مجمع الزوائد ومنبع الفوائد

سیدنا عقبہ بن عامر رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جب تم امن کی حالت میں آ چکے ہو ، تو اس کے بعد اپنے آپ کو خوف کا شکار نہ کرو ، لوگوں نے عرض کی : یا رسول اللہ ! وہ کیا ہے ؟ نبی اکرم صلی اللہ علیہ وسلم نے ارشاد فرمایا : اُدھار “ ۔

ان کے حوالے سے ہی یہ بات منقول ہے : نبی اکرم صلی اللہ علیہ وسلم نے اپنے اصحاب سے فرمایا : تم اپنے آپ کو خوف کا شکار نہ کرو ( راوی کو شک ہے ، شاید یہ الفاظ ہیں : ) اپنی جانوں کو خوف کا شکار نہ کرو ! عرض کی گئی : یا رسول اللہ ! ہم اپنی جانوں کو کیسے خوف کا شکار کر سکتے ہیں ؟ تو آپ نے فرمایا : اُدھار کے حوالے سے ۔ یہ روایت امام أحمد نے دو اسناد کے ساتھ نقل کی ہے ، جن دونوں میں سے ایک کے رجال ثقہ ہیں ۔
یہ روایت امام طبرانی نے معجم کبیر میں اور امام ابویعلیٰ نے نقل کی ہے ۔

سیدنا جابر رضی اللہ عنہ بیان کرتے ہیں : ایک شخص کا انتقال ہوا ، ہم نے اسے غسل دیا اسے کفن دیا ، اسے خوشبو لگائی پھر اسے لے کر نبی اکرم صلی اللہ علیہ وسلم کے پاس آئے ، تاکہ آپ اس کی نماز جنازہ ادا کریں ، نبی اکرم صلی اللہ علیہ وسلم نے ایک قدم اٹھایا پھر آپ نے دریافت کیا : کیا اس کے ذمہ قرض ہے ؟ میں نے عرض کی : دو دینار ہیں ، نبی اکرم صلی اللہ علیہ وسلم واپس مڑ گئے سیدنا ابوقتادہ رضی اللہ عنہ نے ان دونوں کی ادائیگی اپنے ذمہ لی پھر ہم نبی اکرم صلی اللہ علیہ وسلم کی خدمت میں حاضر ہوئے سیدنا ابوقتادہ رضی اللہ عنہ نے عرض کی : دو دیناروں کی ادائیگی میرے ذمہ ہے ، نبی اکرم صلی اللہ علیہ وسلم نے ارشاد فرمایا : اللہ تعالیٰ نے قرض خواہ کے حق کو ادا کروا دیا اور میت اس سے لاتعلق ہو گئی ، انہوں نے جواب دیا : جی ہاں ! تو نبی اکرم صلی اللہ علیہ وسلم نے اس شخص کی نماز جنازہ ادا کی ، اس کے ایک دن بعد نبی اکرم صلی اللہ علیہ وسلم نے دریافت کیا : دو دیناروں کے معاملے کا کیا بنا ؟ میں نے عرض کی : اس کا تو گزشتہ کل انتقال ہوا ہے ، راوی بیان کرتے ہیں : اگلے دن وہ نبی اکرم صلی اللہ علیہ وسلم کی خدمت میں حاضر ہوئے اور عرض کی : میں نے ان دونوں کو ادا کر دیا ہے ، تو نبی اکرم صلی اللہ علیہ وسلم نے ارشاد فرمایا : اب اس شخص پر اس کی جلد ٹھنڈی ہوئی ہے ۔ ( علامہ ہیثمی فرماتے ہیں : ) میں یہ کہتا ہوں : یہ روایت امام ابوداؤد نے اختصار کے ساتھ نقل کی ہے ۔
یہ روایت امام أحمد اور امام بزار نے نقل کی ہے اور اس کی سند حسن ہے ۔

سیدنا ابوہریرہ رضی اللہ عنہ بیان کرتے ہیں : ایک جنازہ لایا گیا نبی اکرم صلی اللہ علیہ وسلم اس کی نماز جنازہ ادا کرنے کے لئے اٹھے ، لوگوں نے بتایا اس کے ذمہ قرض ہے ، نبی اکرم صلی اللہ علیہ وسلم نے فرمایا : اپنے ساتھی کو لے جاؤ اور اس کی نماز جنازہ ادا کر لو ، ایک شخص بولا: اس کا قرض میرے ذمہ ہے ، آپ اس کی نماز جنازہ ادا کیجئے ، تو نبی اکرم صلی اللہ علیہ وسلم اٹھے اور آپ نے اس کی نماز جنازہ ادا کی ۔
یہ روایت امام بزار نے نقل کی ہے اور اس کے رجال صحیح کے رجال ہیں اس سے پہلے جنائز سے متعلق باب میں اس نوعیت کی احادیث گزر چکی ہیں ۔

سیدنا جابر بن عبداللہ رضی اللہ عنہ بیان کرتے ہیں : ایک شخص نبی اکرم صلی اللہ علیہ وسلم کی خدمت میں حاضر ہوا اور بولا: اس بارے میں آپ کی کیا رائے ہے ؟ اگر میں اپنی جان اور مال کے ہمراہ جہاد میں حصہ لیتا ہوں اور صبر کرنے والے کے طور پر ، ثواب کی امید رکھنے والے کے طور پر دشمن کی طرف رخ کر کے ، پیٹھ پھیرے بغیر رہتے ہوئے قتل ہو جاتا ہوں ، تو کیا میں جنت میں داخل ہو جاؤں گا ؟ نبی اکرم صلی اللہ علیہ وسلم نے ارشاد فرمایا : جی ہاں ! اس شخص نے دو یا تین مرتبہ اس بات کو دہرایا تو نبی اکرم صلی اللہ علیہ وسلم نے فرمایا : جی ہاں ! بشرطیکہ تمہارے ذمہ کوئی ایسا قرض نہ ہو کہ جس کی ادائیگی کی کوئی صورت تمہارے پاس نہ ہو ۔
یہ روایت امام أحمد اور امام بزار نے نقل کی ہے امام أحمد کی سند حسن ہے ۔

سیدنا محمد بن جحش رضی اللہ عنہ بیان کرتے ہیں : ایک شخص نبی اکرم صلی اللہ علیہ وسلم کی خدمت میں حاضر ہوا اور اس نے عرض کی : یا رسول اللہ ! اگر میں اللہ کی راہ میں جہاد میں حصہ لیتے ہوئے قتل ہو جاؤں تو مجھے کیا ملے گا ؟ نبی اکرم صلی اللہ علیہ وسلم نے فرمایا : جنت ، جب وہ شخص مڑ کر جانے لگا تو نبی اکرم صلی اللہ علیہ وسلم نے ارشاد فرمایا : البتہ قرض کا معاملہ مختلف ہے ، ابھی جبرائیل نے سرگوشی میں مجھے یہ بات بتائی ہے ۔
یہ روایت امام أحمد نے نقل کی ہے اس کی سند میں ایک راوی ابوکثیر ہے اور وہ مستور ہے اس روایت کے بقیہ رجال کی توثیق کی گئی ہے ۔

محمد بن عبداللہ بن جحش ، اپنے والد کے حوالے سے یہ بات نقل کرتے ہیں : ایک شخص نبی اکرم صلی اللہ علیہ وسلم کی خدمت میں حاضر ہوا اس نے عرض کی : یا رسول اللہ ! اگر میں اللہ کی راہ میں مارا جاؤں ؟ نبی اکرم صلی اللہ علیہ وسلم نے فرمایا : جنت ( ملے گی ) جب وہ شخص مڑ گیا تو نبی اکرم صلی اللہ علیہ وسلم نے فرمایا : البتہ قرض کا معاملہ مختلف ہے ، ابھی جبرائیل نے مجھے سرگوشی میں یہ بات بتائی ہے ۔ ( علامہ ہیثمی فرماتے ہیں : ) میں یہ کہتا ہوں : ان کے حوالے سے ایک حدیث ہے ، جسے امام نسائی رحمہ اللہ نے روایت کیا ہے اور وہ اس روایت کے علاوہ ہے ۔
یہ روایت امام أحمد نے نقل کی ہے اس کی سند میں ایک راوی ابوکثیر ہے اور وہ مستور ہے اس روایت کے بقیہ رجال ثقہ ہیں ۔

سیدنا محمد بن عبداللہ بن جحش رضی اللہ عنہ بیان کرتے ہیں : انہوں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” اگر کوئی شخص اللہ کی راہ میں قتل ہو جائے اور پھر اسے زندہ کر دیا جائے ، پھر وہ اللہ کی راہ میں قتل ہو جائے ، پھر اسے زندہ کر دیا جائے تو وہ جنت میں اس وقت تک داخل نہیں ہو گا ، جب تک اس کی طرف سے اس کا قرض ادا نہیں کر دیا جاتا ، کیونکہ وہاں سونا اور چاندی نہیں ہو گا ، وہاں نیکیاں اور برائیاں ہوں گی“ ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی روح بن صلاح ہے ، جسے ابن حبان نے اور امام حاکم رحمہ اللہ نے ثقہ قرار دیا ہے ، جبکہ ابن عدی نے اسے ضعیف کہا: ہے ۔

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم کھڑے ہوئے آپ نے خطبہ دیا آپ نے اللہ تعالیٰ پر ایمان رکھنے اور اللہ کی راہ میں جہاد کرنے کے ، اللہ کی بارگاہ میں سب سے زیادہ عمل ہونے کا تذکرہ کیا ، راوی بیان کرتے ہیں : تو ایک شخص کھڑا ہوا ، اس نے عرض کی : یا رسول اللہ ! اس بارے میں آپ کی کیا رائے ہے ؟ کہ اگر میں اللہ کی راہ میں مارا جاتا ہوں اور میں صبر کرنے والا اور ثواب کی امید رکھنے والا ہوتا ہوں ، دشمن کی طرف رخ کیے ہوتا ہوں ، پیٹھ نہیں پھیری ہوتی ، تو کیا للہ تعالی میرے گناہ ختم کر دے گا ؟ نبی اکرم صلی اللہ علیہ وسلم نے ارشاد فرمایا : جی ہاں ! پھر نبی اکرم صلی اللہ علیہ وسلم نے فرمایا : تم نے کیا کہا: ہے ؟ اس نے اپنی بات دہرا دی جس طرح پہلے کہی تھی نبی اکرم صلی اللہ علیہ وسلم نے فرمایا : جی ہاں ! پھر نبی اکرم صلی اللہ علیہ وسلم نے دریافت کیا : تم نے کیا کہا: ہے ؟ اس نے دوبارہ اپنی بات دہرا دی اور عرض کی : یا رسول اللہ ! اس بارے میں آپ کی کیا رائے ہے ؟ اگر میں صبر کرنے والے کے طور پر ثواب کی امید رکھتے ہوئے دشمن کی طرف رخ کر کے ، پیٹھ نہ پھیر کر ، اللہ کی راہ میں قتل ہو جاتا ہوں ، تو کیا اللہ تعالیٰ میرے گناہ ختم کر دے گا ؟ نبی اکرم صلی اللہ علیہ وسلم نے ارشاد فرمایا : جی ہاں ! البتہ قرض کا معاملہ مختلف ہے ، ابھی جبرائیل نے سرگوشی میں مجھے اس بارے میں بتایا ہے ۔
یہ روایت امام أحمد نے نقل کی ہے اور اس کے رجال صحیح کے رجال ہیں ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے صبح کی نماز ادا کی پھر آپ نے ارشاد فرمایا : ” کیا یہاں ہذیل قبیلے سے تعلق رکھنے والا کوئی فرد موجود ہے ؟ تمہارے ساتھی کو جنت کے دروازے پر روک لیا گیا ہے ۔ “ راوی کہتے ہیں : میرا خیال ہے روایت میں یہ الفاظ ہیں : ” اس کے ذمہ قرض کی وجہ سے ( روکا گیا ہے ) “ ۔
یہ روایت امام بزار نے نقل کی ہے اور امام طبرانی نے معجم کبیر میں اس سے ذرا طویل روایت کے طور پر نقل کی ہے اس کی سند میں ایک راوی حبان بن علی ہے ، جسے کچھ لوگوں نے ثقہ قرار دیا ہے اور کچھ لوگوں نے اسے ضعیف کہا: ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم کی خدمت میں ایک شخص حاضر ہوا اس نے عرض کی : یا رسول اللہ ! ایک شخص اللہ کی راہ میں ثواب کی امید رکھتے ہوئے جنگ میں حصہ لیتا ہے ، یہاں تک کہ مارا جاتا ہے تو کیا وہ جنت میں جائے گا ؟ نبی اکرم صلی اللہ علیہ وسلم نے ارشاد فرمایا : جی ہاں ! جب وہ شخص مڑ کر واپس چلا گیا تو نبی اکرم صلی اللہ علیہ وسلم نے اسے بلوایا اور ارشاد فرمایا : جبرائیل میرے پاس آئے اور انہوں نے بتایا کہ شرط یہ ہے کہ اس کے ذمہ کوئی قرض نہ ہو ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی لیث بن ابوسلیم ہے اور وہ ثقہ ہے لیکن وہ تدلیس کرنے والا ہے ۔

سیدنا سہل بن حنیف رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” شہید کے خون کے بہنے کا جیسے ہی آغاز ہوتا ہے ، تو اس کے گناہوں کی مغفرت ہو جاتی ہے البتہ قرض کا معاملہ مختلف ہے “ ۔
یہ روایت امام طبرانی نے معجم کبیر میں نقل کی ہے اور اس کے رجال صحیح کے رجال ہیں ۔

سیدنا عبداللہ بن عمرو رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” غفلت تین صورتوں میں ہوتی ہے اللہ کے ذکر کے حوالے سے اور اس وقت جب آدمی نے صبح کی نماز ادا کر لی ہو اس وقت سے لے کر سورج طلوع ہونے تک ، اور آدمی کا اپنی ذات کے حوالے سے غفلت کا شکار ہونا یہاں تک کہ اس پر قرض سوار ہو جائے ( یعنی اس کے ذمہ قرض لازم ہو جائے ) “ ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی حدیج بن صومی ہے اور وہ مستور ہے اس روایت کے بقیہ رجال ثقہ ہیں ۔

سیدنا جابر رضی اللہ عنہ بیان کرتے ہیں : نبی اکرم صلی اللہ علیہ وسلم نے نماز ادا کی اور نماز پڑھ کر فارغ ہوئے ، تو آپ نے ارشاد فرمایا : یہاں بنوفلاں سے تعلق رکھنے والا کوئی شخص موجود ہے ؟ کسی نے آپ کو جواب نہیں دیا نبی اکرم صلی اللہ علیہ وسلم نے دریافت کیا : یہاں بنو فلاں سے تعلق رکھنے والا کوئی شخص موجود ہے ؟ پھر نبی اکرم صلی اللہ علیہ وسلم نے تیسری مرتبہ اپنی بات کو دہرایا تو ایک شخص نے عرض کی : یا رسول اللہ میں ہوں ، نبی اکرم صلی اللہ علیہ وسلم نے فرمایا : تم پہلے کیوں نہیں کھڑے ہوئے ؟ اس نے عرض کی : یا رسول اللہ ! مجھے یہ اندیشہ ہوا کہ کہیں کوئی نیا حکم نہ سامنے آ جائے ، نبی اکرم صلی اللہ علیہ وسلم نے ارشاد فرمایا : جی نہیں ! تمہارا ساتھی فلاں شخص اسے اس کے ذمہ لازم قرض کی وجہ سے جنت کے دروازے پر روک لیا گیا ہے ، اُس شخص نے کہا: یا رسول اللہ ! اس کا قرض میرے ذمہ ہے ۔
یہ روایت امام بزار نے نقل کی ہے ، اس کی سند میں ایک راوی عبدالرحمن بن مغراء ہے ، جسے ابوخالد احمر اور ابن حبان نے ثقہ قرار دیا ہے اور دیگر لوگوں نے اسے ضعیف کہا: ہے ۔

سعد بن اطول بیان کرتے ہیں : اُن کے والد کا انتقال ہو گیا ، انہوں نے تین سو درہم اور عیال اور قرض پسماندگان میں چھوڑے ، میں نے یہ ارادہ کیا کہ میں ( وہ رقم ) اُن کے عیال پر خرچ کروں ، تو نبی اکرم صلی اللہ علیہ وسلم نے ارشاد فرمایا : تمہارے باپ کو اس کے قرض کی وجہ سے روک لیا گیا ہے تم اس کی طرف سے قرض کو ادا کر دو ! میں نے عرض کی : میرے ماں باپ آپ پر قربان ہوں یا رسول اللہ ! میں نے سارا قرض ادا کر دیا ہے ، البتہ ایک عورت کا معاملہ مختلف ہے ، جس نے دو دیناروں کا دعویٰ کیا ہے ، لیکن اس کے پاس کوئی ثبوت نہیں ہے ، نبی اکرم صلی اللہ علیہ وسلم نے ارشاد فرمایا : وہ اُسے ادا کر دو کیونکہ وہ سچ بول رہی ہے ، راوی کہتے ہیں : تو میں نے اس خاتون کو ادائیگی کر دی ۔ ( علامہ ہیثمی فرماتے ہیں : ) میں یہ کہتا ہوں : امام ابن ماجہ نے یہ پورا واقعہ کیا ہے کہ وہ ان کے بھائی کے بارے میں ہے اور یہاں یہ ذکر ہوا ہے کہ یہ اُن کے والد کے بارے میں ہے ۔

نبی اکرم صلی اللہ علیہ وسلم کے اصحاب میں سے ، ایک صاحب کے حوالے سے اس کی مانند روایت منقول ہے ۔ یہ پوری روایت اور اس سے پہلے والی روایت ، امام أحمد اور امام ابویعلیٰ نے نقل کی ہے ، اس کی سند میں ایک راوی عبدالملک ابوجعفر ہے ، جس کا ذکر ابن حبان نے کتاب الثقات میں کیا ہے میں نے کسی کو اس کے حالات بیان کرتے ہوئے نہیں پایا ہے ۔

سیدنا سمرہ بن جندب رضی اللہ عنہ بیان کرتے ہیں : نبی اکرم صلی اللہ علیہ وسلم نے نماز ادا کی ، جب آپ نماز پڑھ کر فارغ ہوئے ، تو آپ نے دریافت کیا : کیا یہاں بنو فلاں سے تعلق رکھنے والا کوئی شخص موجود ہے ؟ تو کسی نے آپ کو جواب نہیں دیا ، پھر آپ نے دریافت کیا : کیا یہاں بنو فلاں سے تعلق رکھنے والا کوئی شخص موجود ہے ؟ تو کسی نے آپ کو جواب نہیں دیا ، پھر آپ نے دریافت کیا : کیا یہاں بنوفلاں سے تعلق رکھنے والا کوئی شخص موجود ہے ؟ تو ایک صاحب بولے : جی ہاں ! یا رسول اللہ ! یہاں فلاں شخص موجود ہے ، نبی اکرم صلی اللہ علیہ وسلم نے فرمایا : تمہارے ایک ساتھی کو جنت کے دروازے پر اس کے ذمہ لازم قرض کی وجہ سے روک لیا گیا ہے ، ایک شخص نے کہا: یا رسول اللہ ! اس کا قرض میرے ذمہ ہے ۔
یہ روایت امام طبرانی نے معجم اوسط میں نقل کی ہے ، اس روایت کی سند میں ایک راوی اسلم بن سہل واسطی ہے ، امام ذہبی کہتے ہیں : امام دارقطنی رحمہ اللہ نے اسے ” لین“ قرار دیا ہے اور کسی کو ضعیف قرار دینے کے بارے میں یہ عبارت ہلکی ہے ، اس روایت کے بقیہ رجال ثقہ ہیں ۔

سیدنا براء بن عازب رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” مقروض شخص کو ، اُس کے قرض کے عوض میں پابند رکھا جائے گا اور وہ اللہ تعالیٰ کی بارگاہ میں اکیلے ہونے کی شکایت کرے گا“ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی مبارک بن فضالہ ہے ، جسے عفان اور ابن حبان نے ثقہ قرار دیا ہے اور ایک جماعت نے اسے ضعیف کہا: ہے ۔

سیدنا جابر بن عبداللہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” پریشانی صرف قرض کی پریشانی ہوتی ہے ، اور تکلیف صرف آنکھ کی ہی تکلیف ہوتی ہے “ ۔
یہ روایت امام طبرانی نے معجم صغیر اور معجم اوسط میں نقل کی ہے ، اس کی سند میں ایک راوی سہل بن قرین ہے اور وہ ضعیف ہے ۔