مجمع الزوائد ومنبع الفوائد

سیدنا سمرہ رضی اللہ عنہ نبی اکرم صلی اللہ علیہ وسلم کا یہ فرمان قتل کرتے ہیں : ” حج اکبر کا دن وہ دن ہے جس دن میں ابوبکر نے لوگوں کو حج کروایا “ ۔
یہ روایت امام طبرانی نے نقل کی ہے ، اور اس کے رجال صحیح کے رجال ہیں صرف معاذ بن ہشام کا معاملہ مختلف ہے وہ کہتے ہیں : میں نے اپنے والد کی تحریر میں یہ بات پائی ہے ۔

سیدنا سمرہ بن جندب رضی اللہ عنہ بیان کرتے ہیں : فتح کے موقع پر نبی اکرم صلی اللہ علیہ وسلم نے ارشاد فرمایا : ” یہ حج اکبر کا سال ہے نبی اکرم صلی اللہ علیہ وسلم نے ارشاد فرمایا : مسلمانوں کا حج اور مشرکین کا حج مسلسل تین دن تک اکٹھا رہا عیسائیوں اور یہودیوں کا حج مسلسل تین دن تک اکٹھا رہا تو ایک ہی سال میں مسلسل چھ دن تک مسلمانوں مشرکین عیسائیوں اور یہودیوں کا حج اکٹھا رہا جب سے آسمان و زمین پیدا ہوئے ہیں اس وقت سے لے کر اس سال سے پہلے کبھی یہ اکٹھا نہیں ہوا اور اس سال کے بعد قیامت قائم ہونے تک یہ کبھی اکٹھا نہیں ہو گا “ ۔
یہ روایت امام طبرانی نے نقل کی ہے ، اور اس کے رجال کی توثیق کی گئی ہے ، تاہم اس کا متن منکر ہے ۔

سیدنا عبداللہ بن عمرو رضی اللہ عنہ بیان کرتے ہیں : عرب ایک سال ایک مہینے کو حلال قرار دے دیتے تھے اور ایک سال دو مہینوں کو حلال قرار دیتے تھے ، تو وہ ہر چھبیس سال میں ایک مرتبہ حج کے صحیح وقت تک پہنچتے تھے یہ وہ ادھار ہے جس کا ذکر اللہ تعالیٰ نے اپنی کتاب میں کیا ہے جب وہ سال آیا جس میں سیدنا ابوبکر رضی اللہ عنہ نے لوگوں کو حج کروایا تھا ، تو وہ سال حج والا سال ہی تھا ، تو اللہ تعالٰی نے اسے حج اکبر کا نام دیا پھر اگلے سال نبی اکرم صلی اللہ علیہ وسلم نے حج کیا تو لوگوں نے پہلی کے چاند کا درست حساب رکھنا شروع کر دیا ۔ نبی اکرم صلی اللہ علیہ وسلم نے ارشاد فرمایا : ” بے شک زمانہ اسی حساب سے چل رہا ہے جیسے اس وقت تھا جب اللہ تعالیٰ نے آسمانوں اور زمین کو پیدا کیا تھا “ ۔
یہ روایت امام طبرانی نے معجم اوسط میں نقل کی ہے ، اور اس کے رجال ثقہ ہیں ۔

سیدنا علی رضی اللہ عنہ بیان کرتے ہیں : جب سورت توبہ کی دس آیات نبی اکرم صلی اللہ علیہ وسلم پر نازل ہوئیں تو نبی اکرم صلی اللہ علیہ وسلم نے سیدنا ابوبکر رضی اللہ عنہ کو بلوایا اور انہیں ان کے ہمراہ بھیجا تاکہ وہ اہل مکہ کے سامنے ان کی تلاوت کر دیں پھر نبی اکرم صلی اللہ علیہ وسلم نے مجھے بلوایا اور مجھ سے فرمایا : تم ابوبکر کے پاس پہنچو جہاں تم اس سے ملو گے وہاں تم اس سے تحریر لے لینا اور اہل مکہ کے سامنے تم ان آیات کی تلاوت کرنا میں سیدنا ابوبکر رضی اللہ عنہ سے ملا میں نے ان سے وہ تحریر لے لی سیدنا ابوبکر رضی اللہ عنہ واپس نبی اکرم صلی اللہ علیہ وسلم کی خدمت میں حاضر ہوئے انہوں نے عرض کی : یا رسول اللہ ! کیا میرے بارے میں کوئی چیز نازل ہو گئی ہے ؟ نبی اکرم صلی اللہ علیہ وسلم نے ارشاد فرمایا : جی نہیں لیکن سیدنا جبرائیل علیہ السلام میرے پاس آئے اور انہوں نے کہا: آپ کی طرف سے اس فریضے کی ادائیگی صرف آپ خود کر سکتے ہیں یا آپ کے خاندان کا کوئی فرد کر سکتا ہے ۔