مجمع الزوائد ومنبع الفوائد

سیدنا عقبہ بن عامر رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص تعویذ لٹکاتا ہے ، اللہ تعالیٰ اس کا ( مقصد ) اس کے لئے پورا نہ کرے ، اور جو شخص ” ودعہ “ ( تعویذ ہی کی ایک قسم ) لٹکاتا ہے ، تو اللہ تعالیٰ اس ( کے مقصد کو پورا ) نہ کرے “ ۔
یہ روایت امام أحمد ، امام ابویعلیٰ اور امام طبرانی نے نقل کی ہے اور ان کے رجال ثقہ ہیں ۔

سیدنا عقبہ بن عامر جہنی رضی اللہ عنہ بیان کرتے ہیں : نبی اکرم صلی اللہ علیہ وسلم کی خدمت میں کچھ افراد حاضر ہوئے آپ نے نو افراد سے بیعت لے لی اور ایک سے نہیں لی ، آپ کی خدمت میں عرض کی گئی : یا رسول اللہ ! آپ نے نو افراد سے بیعت لے لی ہے ، اور اسے چھوڑ دیا ہے ۔ نبی اکرم صلی اللہ علیہ وسلم نے فرمایا : اس کے پاس تعویذ موجود ہے اس شخص نے اپنا ہاتھ اندر داخل کیا اور اسے کاٹ دیا تو نبی اکرم صلی اللہ علیہ وسلم نے اس سے بیعت لے لی اور ارشاد فرمایا : ” جو شخص تعویذ لٹکاتا ہے ، وہ شرک کا مرتکب ہوتا ہے “ ۔
یہ روایت امام أحمد اور امام طبرانی نے نقل کی ہے اور امام أحمد کے رجال ثقہ ہیں ۔

عیسیٰ نامی بیان کرتے ہیں : ہم سیدنا ابومعبد رضی اللہ عنہ کی خدمت میں ان کی عیادت کرنے کے لئے حاضر ہوئے ، ہم نے کہا: آپ کوئی تعویذ تو نہیں لٹکاتے ؟ انہوں نے فرمایا : موت اس سے زیادہ قریب ہے ، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص کوئی چیز لٹکاتا ہے ، اسے اس کے سپرد کر دیا جاتا ہے “ ۔
یہ روایت امام طبرانی نے ، کنیت سے متعلق باب میں ، سیدنا ابومعبد جہنی رضی اللہ عنہ کے حالات کے ضمن میں نقل کی ہے ، راوی کہتے ہیں : ایک قول کے مطابق ان کا نام سیدنا عبداللہ بن عکیم رضی اللہ عنہ ہے ۔ میں یہ کہتا ہوں : اگر تو یہ وہی ہیں ، تو پھر ان کا صحابی ہونا ، ان الفاظ سے ثابت ہوتا ہے : ” میں نے سنا “ اس روایت کی سند میں ایک راوی محمد بن ابولیلیٰ ہے ، اور وہ خراب حافظے کا مالک ہے ، اس روایت کے بقیہ رجال ثقہ ہیں ۔

سیدنا عبداللہ بن عمرو بن العاص رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میں اس بات کی پرواہ نہیں کرتا کہ میں نے کیا کیا ہے ، اور کس کام کا ارتکاب کیا ہے ، جبکہ میں نے تریاق پی لیا ہو ، یا تعویذ لٹکا لیا ہو ، یا اپنی طرف سے شعر موزوں کر دیا ہو “ ۔
یہ روایت امام طبرانی نے معجم اوسط میں ، اپنے استاد موسیٰ بن عیسیٰ بن منذر حمصی کے حوالے سے نقل کی ہے ، میں اس سے واقف نہیں ہوں ۔ اس روایت کے بقیہ رجال ثقہ ہیں ۔

سیدنا عمران بن حصین رضی اللہ عنہ بیان کرتے ہیں : نبی اکرم صلی اللہ علیہ وسلم نے ایک شخص کے بازو پر چھلا دیکھا ، راوی کہتے ہیں : میرا خیال ہے روایت میں یہ الفاظ ہیں : وہ چھلا پیتل کا بنا ہوا تھا ، نبی اکرم صلی اللہ علیہ وسلم نے فرمایا : تمہارا ستیاناس ہو ، یہ کس لئے ہے ؟ اس نے کہا: یہ کمزوری دور کرنے والا ہے ۔ نبی اکرم صلی اللہ علیہ وسلم نے ارشاد فرمایا : یہ تمہاری کمزوری میں اضافہ ہی کرے گا ، اسے تم اپنے آپ سے دور کر دو ! کیونکہ اگر تم ایسی حالت میں مر گئے ، کہ یہ تم پر ہوا ، تو تم کبھی فلاح نہیں پاؤ گے “ ۔ ( علامہ ہیثمی فرماتے ہیں : ) میں یہ کہتا ہوں :
یہ روایت امام ابن ماجہ نے اختصار کے ساتھ نقل کی ہے ۔
یہ روایت امام أحمد اور امام طبرانی نے نقل کی ہے ۔ انہوں نے یہ الفاظ نقل کیے ہیں : ” اگر تم اس حالت میں مر گئے کہ یہ تم پر ہوا ، تو تمہیں اس کے سپرد کر دیا جائے گا “ ۔ راوی بیان کرتے ہیں : ایک موقوف روایت میں یہ الفاظ ہیں : ” تم اسے اپنے آپ سے پرے کر دو ! کیونکہ اگر تم ایسی حالت میں مر گئے کہ تم یہ عقیدہ رکھتے ہوئے کہ یہ تمہیں نفع دے گا ، تو تم فطرت ( یعنی دین اسلام ) کے علاوہ پر مرو گے “ ۔ اس روایت کی سند میں ایک راوی مبارک بن فضالہ ہے ، اور وہ ثقہ ہے اور اس میں ضعف پایا جاتا ہے ، اس روایت کے بقیہ رجال ثقہ ہیں ۔

سیدنا عمران بن حصین رضی اللہ عنہ کے بارے میں یہ بات منقول ہے : انہوں نے ایک شخص کو دیکھا کہ جس کے بازو میں پیتل کا حلقہ ( یعنی چھلا یا کڑا ) موجود تھا ، انہوں نے دریافت کیا : یہ کس لئے ہے ؟ اس نے بتایا : کمزوری سے بچنے کے لئے مجھے یہ تجویز کیا گیا ہے ۔ انہوں نے فرمایا : اگر تم ایسی حالت میں مر گئے کہ یہ تمہارے جسم پر ہوا ، تو تمہیں اس کے حوالے کر دیا جائے گا ، کیونکہ نبی اکرم صلی اللہ علیہ وسلم نے ارشاد فرمایا ہے : ” وہ شخص ہم میں سے نہیں ہے ، جو شگون لیتا ہے ، یا جس کے لئے شگون لیا جاتا ہے ، یا جو کہانت کرتا ہے ، یا جس کے لئے کہانت کی جاتی ہے ، ( راوی کہتے ہیں : میرے خیال میں روایت میں یہ الفاظ بھی ہیں : ) یا وہ جادو کرتا ہے ، یا اس کے لئے جادو کیا جاتا ہے “ ۔
یہ روایت امام طبرانی نے نقل کی ہے ، اس کی سند میں ایک راوی اسحاق بن ربیع عطار ہے ، جسے ابوحاتم نے ثقہ قرار دیا ہے ، اور عمرو بن علی نے اسے ضعیف کہا: ہے ۔ اس روایت کے بقیہ رجال ثقہ ہیں ۔