مجمع الزوائد ومنبع الفوائد

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص ظلم کی بنیاد پر قتل ہو جائے وہ شہید ہو گا “ ۔
یہ روایت امام أحمد نے نقل کی ہے ، اور اس کے رجال صحیح کے رجال ہیں ۔

ابوبکر بن حفص بیان کرتے ہیں : سیدنا سعد بن ابی وقاص رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” اچھی موت یہ ہے کہ آدمی اپنے حق ( کی حفاظت کرتے ہوئے ) مر جائے “ ۔
یہ روایت امام أحمد نے نقل کی ہے ۔ انہوں نے اس میں پورا واقعہ نقل کیا ہے ۔ امام طبرانی نے اسے معجم اوسط میں نقل کیا ہے ۔ امام أحمد کے رجال صحیح کے رجال ہیں البتہ ابوبکر بن حفص نے سیدنا سعد رضی اللہ عنہ سے سماع نہیں کیا ہے ۔

سیدنا امام حسین بن علی رضی اللہ عنہما بیان کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص اپنے مال کی حفاظت کی خاطر مارا جائے وہ شہید ہے “ ۔
یہ روایت امام أحمد نے نقل کی ہے ، اور اس کے رجال ثقہ ہیں ۔

سیدنا سعد بن ابی وقاص رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص اپنے مال کی حفاظت کرتے ہوئے قتل ہو جائے وہ شہید ہے “ ۔
یہ روایت امام طبرانی نے معجم صغیر میں اور امام بزار نے نقل کی ہے ۔ امام طبرانی کی سند عمدہ ہے ۔

سیدنا جابر بن عبداللہ رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص اپنے مال کی حفاظت کرتے ہوئے مارا جائے وہ شہید ہے “ ۔
یہ روایت امام ابویعلیٰ نے نقل کی ہے ۔ اس کی سند میں ایک راوی ہارون بن حیان رقی ہے یہ بات کہی گئی ہے یہ حدیث ایجاد کرتا تھا ۔

سیدنا عبداللہ بن مسعود رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص اپنے مال کی حفاظت کرتے ہوئے مارا جائے وہ شہید ہے “ ۔
یہ روایت امام طبرانی نے نقل کی ہے ۔ اس کی سند میں ایک راوی عبید بن محمد بن محاربی ہے ، اور وہ ضعیف ہے
یہ روایت امام بزار نے اپنے استاد عباد بن أحمد عرزمی کے حوالے سے نقل کی ہے ، اور وہ متروک ہے ۔

سیدنا انس رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” اپنے مال کی حفاظت کی خاطر قتل ہونے والا شخص شہید ہے “ ۔
یہ روایت امام بزار نے نقل کی ہے ، اور امام طبرانی نے معجم اوسط میں نقل کی ہے ۔ اس کی سند میں ایک راوی مبارک بن سحیم ہے ، اور وہ متروک ہے ۔

سیدنا عبداللہ بن زبیر رضی اللہ عنہما اور سیدنا عبداللہ بن عامر بن کریظ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص اپنے مال کی حفاظت کی خاطر قتل ہو جائے وہ شہید ہے “ ۔ امام طبرانی نے ان دونوں حضرات کے حوالے سے
یہ روایت معجم اوسط میں نقل کی ہے ۔ انہوں نے معجم کبیر میں اسے صرف سیدنا عبداللہ بن زبیر رضی اللہ عنہ کے حوالے سے نقل کیا ہے ۔ امام بزار نے اسے اسی طرح نقل کیا ہے ۔ اس کی سند میں ایک راوی عبداللہ بن مصعب زبیری ہے ، اور وہ ضعیف ہے ۔

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” اپنے مال کی حفاظت کی خاطر قتل ہونے والا شہید ہے اپنے اہل خانہ کی حفاظت کی خاطر قتل ہونے والا شہید ہے اپنی جان کی خاطر قتل ہونے والا شہید ہے “ ۔
یہ روایت امام طبرانی نے نقل کی ہے ، اور اس کی سند میں ایک راوی جویبر ہے ، اور وہ متروک ہے ۔

سیدنا شداد بن اوس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص بالشت بھر زمین ظلم کے طور پر لے گا اسے سات زمینوں کا طوق پہنایا جائے گا اور جو شخص اپنے مال کی حفاظت کی خاطر قتل ہو جائے وہ شہید ہے “ ۔
یہ روایت امام طبرانی نے نقل کی ہے ۔ اس کی سند میں ایک راوی قزعہ بن سوید ہے ایک روایت کے مطابق یحییٰ بن معین نے اور ابن عدی نے اسے ثقہ قرار دیا ہے جبکہ جمہور نے اسے ضعیف کہا: ہے ۔ اس روایت کے بقیہ رجال ثقہ ہیں ۔

سیدنا قہید بن مطرف غفاری رضی اللہ عنہ بیان کرتے ہیں : نبی اکرم صلی اللہ علیہ وسلم سے ایک شخص نے سوال کیا : اگر کوئی زیادتی کرنے والا میرے خلاف زیادتی کرتا ہے ، تو نبی اکرم صلی اللہ علیہ وسلم نے تین مرتبہ اسے یہ حکم دیا کہ وہ اس شخص کو روکے گا اس نے عرض کی : اگر وہ شخص نہیں مانتا ؟ تو نبی اکرم صلی اللہ علیہ وسلم نے اسے حکم دیا کہ وہ اس کے ساتھ لڑے اس شخص نے دریافت کیا : پھر ہمارا کیا بنے گا ؟ نبی اکرم صلی اللہ علیہ وسلم نے ارشاد فرمایا : اگر اس نے تمہیں قتل کر دیا ، تو تم جنت میں جاؤ گے ، اور اگر تم نے اسے قتل کر دیا ، تو وہ جہنم میں جائے گا “ ۔
یہ روایت امام أحمد امام طبرانی اور امام بزار نے نقل کی ہے ، اور اس کے رجال ثقہ ہیں ۔