مجمع الزوائد ومنبع الفوائد

سیدنا عبداللہ بن عباس رضی اللہ عنہما اللہ تعالیٰ کے اس فرمان کے بارے بیان کرتے ہیں : ( ارشاد باری تعالیٰ ہے : ) ” بے شک وہ لوگ جو اللہ اور اس کے رسول سے جنگ کرتے ہیں ، اور زمین میں فساد پھیلانے کی کوشش کرتے ہیں ان کا بدلہ یہ ہے “ ۔ سیدنا عبداللہ بن عباس رضی اللہ عنہما بیان کرتے ہیں : اہل کتاب سے تعلق رکھنے والے کچھ افراد اور نبی اکرم صلی اللہ علیہ وسلم کے درمیان عہد اور میثاق تھا ان لوگوں نے عہد شکنی کی اور زمین میں فساد شروع کیا تو اللہ تعالیٰ نے اپنے نبی کو ان لوگوں کے بارے میں اختیار دیا کہ اگر وہ نبی چاہیں تو انہیں قتل کر دیں اگر چاہیں تو انہیں مصلوب کر دیں اگر چاہیں تو ان کے ہاتھ اور پاؤں مخالف سمت کٹوا دیں جہاں تک نفی کا تعلق ہے ، تو اس سے مراد جلا وطن کرنا ہے اگر کوئی شخص توبہ کرتے ہوئے آ جاتا ہے ، اور اسلام میں داخل ہو جاتا ہے ، تو اس سے یہ چیز قبول کی جائے گی اور اس نے پہلے جو غلطی کی تھی اس حوالے سے اس کا مواخذہ نہیں ہو گا ۔
یہ روایت امام طبرانی نے نقل کی ہے علی بن ابوطلحہ نامی راوی نے سیدنا عبداللہ بن عباس رضی اللہ عنہما سے سماع نہیں کیا ہے ۔

سیدنا عبداللہ بن عباس رضی اللہ عنہما بیان کرتے ہیں : قرآن میں جہاں پر بھی لفظ قتل تشدید کے ساتھ ہو ، تو اس سے مراد عذاب دینا ہو گا اور جہاں بھی تخفیف کے ساتھ ہو اس سے مراد رحمت ہو گی ۔
یہ روایت امام طبرانی نے نقل کی ہے ۔ اس کی سند میں ایک راوی سہل بن ابراہیم مروزی ہے ، اور میں اس سے واقف نہیں ہوں ۔