مجمع الزوائد ومنبع الفوائد

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” اللہ تعالیٰ ایسی امت کو پاک نہیں کرتا ، جس میں کمزور شخص کے لئے ، طاقتور سے حق نہیں لیا جاتا “ ۔
یہ روایت امام بزار نے نقل کی ہے اس کی سند میں ایک راوی مثنی بن صباح ہے اور وہ ضعیف ہے ایک روایت کے مطابق یحیی بن معین نے اسے ثقہ قرار دیا ہے ایک روایت کے مطابق انہوں نے یہ کہا: ہے کہ یہ ضعیف ہے اور اس کی حدیث کو نوٹ کیا جائے گا ، اسے متروک قرار نہیں دیا جائے گا ، حالانکہ ان کے علاوہ دیگر لوگوں نے اسے متروک قرار دیا ہے ۔

سیدنا ابوسعید خدری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” ایسی امت کو پاک نہیں کیا جاتا جس ، میں کمزور کو اس کا حق رکاوٹ ( یا دقت ) کے بغیر نہیں دیا جاتا “ ۔
یہ روایت امام ابویعلیٰ نے نقل کی ہے اور اس کے رجال صحیح کے رجال ہیں ۔ ( علامہ ہیثمی فرماتے ہیں : ) میں یہ کہتا ہوں : اس نوعیت کی دیگر احادیث خلافت سے متعلق باب میں آگے آئیں گی ، اگر اللہ نے چاہا ۔

سیدنا عبداللہ بن مسعود رضی اللہ عنہ بیان کرتے ہیں : جب نبی اکرم صلی اللہ علیہ وسلم مدینہ منورہ تشریف لائے ، تو آپ نے مختلف گھر عطیہ کے طور پر دیے ، جن لوگوں کو آپ نے عطیہ کے طور پر دیے تھے ، ان میں آپ نے سیدنا عبداللہ بن مسعود رضی اللہ عنہ کو بھی دیا ، آپ کے اصحاب نے آپ کی خدمت میں عرض کی : یا رسول اللہ ! آپ انہیں ہم سے ہٹا دیں ، نبی اکرم صلی اللہ علیہ وسلم نے فرمایا : پھر اللہ تعالیٰ نے مجھے کیوں بھیجا ہے ؟ بے شک اللہ تعالیٰ ایسی امت کو پاک نہیں کرتا ، جو لوگ اپنے میں سے ضعیف شخص کو اس کا حق نہیں دیتے ہیں “ ۔
یہ روایت امام طبرانی نے معجم کبیر اور معجم اوسط میں نقل کی ہے اور اس کے رجال ثقہ ہیں ۔

قابوس بن مخارق ، اپنے والد کا یہ بیان نقل کرتے ہیں : نبی اکرم صلی اللہ علیہ وسلم نے ارشاد فرمایا : ” ایسی امت کو پاکیزگی عطا نہیں کی جاتی ، جس میں کمزور شخص کا حق ، کسی رکاوٹ ( یا دقت ) کے بغیر وصول نہیں کیا جا سکتا “ ۔
یہ روایت امام طبرانی نے معجم کبیر اور معجم اوسط میں نقل کی ہے اور اس کے رجال ثقہ ہیں ۔ اچھے طریقے سے قرض ادا کرنے سے متعلق احادیث ، خرید و فروخت سے متعلق باب میں پہلے گزر چکی ہیں ۔