مجمع الزوائد ومنبع الفوائد

سیدنا عتبہ بن عبد رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” خلافت قریش میں رہے گی ، فیصلہ کرنے کا عہدہ انصار میں رہے گا ، دعوت حبشیوں میں رہے گی ، اور ہجرت مسلمانوں میں رہے گی اور مہاجرین اس کے بعد بھی ہوں گے “ ۔
یہ روایت امام أحمد اور امام طبرانی نے نقل کی ہے اور اس کے رجال ثقہ ہیں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” حکومت قریش میں رہے گی ، قاضی کا عہدہ انصار میں رہے گا ، اذان حبشیوں میں رہے گی ، میثاق ( کی پاسداری ) یمن میں رہے گی اور امانت ، ازد قبیلے کے لوگوں میں رہے گی “ ۔ ( علامہ ہیثمی فرماتے ہیں : ) میں یہ کہتا ہوں :
یہ روایت امام ترمذی نے نقل کی ہے تاہم انہوں نے یہ الفاظ نقل نہیں کیے ہیں : ” میثاق ( کی پاسداری ) یمن میں رہے گی “ ۔
یہ روایت امام أحمد نے نقل کی ہے اور اس کے رجال ثقہ ہیں ۔

عمران بن حطان بیان کرتے ہیں : میں سیدہ عائشہ رضی اللہ عنہا کی خدمت میں حاضر ہوا ، میں ان کے ساتھ تبادلہ خیال کرتا رہا یہاں تک کہ ہم نے قاضی کا ذکر کیا ، تو سیدہ عائشہ رضی اللہ عنہا نے بتایا : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” قیامت کے دن عدل کرنے والے قاضی پر بھی ایسی گھڑی ضرور آئے گی ، جب وہ یہ آرزو کرے گا کہ کاش اس نے کبھی ایک کھجور کے بارے میں بھی ، دو آدمیوں کے درمیان کبھی کوئی فیصلہ نہ دیا ہوتا“ ۔
یہ روایت امام أحمد نے نقل کی ہے اور اس کی سند حسن ہے ، امام طبرانی نے اسے معجم اوسط میں نقل کیا ہے ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو بھی شخص دس آدمیوں کا امیر ہو گا ، تو جب اسے قیامت کے دن لایا جائے گا ، تو اس کے ہاتھ بندھے ہوئے ہوں گے اور صرف عدل ہی اُسے چھڑوا سکے گا “ ۔
یہ روایت امام أحمد نے نقل کی ہے اور اس کے رجال صحیح کے رجال ہیں ،
یہ روایت امام ابویعلیٰ نے بھی نقل کی ہے ، تاہم انہوں نے یہ الفاظ نقل کیے ہیں : ” یا عدل اُسے چھڑوا دے گا ، یا ظلم اسے ہلاکت کا شکار کروا دے گا “ ۔ اس روایت کے مختلف طرق ہیں ، جو خلافت سے متعلق باب میں آئیں گے ۔

عبدالله بن موہب بیان کرتے ہیں : سیدنا عثمان رضی اللہ عنہ نے سیدنا عبداللہ رضی اللہ عنہ سے کہا: آپ جائیں اور لوگوں کے درمیان قاضی کے فرائض سر انجام دیں سیدنا عبداللہ بن عمر رضی اللہ عنہما نے فرمایا : اے امیر المؤمنین ! آپ مجھے اس حوالے سے معاف نہیں رکھیں گے ؟ سیدنا عثمان رضی اللہ عنہ نے فرمایا : میں آپ کو تاکید کرتا ہوں کہ آپ جائیں اور قاضی کے طور پر ذمہ داریاں سر انجام دیں ، سیدنا عبداللہ بن عمر رضی اللہ عنہما نے کہا: آپ جلدی نہ کریں میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ۔ ” جو شخص اللہ کی پناہ مانگتا ہے ، تو وہ ایک مضبوط پناہ مانگتا ہے “ ۔ سیدنا عثمان رضی اللہ عنہ نے کہا: ٹھیک ہے ، تو سیدنا عبداللہ بن عمر رضی اللہ عنہما نے کہا: میں اللہ کی اس بات سے پناہ مانگتا ہوں کہ میں قاضی بن جاؤں ، سیدنا عثمان رضی اللہ عنہ نے دریافت کیا : آپ ایسا کیوں نہیں کر رہے ؟ جبکہ آپ کے والد قاضی کے طور پر فیصلے دیا کرتے تھے ، سیدنا عبداللہ رضی اللہ عنہ نے بتایا کہ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص قاضی بنے اور جہالت کی بنیاد پر فیصلے دے ، تو وہ جہنمی ہو گا اور جو شخص قاضی بنے اور وہ عالم ہو اور وہ حق یا عدل کے مطابق فیصلہ دے تو وہ یہ درخواست کرے گا کہ اُسے برابری کی بنیاد پر چھوڑ دیا جائے “ ۔ ( سیدنا عبداللہ بن عمر رضی اللہ عنہما نے فرمایا : ) تو میں اس کے بعد کس چیز کی توقع رکھ سکتا ہوں ؟ ( علامہ ہیثمی فرماتے ہیں : ) میں یہ کہتا ہوں : ان کے حوالے سے ایک حدیث مذکور ہے ، جو امام ترمذی نے نقل کی ہے اور وہ اس سیاق کے علاوہ ہے ۔
یہ روایت امام طبرانی نے معجم کبیر اور معجم اوسط میں نقل کی ہے ، امام بزار نے اور امام أحمد نے بھی نقل کی ہے ، لیکن ان دونوں نے اسے اختصار کے ساتھ نقل کیا ہے اور اس کے رجال ثقہ ہیں ، امام أحمد نے یہ الفاظ زائد نقل کیے ہیں : تو سیدنا عثمان رضی اللہ عنہ نے انہیں چھوڑ دیا ، انہوں نے کہا: آپ کسی ایک کو زبردستی مجبور نہیں کریں گے ۔

سیدنا عبداللہ بن عمر رضی اللہ عنہما بیان کرتے ہیں : سیدنا عثمان غنی رضی اللہ عنہ نے انہیں قاضی کے عہدے پر فائز کرنے کا ارادہ کیا ، تو انہوں نے انکار کر دیا اور یہ بات بیان کی : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” قاضی تین قسم کے ہوتے ہیں ، ایک نجات پانے والا ہو گا اور دو جہنم میں جائیں گے ، جو شخص ظلم کے مطابق ( راوی کو شک ہے شاید یہ الفاظ ہیں : ) یا نفسانی خواہش کے مطابق فیصلہ دے گا وہ ہلاکت کا شکار ہو جائے گا اور جو شخص حق کے مطابق فیصلہ دے گا ، وہ نجات پا جائے گا “ ۔
یہ روایت امام طبرانی نے معجم اوسط میں اور معجم کبیر میں نقل کی ہے اور ان کے الفاظ یہ ہیں : ” جو قاضی خواہش نفس کے مطابق فیصلہ دے گا ، وہ جہنم میں جائے گا ایک قاضی وہ ہے ، جو علم نہ ہونے کے باوجود فیصلہ دے گا ، وہ جہنم میں جائے گا اور ایک قاضی وہ ہے ، جو حق کے مطابق فیصلہ دے گا ، وہ جنت میں جائے گا “ ۔ معجم کبیر کے رجال ثقہ ہیں ، امام ابویعلیٰ نے بھی اس کی مانند روایت نقل کی ہے ۔

سیدنا ابوایوب انصاری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” قاضی جب فیصلہ دیتا ہے ، تو اللہ تعالیٰ کا دست رحمت اس کے ساتھ ہوتا ہے اور جب تقسیم کرنے والا تقسیم کرتا ہے ، تو اللہ تعالیٰ کا دست رحمت اس کے ساتھ ہوتا ہے “ ۔
یہ روایت امام أحمد نے نقل کی ہے اس کی سند میں ایک راوی ابن لہیعہ ہے اس کی نقل کردہ حدیث حسن ہے اور اس میں ضعف پایا جاتا ہے ۔

سیدنا عبداللہ بن مسعود رضی اللہ عنہ ” مرفوع “ حدیث کے طور پر یہ بات نقل کرتے ہیں : ( نبی اکرم صلی اللہ علیہ وسلم نے ارشاد فرمایا : ) ” قیامت کے دن قاضی کو لایا جائے گا اور جہنم کے کنارے پر کھڑا کر دیا جائے گا ، اگر اس کے بارے میں حکم دیا جائے گا ، تو اسے اُس میں پھینک دیا جائے گا ، اور وہ ستر سال تک اُس میں گرتا رہے گا “ ۔ ( علامہ ہیثمی فرماتے ہیں : ) میں یہ کہتا ہوں :
یہ روایت امام ابن ماجہ نے نقل کی ہے تاہم انہوں نے یہ الفاظ نقل کیے ہیں : ” وہ چالیس سال تک اس میں گرتا رہے گا “ ۔
یہ روایت امام بزار نے نقل کی ہے اس کی سند میں ایک راوی مجالد بن سعید ہے ، جسے امام نسائی رحمہ اللہ نے ثقہ قرار دیا ہے اور ایک جماعت نے اسے ضعیف کہا: ہے ۔

سیدنا معقل بن یسار رضی اللہ عنہ مزنی بیان کرتے ہیں : نبی اکرم صلی اللہ علیہ وسلم نے مجھے یہ حکم دیا کہ میں کچھ لوگوں کے درمیان قاضی کے فرائض سرانجام دوں ، میں نے عرض کی : یا رسول اللہ ! میں اچھی طرح سے قاضی کے فرائض سرانجام نہیں دے سکتا ، نبی اکرم صلی اللہ علیہ وسلم نے فرمایا : ” اللہ تعالی کا دست رحمت قاضی کے ساتھ ہوتا ہے ، جب تک وہ جان بوجھ کر زیادتی نہیں کرتا “ ۔
یہ روایت امام أحمد نے اور امام طبرانی نے معجم کبیر اور معجم اوسط میں نقل کی ہے ، اس کی سند میں ایک راوی ابوداؤد نابینا ہے اور وہ کذاب ہے ۔

سیدنا عبداللہ بن مسعود رضی اللہ عنہ نبی اکرم صلی اللہ علیہ وسلم کے حوالے سے یہ بات نقل کرتے ہیں : ( نبی اکرم صلی اللہ علیہ وسلم نے ارشاد فرمایا ہے : ) ” بے شک اللہ تعالیٰ قاضی کے ساتھ ہوتا ہے ، جب تک وہ جان بوجھ کر زیادتی نہیں کرتا “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی حفص بن سلیمان قاری ہے ، جسے امام أحمد نے ثقہ قرار دیا ہے اور ائمہ نے اسے ضعیف کہا: ہے ۔ انہوں نے اس کی نسبت جھوٹ بولنے اور حدیث ایجاد کرنے کی طرف کی ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص مسلمانوں کے کسی معاملے کا نگران بنتا ہے اور اس کی نیت حق کے مطابق ہوتی ہے ، تو اللہ تعالیٰ اس کے ساتھ دو فرشتے مقرر کر دیتا ہے ، جو اسے توفیق دیتے ہیں اور اس کی رہنمائی کرتے ہیں ، اور جو شخص مسلمانوں کے کسی معاملے کا نگران بنتا ہے اور اس کی نیت حق کے مطابق نہیں ہوتی ہے ، تو اللہ تعالیٰ اسے اس کی ذات کے حوالے کر دیتا ہے “ ۔
یہ روایت امام طبرانی نے معجم اوسط میں نقل کی ہے اور امام بزار نے نقل کی ہے ، تاہم انہوں نے یہ الفاظ نقل کیے ہیں : ” وہ دونوں فرشتے اسے توفیق دیتے ہیں ، اُسے سیدھے راستے پر رکھتے ہیں ، جب اس کے بارے میں بھلائی کا ارادہ کر لیا گیا ہو “ ۔ اس روایت کی سند میں ایک راوی ابراہیم بن خثیم بن عراک ہے اور وہ ضعیف ہے ۔

سیدنا واثلہ بن اسقع رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو بھی مسلمان ، مسلمانوں کے کسی معاملے کا نگران بنتا ہے ، تو اللہ تعالیٰ اس کی طرف دو فرشتے بھیجتا ہے ، جو اسے سیدھی راہ بتاتے ہیں ، جب تک وہ حق کی نیت رکھتا ہے ، اور جب وہ جان بوجھ کر زیادتی کی نیت کر لے ، تو وہ دونوں اسے اس کے حال پر چھوڑ دیتے ہیں “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی جناح ہے ، جو ولید کا آزاد کردہ غلام ہے ، ازدی نے اسے ضعیف قرار دیا ہے ۔

سیدنا زید بن ارقم رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” بے شک اللہ تعالیٰ قاضی کے ساتھ ہوتا ہے ، جب تک وہ جان بوجھ کر زیادتی نہیں کرتا ، اللہ تعالیٰ اسے بھلائی کی توفیق دیتا رہتا ہے ، جب تک وہ بھلائی کے علاوہ کا ارادہ نہیں کرتا “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ابوداؤد نابینا ہے ، جس کی نسبت جھوٹ کی طرف کی گئی ہے ۔

سیدنا عمران بن حصین رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” مسلمانوں کے قاضیوں میں سے ، جو بھی قاضی ہوتا ہے ، اس کے ساتھ دو فرشتے ہوتے ہیں ، جو حق کی طرف اس کی رہنمائی کرتے ہیں جب تک وہ حق کے علاوہ کسی اور چیز کا ارادہ نہیں کرتا ، جب وہ حق کے علاوہ کا ارادہ کرتا ہے اور جان بوجھ کر زیادتی کرتا ہے ، تو دونوں فرشتے اس سے لاتعلق ہو جاتے ہیں اور اسے اس کی ذات کے حوالے کر دیتے ہیں “ ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی ابوداؤد نابینا ہے اور وہ کذاب ہے ۔