیٰ نے نقل کی ہے اس کی سند میں ایک راوی سلم علوی ہے اور وہ ضعیف ہے ۔