مجمع الزوائد ومنبع الفوائد

سیدنا عبداللہ بن عباس رضی اللہ عنہما بیان کرتے ہیں : ایک شخص نبی اکرم صلی اللہ علیہ وسلم کی خدمت میں حاضر ہوا اس نے عرض کی : کیا آپ کا پروردگار بھی رنگ ( عطا ) کرتا ہے ؟ نبی اکرم صلی اللہ علیہ وسلم نے فرمایا : جی ہاں ! ایسا رنگ جو سرخ یا زرد یا سفید نہیں ہوتا ۔
یہ روایت امام بزار نے نقل کی ہے ۔ اس کی سند میں ایک راوی عطاء بن سائب ہے جو اختلاط کا شکار ہو گیا تھا ۔

سیدہ ام سلمہ رضی اللہ عنہا بیان کرتی ہیں : بعض اوقات نبی اکرم صلی اللہ علیہ وسلم اپنی چادر اور تہبند پر زعفران یا درس کا رنگ کروا لیتے تھے اور پھر ان کو پہن کر نکلتے تھے ۔
یہ روایت امام طبرانی نے رکیح بن ابوعبیدہ کی اپنے والد سے نقل کردہ روایت کے طور پر نقل کی ہے ۔ ابن حبان نے رکیح کا ذکر کتاب الثقات میں کیا ہے ، اور یہ حدیث ان کے حالات میں ذکر کی ہے مجھے پتہ نہیں انہوں نے اس کے صحیح ہونے کا حکم لگایا ہے یا نہیں انہوں نے اس کے بقیہ رجال سے تعرض نہیں کیا اس کی سند میں ایسا راوی ہے جس سے میں واقف نہیں ہوں ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے رنگے ہوئے کپڑے کی رخصت دی ہے ، جب تک اس میں خوشبو اور ( نسوانی ) رنگ نہ ہو ۔
یہ روایت امام أحمد نے نقل کی ہے ۔ اس کی سند میں ایک راوی حجاج بن ارطاۃ ہے ، اور وہ تدلیس کرنے والا ہے ۔

سیدنا ابوہریرہ رضی اللہ عنہ بیان کرتے ہیں : سیدنا عثمان رضی اللہ عنہ حج کرنے کے لئے مکہ کی طرف روانہ ہوئے محمد بن جعفر بن ابوطالب کی اہلیہ أن ( یعنی محمد بن جعفر ) کے پاس آئیں اور انہوں نے اپنی بیوی کے ساتھ رات گزاری یہاں تک کہ جب صبح ہوئی ، تو ان کے جسم سے خوشبو کے بھپکے اُٹھ رہے تھے اور انہوں نے معصفر کپڑا اوڑھا ہوا تھا ، جو مفدم تھا ، انہوں نے لوگوں کو ” ملل ، میں پایا ، وہ ابھی روانہ نہیں ہوئے تھے ، جب سیدنا عثمان رضی اللہ عنہ نے انہیں دیکھا تو انہیں ڈانٹا اور انہیں ” ف“ کہا: اور فرمایا : کیا تم نے معصفر لباس پہنا ہوا ہے ؟ جبکہ نبی اکرم صلی اللہ علیہ وسلم نے اس سے منع کیا ہے ، تو سیدنا علی بن ابوطالب رضی اللہ عنہ نے اُن سے کہا: اللہ کے رسول نے اسے یا آپ کو اس سے منع نہیں کیا ، آپ صلی اللہ علیہ وسلم نے مجھے اس سے منع کیا ہے ۔
یہ روایت امام أحمد نے اور امام ابویعلیٰ نے کبیر میں نقل کی ہے ، امام ابویعلیٰ نے اختصار کے ساتھ نقل کی ہے ، اس کی سند میں ایک راوی عبیداللہ بن عبداللہ بن موہب ہے ، جسے یحیی بن معین نے ، ایک روایت کے مطابق ثقہ قرار دیا ہے ، ویسے اسے ضعیف کہا: گیا ہے ۔

سیدنا عبداللہ بن ابواوفی رضی اللہ عنہ بیان کرتے ہیں : نبی اکرم صلی اللہ علیہ وسلم کے نزدیک سب سے زیادہ پسندیدہ رنگ زرد تھا ۔
یہ روایت امام طبرانی نے نقل کی ہے ، اس کی سند میں ایک راوی عبید بن قاسم ہے ، اور وہ کذاب اور متروک ہے ۔

سیدنا قیس تمیمی رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو دیکھا کہ آپ کے جسم پر زرد کپڑا تھا ، اور میں نے آپ کو دیکھا کہ آپ نے خواتین کو سلام کیا ۔
یہ روایت امام طبرانی نے نقل کی ہے ۔ اس کی سند میں ایک راوی جابر جعفی ہے ، اور وہ ضعیف ہے ۔

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم سبز رنگ کو پسند کرتے تھے راوی کہتے ہیں : نبی اکرم صلی اللہ علیہ وسلم کے نزدیک سب سے زیادہ پسندیدہ رنگ یہ تھا ۔
یہ روایت امام بزار اور امام طبرانی نے معجم اوسط میں نقل کی ہے ۔ امام طبرانی کے رجال ثقہ ہیں ۔

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم کا ایک لحاف تھا جو ورس اور زعفران سے رنگا ہوا تھا آپ وہ پہن کر اپنی ازدواج کے پاس تشریف لے جاتے تھے اگر آپ کی کسی مخصوص زوجہ محترمہ کے پاس ٹھہرنے کی باری ہوتی ، تو آپ اس کپڑے پر پانی چھڑک دیتے تھے اور اگر کسی دوسری زوجہ محترمہ کے پاس رہنے کی باری ہوتی ، تو وہ اس پر پانی چھڑک دیتی تھیں ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی مؤمل بن اسماعیل ہے ، جسے ابن حبان نے ثقہ قرار دیا ہے ، اور ایک جماعت نے اسے ضعیف کہا: ہے ۔

سیدنا عبداللہ بن جعفر رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو دو زرد کپڑے پہنے ہوئے دیکھا ہے ۔
یہ روایت امام طبرانی نے معجم صغیر میں نقل کی ہے ۔

امام ابویعلیٰ نے ، ان صحابی ( یعنی سیدنا عبداللہ بن جعفر رضی اللہ عنہ ) کے حوالے سے یہ بات نقل کی ہے ۔ میں نے نبی اکرم صلی اللہ علیہ وسلم کو دیکھا آپ کے جسم پر دو کپڑے تھے ، جو زعفران سے رنگے ہوئے تھے ، ایک چادر تھی اور عمامہ تھا ۔ ایک روایت کی سند میں ایک راوی عبداللہ بن مصعب زہری ہے ، جسے یحیی بن معین نے ضعیف قرار دیا ہے ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم کا ایک لحاف ( یا چادر ) تھی ، جو ورس سے رنگی ہوئی تھی آپ گھر میں اسے پہن لیا کرتے تھے اور اسے پہن کے اپنی ازواج کے پاس تشریف لے جاتے تھے آپ اس لباس میں نماز بھی پڑھ لیتے تھے ۔
یہ روایت امام طبرانی نے معجم اوسط میں اپنے استاد مقدام بن داؤد کے حوالے سے نقل کی ہے ۔ اور وہ ضعیف نے ۔

عمران بن مسلم بیان کرتے ہیں : میں نے سیدنا انس بن مالک رضی اللہ عنہ کو زرد تہبند استعمال کرتے ہوئے دیکھا ہے ۔
یہ روایت امام طبرانی نے نقل کی ہے ۔ اور اس کے رجال صحیح کے رجال ہیں ۔

سیدنا عمران بن حصین رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تم لوگ سرخ رنگ استعمال کرنے سے بچو ! کیونکہ یہ شیطان کے نزدیک سب سے زیادہ پسندیدہ زینت ہے “ ۔
یہ روایت امام طبرانی نے معجم اوسط میں دو اسناد کے ساتھ نقل کی ہے ۔ جن میں سے ایک میں ایک راوی یعقوب بن خالد بن نجیح بکری عبدی ہے ، میں اس سے واقف نہیں ہوں ، دوسری روایت کی سند میں بکر بن محمد ہے ، جس نے سعید کے حوالے سے شعبہ سے روایت نقل کی ہے ۔ ان دونوں کے بقیہ رجال ثقہ ہیں ۔

سیدنا رافع بن یزید ثقفی رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” بے شک شیطان سرخ رنگ کو پسند کرتا ہے ، تو تم سرخ رنگ سے بچو ! اور ہر اس لباس سے بچو ! جو شہرت والا ہو “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی ابوبکر ہذلی ہے ، اور وہ ضعیف ہے ۔

سیدنا جابر رضی اللہ عنہ بیان کرتے ہیں : میں نے ایسا کوئی شخص نہیں دیکھا ، جو سرخ حلے میں ، نبی اکرم صلی اللہ علیہ وسلم سے زیادہ خوبصورت لگتا ہو ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی ایوب بن سوید ہے ابن حبان نے اس کا تذکرہ کتاب الثقات میں کیا ہے ، اور یہ بات بیان کی ہے اس کی حدیث سے بچا جائے گا ، جبکہ وہ روایت اس کے بیٹے محمد نے اس سے نقل کی ہو ۔ ( علامہ ہیثمی فرماتے ہیں : ) میں یہ کہتا ہوں یہ اس روایت کے علاوہ ہے جو اس کے بیٹے نے نقل کی ہے ۔ ( یعنی
یہ روایت اس کے بیٹے سے منقول نہیں ہے ) تاہم جمہور نے اس راوی کو ضعیف قرار دیا ہے اس روایت کے بقیہ رجال ثقہ ہیں ۔

سیدہ عائشہ صدیقہ رضی اللہ عنہا بیان کرتی ہیں : میں نے سیدنا جبرائیل علیہ السلام کو دیکھا انہوں نے سرخ عمامہ ( باندھا ہوا ) تھا ، اور انہوں نے اسے دونوں کندھوں کے درمیان لٹکایا ہوا تھا ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی شہر بن حوشب ہے ، اس کی نقل کردہ حدیث حسن ہے اسے ضعیف قرار دیا گیا ہے ، اس روایت کے بقیہ رجال ثقہ ہیں ۔